КНИГА МАТЫРЛАРЫН ХООСТАПЧАЛАР
13.04.2018
Хабарлар
Кӧзідіг-марығ. Ағбанда «Чылтыс» кӧзідіг залында «Алтын кисточка» марығның чиңісчілеріне сыйыхтар читірілді.
Дарья ШИХОВЦЕВА ічезі Татьяна Леонидовнанаң хоозының хыринда.
Пу кӧзідіг-марығ «Чылтыста» ӱс неделя тоғынған. Анда Ағбандағы олған хоос школазынаң паза ортымах школалардаң палалар араласханнар. Кӧзідіге 185 тоғыс сығарылтыр. Улуғ кӧрімніг, иптіг хоостар пасхыстаң пасти ікінҷі хадылынға теере ілілгеннер.
Марығда 6-18 частығ олғаннар араласханнар. «Алтын кисточка» сілігдеңер, арығ сағыстаңар, чахсы чуртастаңар, ӧріністеңер сағынчатхан оолағастарны паза хызыҷахтарны піріктірче. Марығ араласчыларының чайаачы сағыстары, ибіркее кӧрістері пай паза алғым. Олар кізілерні, аң-хусты, чир-чайаанны, нымахтардаң алылған матырларны хоостапчалар. Аймах темаларға чарыдылған хоостарны паалаза, олғаннарның кӧрістері хаталбинча даа тиирге чарир. Кӧп олған хакас кип-чоохтарына паза кибірлерге чарыдылған тоғыстар чайап салтыр. Аймах литература, нымахтар хығырып, оларның матырларын хоостаптырлар. 8 частығ Даша Тохтобинаның хоозындағы стол ӱстӱнде чатчатхан арбуз уғаа киртістіг кӧрінче. Д.И.Каратановтың адынаң олған хоос школазының ӱгренҷізі Юлия Альжибаеваның «Аңҷылар» хоозындағы чалаң аттығ матырлары улуғ халыхта парчатханы кӧріндіре. Маша Дуюнның «Оливер Твист» диптих графика тоғыстарында хырыхха чағын кізі хоосталтыр. Инна Иптышеваның «Тӧреен чирімдегі таң чарии» чайаачы тоғызындағы ах хустары уғаа иптіг кӧрінчелер.
Кӧзідігнің салтарларын піліп аларға олғаннарның іҷе-пабалары, ууҷалары паза ӱгретчілері килгеннер. Палаларны марыға тимнеен ӱгретчілерге Ағбан город администрациязының чииттер паза спорт устанызының алғыстастығ пічіктері читірілген.
Хакасиядағы ипчілернің православие киртінізі пірігістің устанызының араласчызы Наталья Фитинаа чоох пирілген:
- «Алтын кисточка» марығ нинҷе тоғынча, анӌох кӧп хоосчылар тӧлі пайып одырча. Че аны иртірердеңер сағыс хаӌан-да тӧреен нооза. Ағбан городтың мэрі Николай Булакин чайаачы улусха удур парған.
Кӧзідіг-марығ пӱӱнгі кӱнге теере иртірілчеткені уғаа ӧріністіг. Амғы марығның тоғыстарын кӧре, олғаннар паза ӱгретчілер чахсы тоғыныбысханнарын таныхтирға кирек. Ӱгретчілер, палаларны хоостирға ӱгредіп, оларны сіліг нимее тартыларға кӧніктірчелер. Аның ӱчӱн алғыс сірерге. Андағ олған чуртаста хомай нимее тартылбас нооза.
Марығның жюри араласчылары хоостарны паалааннар, палаларға сыйыхтар тимнееннер. Хоосчы Елена Соколова пу марығдаңар чылығ сӧстерінең ӱлескен:
- Хоосчы пала ибіркізер азых паза арығ харағастарынаң кӧрче. Мағаа иң чахсы тоғысты таллап аларға сидік полған. Хайхастығ тоғыстар тимнел партыр.
Елена Соколова ӱгренҷі Елена Обединаа сыйых читірген. Ф.Е.Пронскихтің адынаң Ағбандағы хоос кӧзідіг залының директоры Алексей Ватутин чоох тутхан: «Пу марығ пӱӱл 17-ӌі хати иртірілді. Пу тусха аның позының кибірлері тӧстелген. Марығда араласхан палаларның хоостир узы чылдаң чылға ӧзіп одырчатханын кӧрчебіс. Олар пӧзік синде толдырылған тоғыстарын ағылчалар».
Марығ салтарлары хоостыра олғаннарға I, II, III орыннар пирілген. 6 - 9 частығлар аразында пастағы орыннар Альбина Мухинаа, Олеся Малинаа пирілген. 10 - 13 частығлар аразында чиңісчі Мария Дуюн полыбысхан. 14 - 18 частығларның мариинда пастағы орынны Ксения Дурновцева алған. Тиксі алза, 30-ча хоосчы пала ибзер сыйыхтығ нанған.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы