СУҒ ТАЗАРЫНАҢ ТОҒЫР ТОҒЫС УЗАРАДЫЛЧА
06.04.2018
Хабарлар
Чыылығ. МЧС-тың Хакасияҷа ӧӧн управлениезінде Хакасия пазының орынҷызы Владимир Крафт сағыбаан саайларха комиссия (КЧС) чыылиин иртірген.
Анда суғ тасчатханынаң тоғыр хайдағ тоғыс апарылчатханы ӱзӱрілген. Хайди таныхтаан Владимир Александрович, пу чағында суғ хозылары кӧрілче, аннаңар муниципалитеттерге суғ тасхан орыннарны пазох сыныхтабызарға кирек. Аннаң пасха, суғ тазарынаң пазох хорғыс полыбысса, республиканың предприятиелері муниципалитеттерге техника позыдарға киректер. Ол пӧгіннең аймахтар пастары чӧптезіглер тимнеп саларлар. Ідӧк суға кірген чолларны, анда саайлар полбас ӱчӱн, ГИБДД тоғынҷылары чабызарлар. Суғ тазарынаң тоғыр тоғысха орыннардағы чуртағҷылар тартылар.
Анаң муниципалитеттер орыннарда хайдағ тоғыс апарылчатханнаңар искіргеннер. Боград аймаандағы Первомайскай аалда суғ пис ӱӱҷіксер паза пір тураның верандазынзар кірген. Соонаң суғ, син парып, паза хозылбаан. Анда техника суғ каналын тирең арах хас салған. Че суғ сині хозылза, анда дамба салылар. Троицкай аалда суғ ағысчаң канал арығлалған соонда, суғ аалзар паза кірбеен.
Ағбан пилтірі аймаанда пу кӱннерде суғ, «Хакасская» шахтадаң сығып, Заря аалзар чидерінең хорғыс полыбысхан. Аны тохтадар ӱчӱн, «Степной» разрезтең бульдозер хығыртылған. Ол аал хыринда траншея хасхан. Аймах кінінзер суғ кірген сылтаанда, орындағы суғ алңаң скважина кірлен парған. Аны арығлаан ползалар даа, Роспотребнадзорның таниинаң, суғны ам даа ізерге чарадылбинча. Чуртағҷыларға суғ пасха орыннардаң читірілче.
Асхыс аалда тӧрт ӱӱҷік суғда турча. Анда суғ тартчаң машиналар тоғынча. Ис суғ, чайылып, чолларзар кіргеннеңер, оларның пірее орыннарын иптирге кирек. Ӱӱ тағ станциязар парчатхан чол ідӧк сайбал парған. Аннаңар олғаннар хонҷых аалдағы школазар чит полбинчалар. Че Таштыптағы ДРСУ чолны иптирінҷе чӧптезіг идерге ынабинча. Владимир Крафт ол сурығны транспорт паза чол хонии министерствозына пӧгерге чахаан.
Пии аймаанда киректер чахсыланыбысхан. Пу кӱннерде Новониколаевка аал хыриндағы дамбалар сыныхталған. Суғ сині кӱнде ӱс хати сыныхталча. Ідӧк суғ ағыстырҷаң канал хазылған. Аның узуны пір километрҷе полар. Сос пилтірі аал хыринда Сос суғдаң Алтын кӧлзер канал хазылар.
Чыылығны тоозып, КЧС кнезі муниципалитеттерге хар паза суғлардағы пус хайыларына тимде поларға чахаан.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде