ХАЙДА ПАРЫС, АНДА ХОРАДЫҒЛАР
27.04.2018
Хабарлар
Ӧӧркі Чӧпте. Депутаттар «Хакас Республиканың 2017 чылдағы бюджеді толдырыл парғаннаңар» закон проектін ӱзӱргеннер. Паза пу чыылығда Хакасияның 20І8 - 2020 чылларға кӧріл парған бюджеді ӧӧн сурығ полған.
Президиум чыылиин Хакасияның Ӧӧркі Чӧп кнезі Владимир Штыгашев иртірген. Кӱн суриинда ікі закон проектін кӧрері полған. Пастағызы Хакас Республиканың 2017 чылдағы бюджедіне теелген. Анаң депутаттар хайиина регионның 2018 - 2020 чылларға кӧріл парған хорадығлар сині сығарылған. Ол сан пирістерні комитет-комиссиялар устағчылары алнында республиканың финанстар министрі Ирина Войнова иткен.
- 2017 чылда республиканың парызы 24 миллиард салковайға читкен, хорадығлар, тізең, 25 миллиарды ас парыбысхан. Дефицит 1 миллиард 874 миллион салковайға тиңнелген, - искірген министр.
Ӧӧн парысты - 18 миллиард 48 миллион салковайны - республикадағы аймах пірігістер киргеннер. Хакасияның олаңай чуртағчыларының парызына салылған тиксі налог сині 4 миллиард 936 миллион салковайға тиңнелген тіп таныхтаан ол.
Хорадығлардаңар чоохтаза, пылтыр республика бюджедінің кӧп чардығы (70 %-ке сала читпинче) чал ахчазын тӧлирге паза олған садтарынаң школаларға позыдылған: 17 миллиард 776 миллион салковай! Узер миллиард азыра салковай чонның хазиин хайраллирына паза кӧп палалығ сӧбірелерге, ветераннарға кӧрілген тӧлеге парыбысхан.
2017 чылның 1 январьына республиканың хазнаа алымы 145 %-ке тиңнелген. Че пӱӱл 1 январьға хазна алнындағы ӧдізібіс 136 % пол парған.
- 10 чыл аразына мындағ танығлығ кирек пастағызын на пол парды. Пісті хазнаа алымыбыс ӧспинчеткені тың чӧпсіндірче, - чооғын узаратхан Ӧӧркі Чӧп кнезі Владимир Штыгашев.
Президиум чыылииның араласчыларын ідӧк 2018 - 2020 чылларға кӧрілген хорадығларға ахча кӧп пирілерінеңер искіріг ӧріндірген. Пу чылларда, федеральнай бюджеттең пасха, ахчаны Хакасиядағы хара тас анычаң пір предприятиенің ээзі пирер. Пастағы чардығын ол - 2 миллиард салковайны - мартта ысхан. 300 миллион Ағбан городтың бюджедінзер кірген, пасхазы - республика бюджедінзер. Халған 3 миллиард 150 миллион салковай июльда пирілер.
- Че андағ кізілер республикада чох полған полза, хайди поларчыхпыс? Аннаңар піске Хакасияда тоғынчатхан прай улуғ пірігістердең налог ахчазын ал турар оңдай табарға кирек. Кӧзідімге, Сойан-Сус ГЭС пістің регионға асхынах ахча кирче, - хатығ чоохтанған Владимир Николаевич.
Пу чыылығда сан пиріс хысхачах иділген. Комитет-комиссиялар устағчыларына амды пу ікі закон хоостыра ол - пу чӧптер пирер оңдай 24 майда пирілер. Ол кӱн Ӧӧркі Чӧп президиумының араласчылары халыхтар ӱзӱріглерін иртірерге чаратханнар.
Автор :
Александра СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде