ӦРІНІС СЫЙЛАПЧАТХАН АКЦИЯ
23.05.2018
Хабарлар
Культура. Пӱӱл «Музейлер хараазы» чоннар аразыңдағы акцияның программазы аймах мастер-класстарнаң паза коңцерттернең хайхатхан.
Ирткен тынағ кӱннерінде Ағбан чуртағҷылары паза аалҷылары республиканың музей-культура кінінзер маңзырааннар.
Анда «Музейлер хараазы» акция полған. Чыл сай ол улуғ пайрам чіли иртче. Музей тоғынӌылары, кӧрігӌілерні ӧріндірерге пӧгініп, тӧреміл хынығ программа тимнепчелер.
Пастағы хадылында «Час ханат», «Юла», «Арабески» ӧмелернің араласчылары теелбектенгеннер. Олардаң ырах ниместе улуғлар паза кічіглер барабаннарнаң ойнирға, охчаадаң атарға ӱгренгеннер. Кӧзеелер залында Хакасияның пурунғы тархынынаң танызып аларға оңдай полған. Анда экспонаттар саны ӧс партыр. Стенелерде хайадағы хоостарның хобырғанын кӧрерге чарир. Ідӧк залда интерактивнай оборудование полызиинаң музейдегі хумартхылардаңар толдыразынаң піліп аларға чарир.
Кибір хоостыра «Музейлер хараазы» акцияда палалығ сӧбірелер ӧткін араласханнар. Кічіг частығ кӧрігӌілерге музейдегілер мастер-класстар тимнеп салғаннар. Хынзаң - хооста, хынзаң - картоннаң ракетаны чайа. Чітіг сағыстығлар кӱстерін викторинада сынааннар. Олғаннарның хайиин хакас ойыннары тартхан. Музей тоғынӌызы Максим Чертыковтың устаанынаң олар хазых, тобит ойнирға ӱгренгеннер. Че иң улуғ теес мобильнай планетарийзер полған. Прайзы ыраххы чылтыстарны кӧріп аларға килген полбас па.
«Музейлер хараазы» акцияда ағбандағылар 2010 чылдаң араласчалар. Че пӱӱл Хакасия пазы Виктор Зиминнің чарадиинаң ол пастағызын на тикке иртірілген. Аннаңар, соохты соох тібин, кізілер Л.Р.Кызласовтың адынаң чир-суғ ӱгренӌең музейзер палаларынаң хада килгеннер. Оларның санында Евгений паза Дина Тутатчиковтар полғаннар. Ирепчі «Музейлер хараазына» Соня паза Тася хызыӌахтарын ӧнетін ағылғаннар. Сӧбіре пазының кӧрізінең, палаларны кічігдең сығара культураа кӧніктірерге кирек.
Акция тузында кізілер музейде иртірілчеткен кӧзідіглернең танысханнар. Саблығ хоосчы Владимир Тодыковтың тоғыстары кӧрігӌілернің чӱреен кӧӧреткен. Графика хоостары, портреттер чыылған чонны хайхатханнар. Ідӧк чуртағӌыларны «С широко закрытыми глазами» наа кӧзідіг таңнатхан. Анда чайаачы ус Елена Соколованың паза музейдегі хоосчылар Владимир Агеевтің, Евгений Золотухиннің, Сергей Каштыревтің инсталляциялары сығарылған. «Учух чӧрчеткен тӱӱрлер», «Хуттарның омалары», «Сағыстар хайдар учухчалар?» тоғыстар чапсытчалар паза сағысха тӱзірчелер.
Музейде «Азых фондтар» проект чуртасха кирілче. Аны хоостыра музей чыындызынаң танызып аларға чарир. Тоғынӌылар кӧрігӌілерге, экскурсия иртіріп, экспонаттар хайди хайраллалчатханын, оларнаң хайдағ тоғыс апарылчатханын чоохтапчалар. «Музейлер хараазында» кізілерге «Этнография» чыындызында пол килерге оңдай полған. Музей тоғынӌызы Любовь Межекованың искіриинең, этнография экспонаттары тӧрт пӧлікте хайраллалча. Оларның пірсін кізілерге кӧзіткеннер. Анда улуғ стеллажтарда хакас чонның кибірли тігілген кип-азаан кӧрерге чарир. Экскурсияа килген улусха ӱс аймах тон тимнелтір. Пастағызы Хыдаттағы торғынаң чабылған, ікінӌізі чібекнең хоосталған, халғанӌы тонның моркамнары, ӱребезін тіп, хамнос теерізінең иділген. Пу пӧлікте тоннардаң пасха сикпеннер, сигедектер, кӧгенектер, пӧріктер паза маймахтар хайраллалча.
Экскурсияның ікінӌі чардығы поғоға чарыдылған. Аннаңар кӧрігӌілерге Мария Окунева чоохтап пирген. Кибірли салылған поғо амғы чазанӌыхтардаң тың пасхалалчаттыр. Таныхтирға кирек, «Азых фондтар» проект тӧреміл тоғынча, че эскурсияларға 30-64-11 алай 8-929-342-5084 телефоннарӌа азынада пазынарға кирек.
«Музейлер хараазы» акцияны чонға иртіріп, тоғынӌылар прай кӱстерін салғаннар. Че салтарлар ӧріндірче. Музейнің хабарлар пӧлиинің таниинаң, пӱӱл акцияда 4300 кізі араласхан, оларға 50-ӌе экскурсия иртірілген.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы