ХАРАТАС КӦДІРІЛІП ПАСТАПЧА
25.05.2018
Хабарлар
Мының алнында совет Ӱлгӱзі тузында пай чуртаан Харатас город амды пір дее азахха пик тур полбинча. Тиктең нимес Хакасия пазы Виктор Зимин Харатас городты позының хайиинаң позытпинча.
Пу тоғыс чорығында Хакасия пазы Харатас город хыринда пӱдірілчеткен Р-257 «Енисей» автомобиль чолында пастағы тоғазиин иртірген.
Аннаң хада хай пірее министрлер полғаннар. Пу наа пӱдірілчеткен чол пасха чоллар пірікчеткен орынның ӱстӱнде тахта оңдайынаң парыбысча.
Аны «Енисей» автомобиль чолларының федеральнай управлениезі пӱдірче. Мындағы чол тоғыстарын пӱдірігҷілер 2019 чыл тоозылғанда толдыр саларлар. Пу нааҷылалчатхан тӧрт полосалығ трасса Пригорск поселоктаң Ағбанға теере полар, Харатассар паза Ағбан пилтірі поселоксар хоза тартыл парыбызар. Ағаа хоза, Харатас городта прай даа чолларда тыхтағ тоғыстары парар. Ол киректерге Хакасия пазы В.Зиминнің чарадиинаң 100 миллионда салковай позыдылча.
Ікінӌі тоғазығ полған ээн турчатхан пӱдіріг хыринда. Харатас городтың чуртағҷылары ол пӱдіріг хоостыра таласханнар. Улуғ частығлар мында аал-хонии рыногы ползын тіп сағынчалар, чииттер, тізең, - спорт ӧргезі. Аннаңар Виктор Зиминге постарының проекттерін чарытханнар Хакасиядағы дзюдо федерациязының кнезі Вячеслав Лесков паза республика рыногының устағҷызы Сергей Новиков. Хакасия пазының кӧңні хоостыра кӧрінген, мында аал хонии рыногы полза, хорадылған ахча парыснаң табырах айланарҷых. Городха наа спорт ӧргезiн пӱдірерге кирек. Сағам пу пӱдірігні прай нааҷылирга нинҷе ахча сых парарын санабызарга кирек полча. Пу пӱдіріг хоостыра сурастырығ ам даа апарылар.
Анаң Виктор Зимин Харатас городта кӧп палалығ сӧбірелерге пирілген чирде чуртапчатхан кізілернең тоғасхан. Мында тӧрт орамада суғ киреенең ирееленчелер. Суғ колонкаларын пӱдір пирерін чуртағҷылар алты чылҷа сахтап парирлар. Пу тоғыстарны толдырарға 20 миллионда салковай кирек полча. Хакасия пазы пу сурығны пӱӱл кӱскее теере пӧгібізерге полыс пирерге молҷаан.
Харатас городта ол кӱнде «БелАЗ» харатас тартчаң автомобильлерні тыхтаҷаң кін азылған. Хакасия пазы пу пайрамда араласхан. Мындағ килкім предприятиеде пір муңа чағын тоғыс орны табылча. «БелАЗ» холдинг «Майрыхский» хара тас разрезінең 2015 чылдаң сығара хада тоғынарынаңар чӧптезіг иткен. Андада холдинг хара тас разрезіне тӧрт килкім «БелАЗ» сатхан. Амды сигіс автомобильге чӧптезіг иділген.
Аның соонаң Хакасия пазы Харатас городтың ӧӧн паркында полғанох. Город устағҷылары, паркты улам чазабызар ӱчӱн, федеральнай марығда араласчалар. Ол проект ирт парыбысса, городха 100 миллионда салковай киліс паргадағ.
Пір сӧснең, Харатас город, азахха турып, ӧңненіп пастапча. Хакасия пазы городтың тилиріне тӧреміл полыс турарға молҷаан.
Автор :
Илья ТОПОЕВ Сомнар Максим АХПАШЕВТИ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде