РОССИЯНЫҢ ХЫРЫҒЛАРЫ ІЗЕСТІГ ХАДАҒДА
30.05.2018
Хабарлар
Погранслужбаа - 100 чыл. 28 майда Россияда Пограничник кӱні таныхталған. Пӱӱл пограничнай войсколарға 100 чыл толча. Ағбанда Чиңіс паркындағы Успас от хыринда Пограничник кӱніне чарыдылған пайрамнығ мероприятие ирткен, ідӧк С.П.Кадышевтің адынаң культура кінінде чыылығ паза концерт полған
УСПАС ОТ ХЫРИНДАҒЫ МИТИНГТЕ
Пограничник кӱні алнында 27 майда 19.00 часта Хакасияның чааӌылар комиссариадының площадьында «Боевой расчёт» мероприятие ирткен. Кибірге кір парған оңдайнаң андағ мероприятие военкоматта чыл сай иртірілче. Пу туста Россияның прай заставаларында пограничниктерге хазна хырығларын хадарарға приказ пирілче, анаң пограннарядтар службаа сыхчалар. Аннаңар военкоматта Хырығлар хадағӌызы кӱні алнында андағ мероприятие иртірчелер.
28 майда Ағбанда Чиңіс паркынзар иртеннең ноған пӧрік кис салған кізілер чыылысчатхан. Анзы мының алнында хазна хырығларында служба апарған пограничник-ветераннар полған. 10.00 часха площадьта кізі тол парған: Успас от хыринда стройнаң юнармеецтер, кадеттер, олғаннарның чаа-патриот пірігістері стройға турыбысханнар. Ідӧк пограничник-ветераннар площадьтың пасха саринда турғаннар.
«Смирно!» команда истілгенде, Россияның хазна флагы, ФСБ-ның пограничнай службазының знамязы площадьсар кирілген, хазна гимні толдырылған соонда пайрамнығ митинг азылған. Пограничник кӱнінең алғыстирға Хакасия пазының пастағы орынӌызының тоғызын толдырчатхан Андрей Новосёлов сыххан. Ол чыылған чонны Пограничнай службаа 100 чыл толчатханынаң алғыстаан. Хайди ол таныхтаан, чыл сай пу кӱнде пограничниктер Успас от хыринда чыылысчалар.
Чаада ыырҷыны пастап олар удурлапчалар, хатығ чаалазығларда олар, тӧдір пазынмин, чуртастарын пир салчалар.
Оларға хачанға даа сабланыс полар. Амғы тӧлге погранвойсколарның чахсы кибірлерін хайраллирға кирек.
Хакасияның Ӧӧркі Чӧп кнезі Владимир Штыгашев, чонзар айланып, прайзын ӱлӱкӱннең алғыстаан:
- Аарлығ нанҷылар! Мин 1960 чылда Хызылчардағы алюминий заводының площадьында полғам. Анда погранвойсколарньщ 42 чылын таныхтапчатханнар. 3 муңча кізінің аразында пір муңча кізі ноған пӧріктіг полған. Пограничниктер алюминий заводтарын, ГЭС-тарны пӱдір салғаннар. Россия президентінің чахиинҷа пістің хазна 5-6 чылға табырах тиліп парыбызар. Анзын піс позыбыс хараанаң кӧрербіс. Прайзына пик хазых, часка, чахсы чуртас алғапчам. Ӱлӱкӱннең!
Пограничник-ветераннарның чылығ тоғазии.
Ідӧк пайрамнығ чыылығда алғыстас сӧстерінең чоох тутханнар пограничник-ветеран, отставкадағы полковник Валерий Кириллов, «Ағбан» аэропорттағы пограничнай посттың пастығы, капитан Денис Гладкий. Хазна хырығларын хадарып, чуртастарын пир салғаннарны сағысха киріп, пір минута сым турары чарлалған. Алтай паза Хакасия республикаларның саблығ артизі Артур Марлужоков пограничниктернің махачызына чарыдылған сарын толдырған. Устағҷылар паза прай чон мемориал комплексінзер веноктар, чахайахтар салғаннар. Чааҷылар автоматтардаң киизер, салют пиріп, атханнар. Чыылысхан пограничниктер площадьча, Успас от хыринча маршнаң ирткеннер.
Мероприятие иртірілчеткен туста срочнай службаны Ыраххы Востоктағы хырығларда ирткен Сергей Черпаковнаң чоох алысхабыс. Ол ам Хакасияча УФСИН-ның 35-чі колониязында хадағҷы полып істенче. Службаны ол Приморскай крайда Ханка кӧл хыриндағы Камень-Рыболов посёлокта орныхчатхан 4-ҷі пограничнай отрядтың заставазында ирткен. Пайрамнығ митингке ол оолағынаң хада килтір. Анзы чааҷыларзар уғаа чапсып кӧрчеткен.
ПАЙРАМНЫҒ ЧЫЫЛЫҒДА
С.П.Кадышевтің адынаң культура кінінің улуғ залында чон тығырама полған. Оларға пограничнай службаның матыр тархыны экранда кӧзіділген. Хазнаның паза республиканың гимннері толдырылған соонда сценазар Хакасияның пазы Виктор Зимин сыххан. Ол чыылған чонзар алғыстас сӧстерінең айланған:
- Пӱӱн піс прай хазнанаң хада ФСБ-ның пограничнай службазының 100 чылын таныхтапчабыс. Прайзын андағ танығлығ кӱннең алғыстапчам! Піс хазнаның хырығларын хадарчатхан чааҷы-арачылағҷыларны пӱӱн чеестепчебіс. Хакасияда пограничнай службада полғаннар уғаа кӧп, мында прайзы чыылыспаан. Кӧп ветеранны муниципалитеттерде чеестепчелер. Алынҷа алғыстирға сағынчам ӧткін тоғыс апарчатхан республикадағы погранслужба ветераннарының халых пірігізінең устапчатхан Виктор Иванович Козловты. Пограничниктернің службазы оой нимес. Олар пастағызын ыырҷыны удурлапчалар. Брест сібеезінде, хазнаның ӱстӱнзархы хырығларында, Ыраххы Востокта, Даманскай олтырыхта пограничниктер махачы чааласханнар. Оларның аразында пістің кӧп чир-суғчыбыс полған. Чуртастарын пир салғаннарға хачанға даа сабланыс! Ветераннарға - ӱр чуртас! «Ағбан» аэропортта пограничниктернің посты тоғынча. Оларға служба ӱчӱн алғыс! Ӱлӱкӱннең!
Виктор Михайлович пограничник-ветераннарға чииттернең чаа-патриот тоғызын апарчатхан ӱчӱн алғыстас пічіктерін читірген.
Чыылығда ідӧк алғыстас сӧстерінең сценазар сыхханнар Хакасияның Ӧӧркі Чӧп кнезі Владимир Штыгашев, ФСБ-ның Хакасияча управление пастығы Олег Алексеев, Хакасияның чаачылар комиссары Виктор Максимчук паза даа пасхазы.
Республикадағы чаа-патриот клубтарының чииттері постарының устарын кӧзіткеннер, филармония тоғынҷылары чонны сарыннарынаң ӧріндіргеннер.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде