НАА ОРАМАЛАРҒА - ЧАХСЫ ЧОЛЛАР
27.04.2018
Хабарлар
Кӱн сурии. Хакасия пазы Виктор Зимин тоғыс чорығынаң Харатассар паза Райковтар аалынзар чӧрген. Харатастағы наа орамаларда иртчеткен машиналардаң тозын на пырлапча. Анда чоллар пӱдірер тоғыс хыызында парча. Чолларға хайалығ сай урылтыр, аны грейдер тиңни кӱреп чӧрче пірее орыннарға унах тас урылча. Пірсі пірсінің соонча самосваллар сай тартчалар.
Ветчинкиннің орамазында Хакасия пазын республиканың транспорт паза чол хонии министрі Олег Тропин, финанстар министрі Ирина Войнова паза Харатастың администрация пазының тоғызын толдырчатхан Ольга Леонтьева удурлапчалар. Пу орамадағы чуртағчылар, наа чоллар пӱдірілчеткен ӱчӱн, Виктор Зиминге алғыс сӧстерін читірчелер. Ольга Леонтьеваның чооғынаң, тӧрт орамада сас чирі хыйа алылып, андар сай урылған. Ідӧк автомобильлерге гаражтар пӱдірер орын тимнелче. Че Виктор Зимин аннаң чараспаан. Хайди ол таныхтаан, анда нинче-де ле гараж турыбызар. Аның орнына машина турғысчаң кӧп хадыллығ орыннар пӱдір саларға кирек. Анда кӧп автомобильге орын табылар.
Чолларда сай чахсы типсел парза, анда асфальт тӧзирге чарир. Прай тоғысты табырах толдырыбызарға кирек полар. Хакасия пазының чооғынаң, ол тоғысха бюджеттең ахча позыдылар, аннаңар республика бюджедінеңер законға алызығлар кирілер. Пӱӱл Харатастағы паза Ағбан пилтірі аймаандағы чолларны тыхтирына 200 миллион салковай позыдылча.
Харатаста тузаланылбинчатхан иргі рынок туразын дзюдо федерациязына пирібістірлер. Анда кӱресчілерге улуғ спортзал полар. Тыхтағ тоғыстары хайди парчатханын кӧрерге Виктор Зимин чӧрген. Дзюдо кінінің устағчызы Вячеслав Лесков паза республиканың спорт министрі Виктор Струков Хакасия пазына хайдағ тоғыстар толдырыл парғанын кӧзіткеннер. Виктор Зимин оларға республиканың ӱс чылға кӧріл парған программазына кіріп аларға чӧп пирген. Аннаң кирек ахча позыдылар.
Амды Ағбан суғда пус ин парыбысханда, Виктор Зимин Ағбан пилтірі аймаандағы Райковтар аалындағы дамбаларны кӧрерге чӧрген. Анда Хакасия пазын удурлааннар регион устағчызының орынчызы Владимир Крафт, чир-чайаан ис-пайы паза экология министрі Юрий Соколов паза инженернай арачыланыстар управлениезінің директоры Валерий Доможаков.
Пус суғча хайди ингеннеңер, хайдағ сидіксіністер полғаннаңар паза майда улуғ суғ килеріне тимненістеңер Юрий Соколов искірген. Аның чооғынаң, пӱӱл пус суғча иптеп ле ин парыбысхан, суғ сині Абаза, Асхыс паза Хубачар хыринда кӧмес кӧдірілген, че ол чайылбаан. Амды прай службалар теестегі улуғ суғ килеріне тимненчелер, дамбаларда хайалығ тас резерві пилетелче. Гидрологтар вертолёттығ тағлардағы тайғаларда хар синін сыныхтирға учуғарлар.
Виктор Зимин хайдағ хоза полызығ киректелчеткеннеңер сурған, кирек полза, позынзар айланарға чахығ пирген.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде