РЕГИОННАРҒА ААР ЧӰК ПОЛЧА
25.05.2018
Хабарлар
Ӧӧркі Чӧп. Депутаттар тоғынминчатхан улус ӱчӱн имнег страхованиезі сферазындағы тӧлеглерні федеральнай ӱлгӱлернің холына пирердеңер сурығны ӱзӱрерлер.
Владимир Штыгашев 23 майда Ӧӧркі Чӧп президиумының теестегі чыылиин иртірген. Ӧӧркі чӧптегілер пу чыылығда Хакасия пазы Виктор Зиминнің Россияның Хазна Думазынзар закон сығархаң пастағнаң сығардаңар чӧбін ӱзӱргеннер.
Хайди чарытхан Хакасияның юстиция паза региондағы безопасность киректерінңе министрінің тоғызын толдырчатхан Елена Кудинова, чоох парча тоғынминчатхан улусха хайди даа идер имнег страхованиезіне взнос ахчазын тӧлирінңе полномочиелерні федеральнай ӱлгӱлернің холына пирердеңер. Амғы туста хайди даа итчең имнег страхованиезі чыындызынзар тоғынминчатхан улус ӱчӱн ахчаны регионнар пос бюджедінең тӧлепчелер. Ол хорадығлар, тізең, чылдаң чылға ӧзіп ле одырчалар. Россияның финанстар министерствозының сананыстарынҷа халғанҷы 5 чыл аразына регионнарның тоғынминчатхан улус ӱчӱн тӧлеглернің тиксі сині 2,1 хати ӧс парған: 2012 чылда 298,9 миллиард салковай полған, 2017 чылда - 618,7 миллиард салковай.
Регионнарның бюджеттерінзер пу хорадығларны айландырып аларына хоза парыс ахчазын кирер оңдайлар чохтаңар, ол санда федеральнай бюджеттең хабазығ пирілбинчеткеннеңер, адалған полномочиелер аар чӱк полча. Елена Кудинованың искіриинең, республика бюджедінде пу хорадығлар 3,6 миллиард салковайға чит парған. Хакасия пазының чӧбінҷе, федеральнай бюджеттің пу кӧстегҷе хорадығларын нииктир ӱчӱн, Россияның Налог кодексінзер алызығлар кирерге чарир. Федеральнай бюджетсер парчатхан налог ставказын (организацияларның парысха налогтаңар чоох парча) 3 %-тең 7 % -ке теере ӧскірібізерге, республикаа халчатхан налог ставказын 17 %-тең 13 %-ке теере хызырыбызарға.
- Сурығ пілдістіг, піс ідӧк тее ол ахчаны федеральнай ФОМС-сар ысчабыс нооза, - таныхтаан Владимир Штыгашев.
Ӧӧркі Чӧп президиумы Хакасия пазының чӧбіне чарадығ пирген, че пу сурығ ӱрге тартыл парыбызарын таныхтаан. Пастап Россия правительствозы пу сурығҷа позының сағызын искірерге кирек, анаң - Федерация Чӧбі паза Законодательлер Чӧбі. Анаң на ол Хазна Думазынзар закон проекті чіли сығарылар. Че ӧӧні, хайди таныхтааннар Ӧӧркі чӧптегілер, киректі пастабызары.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде