ИҢ ЧАХСЫ ӰГРЕТЧІ ТАШТЫПТАҢ
04.05.2018
Хабарлар
Марығ. Ағбанда Н.Ф.Катановтың адынаң национальнай гимназияда «Иң артых хакас тілі ӱгретчізі-2018» республика марии ирткен.
Пӱӱл апрель айның халғанҷы кӱннерінде пістің республикада «Иң артых хакас тілі ӱгретчізі-2018» марығ тоғызынҷы хати ирткен. Иң маңат ӱгретчінің адына алты кізі турысхан: Татьяна Фёдоровна Казанаева (Ағбандағы Н.Ф.Катановтың адынаң национальнай гимназия-интернат), Лариса Ивановна Тинникова (Ағбандағы школа-лицей), Анжела Александровна Миягашева (Чоғархы Асхыстағы школа), Зинаида Петровна Токоякова (Чоғархы Пазадағы школа), Вера Максимовна Чебодаева (Улуғ Ноныптағы школа), Эльза Константиновна Майнагашева (Таштыптағы 1№ школа).
Марығ пасталар алнында алғыс сӧстерінең сценаа сыххан Хакасияның пазы Виктор Зимин. Ол прайзын мындағ ӱлӱкӱн иртчеткенінең алғыстаан паза Россия синіндегі ӱгретчілер мариинда пастағы орыннар алған хакас тілі ӱгретчілерін таныхтаан. Амды пӧзік чидіглерге читкен иң чахсы ӱгретчілерге 100 муң салковайлығ сыйых пир турардаңар молҷаан. Залдағы чон андағ хабарны ізіг айа сабызынаң удурлаан.
Анаң республиканың ӱгредіг паза наука министрі Лариса Гимазутина хакас тілі олимпиадазында чиңіс тутхан ӱгренҷілерге Аарластығ пічіктер читірген. Андағ сыйыхтарға турысханнар: Ағбандағы национальнай гимназия-интернаттың ӱгренҷізі Мария Кочелакова (ӱгретчізі Т.Ф.Казанаева), Шира аймаандағы Тоғыр чул аалдағы школаның ӱгренҷізі Кристина Абдина (ӱгретчізі Е.И.Кокова), Асхыстағы ортымах школа-интернаттың ӱгренҷілері Тарика Торбостаева (ӱгретчізі Р.К.Идимешева) паза Алиса Побызакова (ӱгретчізі И.А.Кольчикова), Чоғархы Асхыстағы школанын ӱгренҷізі Алина Бурнакова (ӱгретчізі Л.И.Бурнакова).
Марығ пасталыбысхан. Полған на ӱгретчі, сценаа сығып, чайаачы оңдайнаң позының чуртас чолынаңар, тоғыс оңдайларынаңар, тӧреен чирінеңер паза школазынаңар искірген. Марығлас аразында Хакасияның саблығ ырҷылары Ираида Ахпашеванаң Людмила Арыштаева паза Артур Марлужоков кееркестіг сарыннарынаң кізілерні ӧріндіргеннер.
Марығда араласчатхан ӱгретчілерге хада тоғынчатхан арғыстары, ӧӧрелері паза ӱгренҷілері полысханнар. Полғанының на позының хайдағ-да кӧрімніг оңдайы полған. Ӱгретчілер амғы туста олғаннарны хакас тіліне хайди тӱзімніг ӱгредіп алар сағыстарынаң ӱлескеннер, пістің хазнабыстың национальнай политикана паза ӱгредіг киреенңе законнарны пілчеткеннерін кӧзіткеннер. Аннаңар Хакасияның ӱгредіг паза наука министерствозындағы национальнай пӧліктің тоғынҷызы Анна Танбаева устаан чарғыҷылар ӧмезіне иң турыстығ ӱгретчіні таллап аларға сидік полған. Жюри марығда араласчатхан ӱгретчілерге сурығлар пирген, олар, тізең, пір дее туртухпин нандырғаннар.
Марығ тоозылғанда, ӱгретчілерні алғыстирға паза чиңісчіні адирға сценазар сыххан Хакасияның ӱгредіг паза наука министрінің орынҷызы Юрий Сагалаков. Ол прайзын хакас тілі ӱлӱкӱнінең алғыстаан паза пістің ӱгретчілер, Россия синіндегі марығларда аралазып, пастағы орыннар алчатханын таныхтаан. Анаң марығда араласхан полған на ӱгретчі алынҷа номинацияларҷа Аарластығ пічіктернең паза ахчалығ сертификаттарнаң сыйыхтатхан. Иң соонда Юрий Гаврилович «Иң артых хакас тілі ӱгретчізі-2018» марығның чиңісчізін адаан. Ол - Таштыптағы 1 №9 ортымах школаның ӱгретчізі Эльза Константиновна Майнагашева. Прайзы, чиңісчіні алғыстап, аны ибірібіскен, чахайахтар читірген.
Пӱӱл кӱскӱде Э.К.Майнагашева национальнай тіллер ӱгретчілерінің Россия синіндегі мариинда аралазар. Піс аның ӱчӱн «ағырарбыс».
Автор :
Илья ТОПОЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде