ХАРАТАС НАА ТИЛІС ЧОЛЫНДА
10.04.2018
Хабарлар
Тиліс чӧбі. Харатас городта ікі инвестиция проектін чуртасха кирерінең таныстылар Хакасия пазы Виктор Зимин паза Тиліс чӧбі президиумының кізілері.
ХАКАСИЯНЫҢ ТИЛІС ЧӦБІ ПРЕЗИДИУМЫ ТЕЕСТЕГІ ЧЫЫЛИИН ХАРАТАСТА ИРТІРДІ. ГОРОДСАР МИР ОРАМАЗЫНҶА КІРЧЕТКЕНДЕ, ЧОЛҒА ХАЙАРҒА КИЛІСКЕН. ОЙМАХТАР ИЛЕЕДЕ УЧУРАПЧАТХАН. АНЗЫ РЕСПУБЛИКА ПАЗЫ ВИКТОР ЗИМИННІҢ ХАЙИИН ІДӦК ТАРТТЫР.
АННАҢАР ОЛ ЧЫЫЛЫҒНЫ ПАСТААНДА ТАНЫХТААН. ВИКТОР ЗИМИН ИРТКЕН ЧЫЛДА ХАРАТАСТАҒЫ ЧОЛЛАРНЫ ТЫХТИРЫНА ПАЗА ПӰДІРЕРІНЕ 12 МИЛЛИОН САЛКОВАЙ ХОРАДЫЛҒАН ТІП ИСКІРГЕН, ПӰӰЛ ПУ КӦСТЕГЕ ГОРОДХА ІКІ ХАТИ КӦП АХЧА ПИРЕРГЕ ЧАРАДЫЛҒАН - 24 МИЛЛИОН САЛКОВАЙ.
- Мир орамазын тыхтиры кӧрілче бе? - сурған Виктор Зимин Харатас город пазының тоғызын толдырчатхан Ольга Леонтьевадаң.
- Анда оймахтарны ла тыхтиры кӧрілче, - нандырған Ольга Ивановна.
- Июль-августха проект пічіктерін тимнирге маңнанзаңар, аны кӧрілген тоғыстарға хозыңар, - чахаан Виктор Михайлович ағаа. - Пу чолха чон кӧп чӧрчеткені пілдірче, аннаңар аны хайығда тударға кирек.
Республика устағҷызы, чооғын аннаң андар узарадып, пӱӱл Харатаста иділер пасха тоғыстарны чарытхан. Кӧзідімге, городта истіг оңдайлар тӧстирінҷе муниципальнай программа пар полза, Харатасха 23 миллион салковай пирілер. Пу ахча тура хыриндағы паза кӧп чон чӧрчеткен орыннарны иптиріне парар. Пу хабазығ Ағбан городха пирілген хабазығнаң тиң арах.
- Піс Локомотивнай орама саринда суғ сетьтерін пӱдірерге киректелчеткенін ундутпинчабыс! - искірген Хакасия пазы Виктор Зимин. - 21 миллион салковайға турчатхан проектті чуртасха кирерін пӧкчелер республиканьщ финанстар, пӱдіріг паза ЖКХ министерстволары.
Паза пір килкім проект - городтың чылығ пирҷең сетьтерін Ағбандағы ТЭЦ-ке піріктірері. Проектті чуртасха кирер Сибирьнің генерирующай компаниязы.
- Харатас - Хакасияның иң кӱстіг промышленность кіні. Городта ӧткін тудыныстығ чуртағҷылар паза профессионаллар пар. Анзын мин хаҷан даа таныхтаам. Хайдағ даа сидіксіністерні тобырып, город кибірлерін паза тоғыс кадрларын хайраллап халған. Аннаңар пістің алныбыста пӧгін турча - наа тоғыс орыннарын тӧстирін айныдарға! - пу сӧстернең тоосхан чооғын регион пазы.
Тиліс чӧбінің ӱзӱриине пис сурығ сығарылған. Харатас город пазынын экономикаҷа паза азынада паалағ пирерінҷе орынҷызы Оксана Пакулева городтың 2012 - 2021 чылларға кӧрілген тиксі инвестиция планы хайди чуртасха кирілчеткеннеңер чоохтаан. Иң пастағызын, пу план городта инвестиция паза инфраструктура проекттерін чуртасха киреріне кӧстелген. Пу тусха кӧрілген 28 миллиард 800 миллион салковай инвестициядаң 15 миллиард 377 миллион салковай тузаланылған паза 1901 тоғыс орны тӧстелген. Инвестицияларның ӧӧн чардығын килкім предприятиелер кирчелер, че тоғыс орыннарын ӧӧнінде кічіг паза ортын бизнестегілер тӧстепчеттір. Іди 2012 - 2017 чылларда тӧстелген 1901 тоғыс орнының 1070-ын идінҷектер пиртір. Хазна инвестициялары чонға кирек паза инфраструктура проекттеріне тартылча. Алты чылға аймах проекттерге 719 миллион 220 муң салковай бюджет инвестициязы тузаланылған, хайзы 332 наа тоғыс орнын тӧстирге полысхан.
Оксана Пакулева городтың тиксі инвестиция планы полған на чыл нааҷылалчатханнаңар искірген. Андағ оңдайнаң читпестер паза сидіксіністер ілезіне сығарылча, хайзыларын пӧгеріне аннаң андархы тоғыс кӧстелче.
2018 - 2021 чылларда харатасчылар городында 13 миллиард 380 миллион салковайға 11 инвестиция паза 10 инфраструктура проектін чуртасха кирері кӧрілче, ол санда бизнестің инвестициялары 11 миллиард 700 миллион салковайға тиңнелер. Тӧрт чылға 1654 тоғыс орны тӧстелер. Иң килкім инвестиция проекттерін чуртасха кирерлер: «СУЭК- Хакасия» ООО, «Степной Разрез» хара тас компаниязы» АО (хара тас аниры тиліділер), «Харатастағы тыхтағ-механика заводы» АО (тоғызын алғыдар), «Сибирьнің МРСК-зы» - «Хакасэнерго» ПАО (городта чарытхы пирҷең сетьтерні алыстырар).
Иң чахсы оңдайлар кічіг паза ортын бизнестегілерге пирілче. Харатас пір профильліг городтар санына кирілген, аннаңар аның идінҷектерге хабазарына паза инфраструктура тӧстиріне «Моногородтар тилізінің чыындызы» коммерческай нимес пірігіс чахсы полысча. Пу фонд пір профильліг городтарда ӧӧн предприятие тоғызынаң пик палғалысты «ӱзерге» тӧстелген. Ол пӧгіннең ниме-ноо сығарызынаң айғазарға пӧгінчеткен идінҷектернің инвестиция проекттерін чуртасха кирерге полызығ пирілче.
Городтың тиксі инвестиция проектінде чонға кирек проекттер парох. Чылығ пирҷең сетьтерні наахылиры, чоллар, садығ-ӱтертіс кіннер, 1200 орынға школа, ипчілерге сыныхтанхаң тура пӱдірілері кӧрілче. Чииттерні городта тут халар пӧгіннең наа тӧстелер предприятиелерде киректелер специалисттер пічии тимнелген. Оларға чир участоктары тикке пирілер.
Харатас городтың экономика тилізі, чуртас оңдайлары чахсыланчатханын чуртағҷылар саны ӧсчеткені иң чахсы киречілепче. Анзы ідӧк инвестиция планында санға алылча. Іди 2012 чылда городта 75 муңҷа ла кізі чуртаан полза, пӱӱнгі кӱнде чуртағҷыларның саны 77 муңа чит парған. 2022 чылға чуртағҷылар санын 79 муң 600 кізее читіріп аларға пӧгін турғыс салтыр город устағ-пастаа.
Тиксі алза, инвестиция планы городтың парыстарын пілдірте ӧскірібізерге кирек. 2012 чылда город бюджеді 53,1% пос парыстарынаң пӱткен, 2021 чылға пос парыстары 74,3% тиңнелер тіп паалалча.
Хакасия пазы Виктор Зимин сан пирісті ситкіп искен, анаң позының сағыстарынаң ӱлескен:
- Городтың оңдайлары улуғ. Халғанҷы чылларға ол истіг оңдайларын чідір салған, че анзы тӱзеділер. Ӧӧні - сығарысха ла хайығ салбасха. полызығларны ідӧк тилідерге кирек! Кирек полза, пірее чылға чиит идінҷектерге налог льготаларын даа пирерге чарир. Санабызыңар, паалабызыңар хайдағ салтар пирер ол хаалағ. Килкім бизнес-проекттердең хорыхпаңар. Ноға чарабас Харатаста аквапарк пӱдірерге? Инвесторға кирек оңдайлар тӧстезе, ол пеер дее килер. Аннаңар пу программаны алғыдарға чӧптепчем. Хакасияның министерство-ведомстволарына Харатасты хайығда тударға чахыпчам.
Анаң республика пазы пазох чолларға теелген. Пу сурығ аны хаҷан даа сағыссыратхан паза сағыссыратча. Іди ол Харатастың чолларына чылда 24 тее, 36 даа миллион салковай пирзе, чахсы чоллар идіп аларына кӧп чыллар парыбызар тіп салтарға килген. Аннаңар пірее ікіҷе чыл изере хайди даа 100-ер миллион салковай пирерге чаратхан регион пазы. Пӱӱл ол ахчаны табарға чахаан орынҷызы Андрей Новосёловха, хайзы Хакасияның партнёрларынаң аймах социальнай проекттерхе хада-пірге тоғынардаңар чӧптезіглер апарар ӱчӱн нандырча.
Пу чарадығ алылған соонаң Тиліс чӧбі президиумының хайиина сығарылған ікінҷі сурығ хадох пӧгіл парған тиирге чарир. Ол Г. Тихоновтың орамазынаң пасти Р-257 (алында М-54 алай «Енисей») трассаа теере Советскай ораманы пӱдіреріне теелген. Тиксі проектке 37 миллион салковай киректелче. Чолдаң пасха анда ідӧк чарытхы тартылар. Хакасия пазы Виктор Зимин пӱӱл, чолны пӱдіріп, асфальт тӧзеп саларға чахаан, килчеткен чылда - чол хырин иптирге паза чарытхы тартарға.
Тиліс чӧбінің президиумы ікі инвестиция проектін чахсы паалаан паза инфраструктура тӧстирінең хабазарға чаратхан. «Боградтағы ГОК» ООО пусталарға пирбинчеткен паза пӱдірігде киректелчеткен аймах порағларны сығарарға пӧгінче. Тиксі инвестиция 20 миллион салковайға тиңнелче. Порағларны тимнирінде Хакас техническай институттың істезіглеріне тӧстенчелер. Предприятие кирек ниме-нооларны позы аныпчатханда, тимде порағларның паазы даа ниик полар. Порағлар килкім дее, алынҷа даа пӱдірігҷілерге килістіре хапталар. Сығарыста 20 наа тоғыс орны тӧстелер. Че республика пазын пір ниме чочындырған: проектті чуртасха кирер тус - 13 чыл. Мындағ кӧп тусха кӧрілген проекттерге Тиліс чӧбі хабазарға тың хынминча. Предприятие, тізең, техника суриин пӧгерге полыс пирерге сурынча. Виктор Зимин предприятие кізізіне проектті чуртасха кирер тусты хызырарға чӧптеен, тиксі проект чахсы паалаға турысхан.
Хай-хай килкім инвестиция проекті «Харатастағы агропромышленность комплексі» ООО-ның - 295 миллион салковайға колбаса, консерва сығарҷаң комплекс пӱдірии. Предприятие «Харатастағы» промышленность паркының резиденті полча, аннаңар аның хазна хабазиинаң тузаланҷаң оңдайлар пар. Іди тиксі инвестицияның 20% - предприятиенің ахчазы, 40% фондтаң тартылча, халған ахча кічіг паза ортын предпринимательство корпорациязы пастыра «6,5» программа полызиинаң асхынах проценттіг кредитке алылар. Промышленность комплексінде пастап консерва цеғы пӱдірілер, анаң - колбаса цеғы. Соонаң мал даа сохчаң цех пӱдірілер. Предприятие чылда 30 миллион банка консерва, 2400 тонна колбаса сығарар. Наа предприятиеде 190 тоғыс орны тӧстелер, город бюджедіне чылда 100-че миллион салковай налог кірер. Проект тузында чуртасха кирілзе, 2019 чылда тоғызын толдыра кӱзінең пастирға пӧгінче.
Сағам инвесторны «Харатастағы» промышленность паркында чарытхы пирҷең хоза линия чоғылы сағыссыратча паза предприятиее оор кирек, хайзын котельнай пирче. Промышленность паркының инфраструктуразын тилідері Тиліс чӧбі президиумының ӱзӱриине сығарылған халғанҷы сурығ полған. Сидіксіністерні Харатас город пазының орынҷызы Оксана Пакулева чарыт пирген. Аның сӧстерінең, промышленность паркы 2012 чылдох тӧстелген. Аның инфраструк-туразына пӱӱнгі кӱнге прай синдегі бюджеттердең 73,4 миллион салковай хорадылған. Че чарытхы пирҷең хоза линия тартылбаанда, килкім инвесторлар кірерге ынабинчалар, кічіг бизнестің, тізең, проекттерін чуртасха кирерге кӱзі читпинче. Аннаңар 2018 чылда промпаркта хоза чарытхы линиязы (39 млн салковай кирек) паза киизер 1% ле хомай ниме-ноо сығарчатхан котельнай (31,8 млн салковай) пӱдірілер. Пӱдіріге ахчаның 95% Моногородтар тилізінің фондынаң пирілер, 4% - республика бюджедінең, 1% - городтаң. 2019 чылда тимір чол тартылары кӧрілче.
- Харатаста кӧп наа ниме азарға чарир, ӧӧні - чуртағҷыларның кӧңнілерiн, сағыстарын пілерге, - чыылығны тоозып, таныхтаан Хакасия пазы Виктор Зимин. - Аның ӱчӱн город, республика ахча тоғынар оңдайларны тӧстирге кирек. Чарабас пір ле чолха парарға, кирек наа чолларны табарға, оларны посха сағын табарга. Хакасия Россияның чалғыс регионы, хайда кічіг паза ыраххы аалларны хайраллирынҷа паза тилідерінҷе регион программазын чуртасха кирче. Ідӧк Харатастың позының кӱстіг программазы тӧрізін. Мин Харатаснаң хадабын, пір ай пазынаң пазох тоғазарбыс.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде