АЗЕРБАЙДЖАННАР КУЛЬТУРАЗЫНАҢ ТАНЫСХАНЫ
29.05.2018
Хабарлар
Чоннар аразындағы хайызығлар. Ағбанда азербайджаннар культуразының фестивальы иртті.
Министр Михаил ПОБЫЗАКОВ пайрамнаң алғыстапча.
Пістің республикада 100 артиинаң нация чуртапча. Полған на чонның позының оңдайлары, кибірлері.
Чоннар аразындағы палғалысты тыыдарға пӧгініп, ӱлгӱлер «Хакасияның региондағы политиказы» программаны чуртасха кирчелер. Пу кӱннерде ол программа хоостыра Ағбанда азербайджаннар культуразының фестивальы полды. Аны Хакасиядағы азербайджаннар диаспоразы республиканың национальнай паза территориальнай политика министерствозы полызиинаң иртірген.
Азербайджаннар диаспоразы 2016 чылда кӱскӱзін тӧстелген. Аннаң Ильгар Абдуллаев устапча. Пірігіс кнезінің искіриинең, пістің республикада ікі муң артиинаң азербайджан чуртапча, пӱӱнгі кӱнде диаспоразар 570 кізі кірче. Пірігісті олар удур-тӧдір полызызарға, чииттерге пасха чоннар аразында посты иптіг тудынарға ӱгредер пӧгіннең тӧстееннер. Диаспораның кізілері аймах пайрамнарда ӧткін араласчалар. Кӧзідімге, пылтыр олар хакас ойыннарының фестиваль-мариинда кӱресте ікінҷі орынға сыхханнар.
Фестиваль пасталар алнында аалҷыларның чапсых кӧзідігнең танызып алар оңдай полған. Мында пурунғыдаң хайраллалған ідіс-хамысты, кип-азахты, азербайджаннар культуразына чарыдылған кинделерні, дисктерні, аймах сувенирлерні кӧрерге чарир полған. Азербайджан чирі кибістерінең тилекейге сабланча, хазнадағы полған на аймахтың позының хоозы. Кибістер кӧзідіге сығарылбаан даа полза, экспозицияда оларға чарыдылған илееде кинде полған.
Экспонаттар аразында саз паза тӱтек чон кӧг тиріглері полғаннар. Саз - 4 - 8 хыллығ музыка инструменті. Аның полызиинаң азербайджан хайҷылары - ашугтар - чон сарыннарын толдырҷаңнар. Тӱтек - ӱбӱрҷең кӧг тирии. Аннаң мал хадарчылары ойнирға хынңаңнар.
Фестиваль пайрамни азылғанда, Хакасияның национальнай паза территориальнай политика министрі Михаил Побызаковха сӧс пирілген. Ол Хакасия пазы Виктор Зиминнің адынаң тӱрк тілліг чонны пайрамнаң алғыстаан, азербайджаннар Хакасия экономиказының тилізіне улуғ хозым итчеткенін таныхтаан. Пӱӱнгі кӱнде оларның кӧбізі идінҷектер, фермерлер полчалар, чол хониинда маңнаныстығ істенчелер. Министрнің сӧстерін залдағы чон ізіг айа сабызынаң удурлаан. Михаил Анатольевич диаспораның иң ӧткін араласчыларына алғыстас пічіктерін читірген. Аарлығ аалҷыларның аразында республиканын Улуғлар чӧбі президиумының кізізі Валерий Доможаков паза «Чосон» кореецтер диаспоразының кнезі Олег Хегай полғаннар. Олар ідӧк чыылған чонны пайрамнаң алғыстааннар паза улуғ нимес сыйыхтар читіргеннер.
Чон культуразының тании ас-тамах полча. Азербайджаннарның 300 артиинаң национальнай чиис саналчаттыр. Фестивальға килген улустың саблығ долманы, татхыннығ пахлаваны, шакербураны, бадамбураны чиир оңдай полған. Долманы хой идінең тимнепчелер. Оох унадылған итті виноград пӱрлеріне ораабысчалар. Ідӧк Кавказтағы чонның пайрамы плов чох иртпинче. Тадылығ чиистеңер чоохтаза, аны тимнеп, азербайджан ипчілері хайхатты, сахарны паза хузухтарны пір дее харанмин
салчаттырлар.
Азербайджаннар культуразының фестивальы улуғ нимес кафеде ирткен. Аның ээзі-Руслан Байрамов. Аның сӧбірезі Хакасиязар кӧскенде, ағаа ікі час полтыр, аннаңар Руслан позын мындағы чуртағҷаа санапча. Чиит оол пӧзік ӱгредігні Москвадағы вузта алтыр. Аның чооғынаң, диаспорадағылар тӧреен чирінзер удаа чӧрчелер, туған-чағыннарынаң палғалыс тударға кӱстенчелер. Азербайджандағы аалларда ам даа пурунғы кибірлерге тудынчаттырлар. Сизінгенде, чиит оолға анзы кӧңніне тың на кірбинче, аннаңар ол мыннаң мындар Хакасияда ла чуртирға пӧгінче. Чахсы ӱгредігліг, ырах кӧрістіг чииттер пістің республикаа киректер.
Чоохтирға кирек, 2018 чыл Хакасияда аймах чоннарның фестивальларына пай полар. Августта пос культуразынаң чуваштар таныстырарлар. Оларның соонаң мындағ фестивальны немецтер, поляктар, кореецтер иртірерлер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде