АНЫҢ ПОҒДАРХАЗЫ -ЧАЙААЧЫ ӰГРЕНҶІЛЕРІ
18.04.2018
Хабарлар
Ӱгретчідеңер сӧс. Галина Комарова Копьёв посёлоктағы чайаачы олғаннар кінінде тоғынча. Ол анда «Кізі паза тилекей» хоос студиянаң устапча.
Галина Михайловнаның тӧреен чирі - Орджоникидзе аймаандағы Майрастар аалы. Ол Тачеевтер хызы полча. Іҷезі Татьяна Павловна совхозта чонны тоғысха алҷаң пӧлікте істенген. Пабазы Михаил Степанович мал имҷізі полған. Сӧбіре пазы ӱгредиин Ленинградтағы аал хонии институдында алған. Андох ол хоостар чайирға кӧніккен. Ӧӧнінде ол партия чахиинаң коммунизмге чарыдылған плакаттарны тимнеҷең. Істеніс чолын пастаанда даа, ол кӧңніне кірчеткен киреен тастабаан.
- Мин пабамның чолын пасхам, неке, -тіпче Галина Михайловна. - Школада хоостар алай стенгазеталар марығлары полза, мин хаҷан даа пабамзар айланҷаңмын. Ол мағаа полыс пирҷең, олох туста сырларнаң тузаланарға ӱгретчең.
Галина Копьевтағы школаны тоосхан. Анаң Ағбандағы ӱгретчілер институдынзар кіріп алған. Биология паза химия факультедін таллап алған. Ол уроктарда иртірілчеткен аймах істезіглерге тың хынҷаң. Аннаңар палаларны ідӧк ӱгредерге сағынған. Паза студент тузында ағаа чайаачызын тилідерге чахсы оңдай пирілген. Ол ВУЗ стенгазетазының редакторы полған.
Пис чыл пазынаң, пӧзік ӱгредіг алып, Галина Михайловна Копьев поселоксар айланған. Че школада ағаа тоғыс чох полған. Чиит специалист Орджоникидзе аймаандағы ӱгредіг устанызында учебниктерҷе методист тоғызына кірібіскен. Тӱрчедең ол ирге парыбысхан. Анаң, пастағы пала тӧреен соонаң, ол комсомол райкомының хачызы полыбысхан. Аның пӧгіні, школаларҷа чӧріп, 14 часха читкелек ӱгренҷілернең тоғазарға, анаң оларны комсомолға алары полған. Галина Комарова ідӧк Пионерлер туразында (амды ол Чайаачы олғаннар кіні) улуғ тоғыс апарған. «Артек» паза «Океан» лагерьлерзер путевкалар тимнеҷең. Хакасияның аймахтарындағы даа лагерьлерінзер олғаннарны ал чӧрҷең.
1987 чылда Пионерлер туразының устағҷызы Тамара Никодимовна Марьясова Галина Михайловнаны ДПИ кружогын апарарға хығырып алған. Ол чайаачы олғаннарнаң іди ӧӧн тоғызы соонаң айғас турған.
Че ирткен чӱс чылның 90 чылларында комсомол райкомы чох иділген, пасха тоғыс таап аларға оой полбаан. Андада Галина Комарова позын аймах чирлерде сынаан, ортымах школада ӱгретчі полғанох.
1999 чылда, тізең, ол хоос уроктарын апарар ӱгретчілер курзын тоосхан. Анаң Копьевтағы чайаачы олғаннар кінінзер тоғысха кірген. Ана пу тустаң сығара Галина Михайловна Комарова олғаннарны пос чиріне хынарға паза аны аймах ӧңнернең хоостирға ӱгретче. Ол анда «Кізі паза тилекей» студия азып алған. Пӱӱл анда 50 азыра пала ӱгренче. Чайаачы олғаннар прайзы ӱгретчінің ӧӧн поғдархазы полчалар.
Пӱӱл 15 - 19 январьда Хакасияда «Минің тӧреен чирім: аның чир-чайааны, культуразы паза чоны» тиксі Россия марииның региондағы чардығы ирткен. Анда республиканың 13 ӱгренҷізі араласхан, ол санда Копьевтағы хоосчы олғаннар. Дарья Халевина «Живой символ малой родины» номинацияда I степеньніг диплом алған. Диана Балакина пуох номинацияда II степеньніг дипломны холға кирген.
«Гуманитарно-экологические исследования» номинацияда I степеньніг дипломға Дарья Тюрбеева турысхан. Пу ӱс хызыҷах - Галина Михайловна Комарованың ӱгренҷілері.
Копьевтағылар пылтыр даа чахсы чидіглерге читкеннер. 2017 чылда Н.Ф.Катановтың адынаң национальнай гимназияда «Ынархас чоллары» регионнар аразындағы 9-ҷы фестиваль ирткен. Анда «Минің чирім» («Минің регионым») марығ-кӧзідігде Копьев посёлоктағы чайаачы олғаннар I степеньніг диплом алып алғаннар. Олар хонҷых республикалардаң чыылысхан оолах-хызыҷахтарның хайиина «Минің чирім» экспозицияны сығарғаннар. Аның устағҷызы ідӧк Галина Комарова полған.
Пуох чылда Ағбанда «Хакасия таланттары» пастағы фестиваль ирткен. Анда хоза ӱгредігнең айғасчатхан улус ӱгренҷілерінен хада араласхан. Орджоникидзе аймаандағылар ол фестивальға сомнар паза ДПИ кӧзідіглерін тимнееннер. Олар ідӧк пасха араласчыларға хакас сувенирін тимнирінҷе мастер-класс кӧзіткеннер. Паза ыраххы аймахтаң Ағбанзар килген ӱгренҷілер пос холынаң ниме-ноо чайапчатхан республиканың пасха город-аймахтарындағы олғаннарнаң танысханнар. Ол фестиваль прайзына улуғ ӧрініс сыйлаан.
Таныхтирға кирек, Галина Комарова устапчатхан студияны тоосхан полған на ӱгренҷінің хоостар кӧзідии иртче. Анда ӱгреніп, оларның тоғыстары илееде чыыл парча нооза. Ағаа хоза, чайаачы кізінің ӱгренҷілерінің кӧбізі культура паза искусство институттарынзар кірче. Оларны тоозып, чахсы пілістіг дизайнерлер, ювелирлер, архитекторлар полыбысчалар.
Ирткен чыллар Галина Комароваа ідӧк уғаа танығлығ полған. 2016 чылда Копьев поселоктағы олғаннарны хоостирға кӧніктірчеткен ӱгретчі Хакасия правительствозының сыйиин алған. Алғыстас пічиин паза 50 муң салковайға сертификатты ағаа республиканың пасха иң чахсы ӱгретчілерінең хада Хакасия пазы Виктор Зимин читірген. 2017 чылда Галина Михайловнаа «Чайаачы ӱгретчі - чайаачы ӱгренҷі» республика фестивальында олғаннарнаң чахсы тоғыс апарчатхан ӱчӱн алғыстастығ пічік паза ӧнетін медаль читіргеннер. Пу фестивальның тӧстегҷізі - Хакасияның ӱгредіг паза наука министерствозы. Амды аның поғдархаҷаң ікі медаль. Пірсі ол ӱгредігнің аарластығ тоғынҷызы полчатханын киречілепче.
2014 чылда орындағы газета пастыра Орджоникидзе чирінің флагын паза гербін сағын таап аларына марығ чарлалған. Галина Комарованың проекті чиңісчі полыбысхан. Амды ол хоостаан герб паза флаг аймахтың ӧӧн танығлары полчалар. Чыл пазында алай пасха даа хакас ӱлӱкӱннерінде Орджоникидзе аймааның тадар ибі хыринда ол тоғыстарны кӧріп алар оңдай прайзының пар. Пӱӱл дее Чыл пазында ол герб чон хайиинда полған.
Галина Михайловна Комарованың чуртасха кирер сағыстары ам даа кӧп. Оларны чайаачы ӱгретчі хайди даа толдырар. Ынағ сӧбірезі ағаа хайдағ даа пастағда ӧӧн чӧлег полча.
Хызы Лида іҷезінің чолын таллап алған тиирге чарир. Ол Хызылчарда архитектура паза пӱдіріг институдында ӱзінҷі курста ӱгренче. Оолғы Евгений - Хызылчардох. Ол чоллар сыныхтаҷаң федеральнай агентствода тоғынча. Хада хонғаны Евгений Владимирович чарытхы палғалызында ӧӧн инженер полча.
Автор :
Александра СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде