КИБЕЛІСТЕРНІ КЕМ ЧАХСЫ ХЫҒЫРЧА
13.04.2018
Хабарлар
Марығ. Ағбандағы школаларның ӱгренҷілері, орындағы писательлернің кибелістерін паза чоохтарын тыыда хығырып, постарының тимненіс-устарын кӧзіткеннер.
Марығ араласчызы Диана ТОДОЗАКОВА
Пастап мындағ марығлар алынҷа класстардағы ӱгренҷілер аразында иртірілгеннер. Анаң тиксі школа синіндегі марығда иң артыхтары махтаға сыхханнар. Оларға городтағы школалар аразында иртер марығда аралазарға чахылған. Оолағастарға паза хызыҷағастарға литература ӱгретчілері паза іҷе-пабалары полыс сыхханнар.
- Пу марығ ӱгренҷілерні книга хығырарға кӧніктірер пӧгіннең иртірілче. Халғанҷы туста пу сурығ прайзын тың сағыссыратча, - чоохтапча пу чӧрімнің пастағҷызы, Россияның Писательлер пірігізінің Хакасиядағы пӧлиинің кнес орынҷызы Юрий Иванов.
Мында килістіре сылтағ табылған.
- 2019 чылның март айында Россияның Писательлер пірігізінің Хакасиядағы пӧлии тӧстелгеннең 70 чыл толча. Аннаңар республикада пірее чапсых марығ иртірер сағыс тӧреен. Ӱгренҷілер аразында полчатхан марыға хозылып, орындағы писательлернің чайаачы тоғыстарын тыыда хығырар арға-мӧрій иртірерге чаратханнар. Іди палаларға Хакасиядағы писательлернің книга-чыындыларынаң танызар чахсы оңдай тапханнар.
Ағбандағы школаларның ӱгренҷілерінің марии Чайаачы олғаннарның кінінде ирткен. Анда араласчатхан ӱгренҷілерні ікі группаа чарыбысханнар: пасталығ класстарның паза улуғ класстарның ӱгренҷілері. Хайда даа марығ хазыр парғанын жюри кнестері хынығ чоохтааннар. Марығ чарғыҷылары пірее туста хайди поларын даа пілбинібісчеткен осхастар.
- Мағаа прайзынаң аар чуххан полар. Пасталығ класстарның ӱгренҷілері матап сіренгеннер. Піреезін часхарарға даа килісчең, - марығ хайди парғаннаңар чоохтаан жюри кнезі, олған писательі Юрий Черчинский.
Аның сӧстерінең, ӱгренҷілернен хада ӧӧнінде іҷе-пабалар паза ууҷалар килтір. Олар, иркеҷектеріне полызып, кибелістің алай чооғыҷахтың кизектерін чоохтап-сыбыхтап сыхчалар. Андағ оңдайнаң оолағасты алай хызыҷахты уламох тың путхабысчалар. Палаҷах хайди поларын даа пілбинібісче, пазын аар-пеер ле айландырча.
- Пастап чочып таа парғабыс. Марығда аралазарға 70 артиинаң ӱгренӌі пазын салғанын искіргеннерінде, орайға читіре одырарға килізер тіп сағынғабыс, - теен улуғ класстар ӱгренҷілері араласчатхан марығның жюри кнезі, писатель Юрий Иванов. Сынында марығда араласчатхан олғаннар саны андағ ла кӧп полбаан.
Улуғ класста ӱгренчеткен хызыҷахтар аразында хакас кӧгенектерін кис салғаннары сах андох харахха тасталчатхан. Олар хайди даа пос тілінең пазылған кибелістер, чоохтар тыыда хығырарлар тіп сағынғам. Че андағ ниме полбаан даа тиирге чарир. Итсе, марығ оңдайлары хоостыра ікі тілнең хығырары кӧрілген. Піреезі пос тілінең хығырарға харасхан. Че, туртуғып па, чӱрексініп пе, читіре чоохтан полбин салчатханнар. Анаң, кӧңнілерін пазын полбин, сценадох харах частарын чысхлап сыхчаңнар.
Олғаннар аразында одырчатхан ӱс ӧӧрее хайығ айландырғам . Ікізі хакас кӧгенектіг полған. Ӱзінҷізі оларны чиңіске кӧӧктірчеткен чіли тудынған. Прайзы Ағбандағы 22 № ортымах школаның 5 класстың ӱгренҷілері полтыр. Хайзы даа кибеліс хығырған, пасхаларының алнында хомай нимес тудынған. Че, ипти ле хығырчадып, туртух парыбысчатханнар. Аннаңар марығ чарғыҷылары Диана Канзычаковаа, Анастасия Чебодаеваа, Диана Тодозаковаа тың на пӧзік паалағ пирбееннер, чиңісчілер санына кирбееннер.
Марығ иртірген писательлер сыйыхтар кӧп ағылтырлар. Аннаңар орындағы чайаачы устарның кибелістерін, чоохтарын тыыда хығырған ӱгренҷілернің прайзы даа ибзер хуруғ холлығ айланмааны таныхталған. Пу марығда чахсы тимненіс кӧзіткен, чон алнында туртухпаан, кибелісті алай чоохты тыыда хығырған ӱгренҷілер республика синінде иртер марығда аралазарлар, Ағбан ӱчӱн турызарлар.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы