«АЛТЫР» МОДА ТЕАТРЫНЫҢ СІЛІГ ХААЛАҒЛАРЫ
25.05.2018
Хабарлар
Культура. Ағбанда «Алтыр» мода театрының «Чайаачының алтын чібі» сан пирістіг концерті ирткен
Пу неделяда С.П.Кадышевтің адынаң культура кінінде чапсых ойын полды. Аны, тимнеп, чон алнынзар «Алтыр» мода театры сығарған. Чалахай иирге чон чахсы чыылысхан. Кізілер театр устағҷызы, модельер Марина Мамышева чайаан кип-азах чыындыларын кӧріп аларға килгеннер.
«Алтыр» мода театры 2010 чылда тӧстелген. Пӱӱнгі кӱнде ол Хакасия чуртағҷыларының иң хынчатхан ӧмелерінің пірсі полча. Театрдағылар аймах пайрамнарда ӧткін араласчалар. Марина Мамышева чайаан кип-азахты кӧзідіп, пістің абахайларыбыс хакастар культуразынаң пасха чоннарны таныстырчалар. Кӧзідімге, 2014 чылда театрның ӧмезі Сочиде Олимпиада азарында араласхан.
Пір чыл пазынаң сіліг, сылағай хыстар хакас чонның амғы тусха килістіре кип-азаан Канныда иртчеткен Россия искусствозының XVIII фестивальында кӧзіткеннер. 2015 чылда хакас абахайлары Хыдаттағы кӧрігҷілерні аптааннар.
Театр устағҷызы Марина Мамышева - изебі чох таланттығ паза тыс пілбес кізі. 2007 чылдаң пасти ол читі кип-азах чыындызын чайап салған. Пастағызы «Орыс гламур» адалча. Аны Марина Георгиевна студент тузындох тимнептір. Орыс чонның культуразына тӧстеніп тігілген кип-азахты ам даа кизерге чарир. Чоохтирға кирек, хакас модельер аймах-пасха синде иртчеткен марығларда аралазарға хынадыр. 2009 чылда пу чыындызын ол Н.Ламанованың адынаң модельер-хоосчыларның мариинда кӧзіткен. Андада Марина Мамышева кутюрье Вячеслав Зайцевнең тоғасхан. Саблығ кутюрье, таланттығ чир-суғҷыбыстың тоғызын пӧзік паалап, чайаачы чолын мыннаң мындар узарадарға чӧп пирген.
«Алтыр» мода театрыныц хыстары «Скифтер» наа чыындыны кӧзітчелер. Аның чооғын истіп, Марина Георгиевна «Алтыр» мода театрын тӧстеен.
Модельернің ікінңі кип-азах чыындызы «Возрождение» адалча. Пу тоғыстаң «Алтыр» театр пасталған тиирге чарир. Аны чайап, чиит ипчі хакас чонның кибірли тігілген кип-азаан матап істескен.
Мында аң теерізінең иділген худағайларның пӧріктерін, таналарнаң паза монҷыхтарнаң чазалған киптерні, сіліг сигедектерні кӧрерге чарир. Аймах ӧңніг торғыдаң тігілген кӧгенектерні модельер чібекнең хоостап сіліглебиндір, іди дее полза, олар морсымнығ кӧрінчелер.
«Той» чыынды залдағы чонның чӱреен уламох кӧӧреткен. Ол чыындыны хыстар ойын пастыра кӧзіткеннер, кӧзідіг тузында чиит хысты ирге пирібісчелер. «Тойда» хакас чонның на нимес, ідӧк туваларның кибірлерін сизінерге чарир. Кӧзідімге, ирге парчатхан хыстың пӧрии паза хай пірее сикпеннернің мойдырығы хонҷых чонның кип-азаанаң алылтыр. «Ымай іҷе паза алып хыстар» тоғысты тимнеп, Марина Мамышева алыптығ нымахтарны хығырған полар. «Алтырдағы» хыстар тулағалар паза узун кӧгенектер кис салып сыхханнар. «Торғы» паза «Стихии» чыындылар пасха оңдайлығлар. Азых иңніліг, сіліг ӧңніг кӧгенектер кизіп, пай-рамнарға даа чӧрерге чарир.
«Чайаачының алтын чібі» концерт тузында абахайлар кӧрігӌілерні Марина Мамышеваның наа чыындызынаң таныстырғаннар. Аны хакас модельер «Скифтер» адап салтыр. Марина Георгиевнаның таниинаң, наа чыынды пастыра ол Ӱстӱнзархы Сибирьнің пай тархынын кӧзіт пирерге пӧгінген. Хакас-Минсуғ ойымда скифтерге тагарларны санапчалар, Тағлығ Алтайда - пазырыктарны. Ол чоннар пір туста чуртааннар. Тувада «II Аржан» кӱрген скиф пигнің сыырады полча. Археологтарның тоғыстарын хығырып, модельер пурунғы чоннар хайди тонанғанын піліп алған. Ол туста кізілер пӧзік устығ пӧріктер кисчең полтырлар. Ідӧк скифтернің культуразы аң омаларынаң танығлығ. Парыстарны, кииктерні, чиңмелерні паза даа пасхазын чаа тиріглерде, чазанӌыхтарда кӧрерге чарир. Ол танығлар Марина Георгиевнаның «Скифтер» кип-азах чыындызында пар. Модельер кӧгенектерні аң омаларынаң чазап салтыр, хыстарның пастарында пурунғы чуртағӌыларның пӧріктері полған. М.Г. Мамышеваның наа тоғызы кізілерні чапсытхан.
Чоохтирға кирек, кӧрігӌілернең хада «Алтыр» мода театрының тоғызын ӧнетін комиссия паалаан. Аның кізілері, Марина Мамышеваның паза «Алтырның» тоғызына пӧзік паалағ пиріп, чайаачы ӧмені «Чон театры» аарластығ атнаң таныхтирынаңар чарадығ алған. Чалахай иирнің халғанӌызында Марина Мамышева чоох тутхан. Ол чыылған чонға, туған-чағыннарына улуғ алғызын читірген. Ідӧк чайаачы ус кип-азах чыындыларын тимнирге ахчанаң сыбыра полысчатхан ӱчӱн Хакасия пазы Виктор Зиминні алғыстаан. Концерт тоозылғанда, кибір хоостыра фотосессия пасталыбысхан. Прайзы «Алтырдағы» хыстарнаң сомға суурынып аларға сағынған.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде