ПӀСТӀҢ ЧИИТТЕРІБІСКЕ МХАТ-сар ЧОЛ АЗЫЛЧА
06.04.2018
Хабарлар
Пу кӱннерде танығлығ кирек полған. Пастағызын на Хакасияда МХАТ школа-студияның ӱгретчізі, пістің чииттерібістің аразында сыныхтағ иртіріп, оларны театр вузынзар таллаан.
Чоохтирға кирек, пу ӱгредіг заведениезі тиксі тилекейге сабланча. Анда Россияның паза СНГ-зар кірчеткен хазналарның чииттері ле нимес, ідӧк США-дағы паза Кидеркі Европадағы оол-хыстар ӱгренерге сағынчалар. Тиктең нимес чыл сай актер факультедінде пір орын ӱчӱн 30 кізі харбасча. Аннаңар, МХАТ-таң пеер киліп, пастағы турны иртірерлер тіп киртіністіг полбаан. Хомзынысха, сыныхтағлардаңар пресс-релиз «Хабар» газетаның редакциязынзар 2 апрельде ле кірген, актер поларға сағынчатханнарны, тізең, пір кӱнінде, 3 апрельде, таллааннар.
Сыныхтағлар Хакас драма театрының кічіг залында ирткеннер. Чайаачы кӧңніліг оол-хыстарның узын ӱгретчі, режиссер, актер Владимир Сажин паалаан. Пістің чииттерібістің аразында кӧп кізі актер поларға сағынчаттыр. Школа-студияда ӱгренерге пӧгінчеткен улусха басняны, кибелісті, повестьтің алай романның ӱзігін хығыр пирерге кирек полған. Ідӧк Владимир Анатольевич оол-хыстарны сарнаттырған. Минің кӧрізімнең, МХАТ-тың ӱгретчізі прайзына чылығ хайған, иптіг чоохтасхан.
Сыныхтағны иртчеткеннер тың чӱрексееннер. Піреезі, сценаа сығып, комиссия алнында тыып парып турчатхан, кем-де ӱгрен салған кибелістің сӧстерін ундут салған. Че ӧӧнінде пістің чииттерібіс хомай нимес тимнентірлер. Олар И.Крыловтың паза С.Михалковтың басняларын, М.Цветаеваның кибелістерін, Д.Лондонның романының ӱзігін паза даа пасхазын хығырғаннар. Минсуғның чуртағҷызы Всеволод Израэльсон амғы писатель Е.Гришковецтің «Планета» ойынынаң алылған монологты таллап алтыр. Минің кӧңніме сыныхтаға Шира аалдаң килген Карина Миницкая кірген. Ол, С.Михалковтың баснязын хығырып, матырларның хылиин кӧзіт пирерге кӱстенген. Итсе, Карина чахсы сарнап полбинчаттыр. Пістің чииттерібістің кӧбізі олаңай даа ырны толдырарға сидіксінген.
МХАТ школа-студиязар ӱгренерге кіріп аларға сағынчатханнарның аразында хакас хыс Анастасия Медведева полған. Ол Ағбанның 1 № школазында 11 класста ӱгренче. Ол кічігдең сығара «Лира» хорда сарнапча. Саблығ ӧменең хада Германияда паза Италияда ирткен чоннар аразындағы фестиваль-марығларда араласхан. Чиит хыс музыка театрында істенерге пӧгінче. Сыныхтаға Настя писательлер Н.Гогольның паза М.Шолоховтың чайаачы тоғыстарының ӱзіктерін, С.Михалковтың баснязын, С.Маршактың кибелізін паза ікі сарын тимнеп салған. Ол таллағны ирт полбас тіп сағыссыраан. Аның ӱчӱн іңезі Таисия Медведева паза тай іҷезі Галина Сагалакова «ағырчатханнар». Галина Николаевна пархаҷағы сыныхтағны турыстыра иртібізер тіп ізенізінең ӱлескен.
Иирзер сыныхтағның салтарларын искіргеннер. Комиссиязар 80 сурыныс пічии кірген. Пастағы турда Хакасияның на нимес, ідӧк Барнаулның, Шарыповтың, Минсуғның чиит чуртағҷылары араласханнар. МХАТ школа-студияның ӱгретчізі чарадии хоостыра ікінҷі турға пис кізі ирт парыбысхан: Андрей Сипкин, Артём Анашкин, Кирилл Горлов, Александр Григорьев паза Анастасия Медведева.
Таныхтирға кирек, пу сыныхтағлар «РУСАЛ ФестивАL# Театр» социокультура проект хоостыра иртірілгеннер. Аның алнында театр вузтың тоғынҷылары мындағ оңдайнаң Ухтадағы, Сыктывкардағы, Шелеховтағы, Иркутсктағы, Братсктағы, Хызылчардағы, Ачинсктегі чииттерні таллааннар. Иркутскта пастағы турны 50 кізідең пір ле хызыҷах иртібіскен, Братскта пірдеезін таллап полбааннар, Хызылчарда позын сигіс кізі турыстыра кӧзіт пиртір. Аннаңар Хакасияда пис кізіні таллап алғаны чахсы салтар. Владимир Сажиннің таниинаң, амды сидік тус, Москвазар парып, сыныхтағларны иртерге кӧп кізінің оңдайы чоғыл, вузха, тізең, таланттығ оол-хыстар кирек. Ол пӧгіннең МХАТ школа-студияның ӱгретчілері, регионнарҷа чӧріп, пастағы турны иртірчелер.
Итсе, саблығ ӱгредіг заведениезінің студенті полар алнында, оол-хыстарға хоза ікі турны иртібізерге кирек. Анда оларға ідӧк аймах жанрлығ литература произведениезінің ӱзіктерін хығырарға, сарнирға, теелбектенерге килізер. Ізенчебіс, Анастасия Медведева, прай турларны чахсы иртібізіп, пӱӱл кӱскӱзін МХАТ школа-студияда ӱгренерге пастир.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде