ТӦРЕЕН ЧИРІҢЕРНІ УҢДУБАҢАР
30.05.2018
Хабарлар
Чир-суғҷылар. Хакасияның пазы республиканың Санкт-Петербургта ӱгренчеткен студенттерінең тоғасхан.
Санкт-Петербургта Хакасияның пазы Виктор Зимин, пістің республикадаң парып, андағы аймах ӱгредіг учреждениелерінде ӱгренчеткен студенттернең тоғасхан. Мероприятие, хайзында 90-ҷа чиит кізі араласхан, Россияның сцена искусствозының хазна институдында ирткен. Тоғазығда ідӧк аалҷылар Хакас Республиканың тӧреміл кізізі - Хакасия пазының орынҷызы Андрей Соболенко, Хакасияның культура министрі Татьяна Чаптыкова, ӱгредіг паза наука министрінің орынҷызы Юрий Сагалаков, Мариинскай театрының солизі Татьяна Павловская паза актерлар узынҷа ӱгретчі, Хакасияның саблығ культура тоғынҷызы, профессор Владимир Норенко полғаннар.
Пастап чайаачы специальностьха ӱгренчеткен студенттер аймах-пасха жанрлығ нинҷе-де номер кӧзіт пиргеннер. Анаң тоғазығ араласчыларының республика устағҷызынаң чоохтазып алар, сурығлар пирер оңдай полған. Чииттер тӧреен республикада чуртас-экономика кирее хайди парчатханнаңар, ӱгредіг соонаң Хакасиязар айланзалар, тоғыс табылар ба тіп сурығлар пиргеннер.
Виктор Зимин республикада оларны хаҷан даа сағыпчалар, оларнаң поғдархапчалар тіп таныхтаан. Тоғыс орыннары парох, чурт пирерінҷе сурығ пӧгілібӧкче. Олох туста чиит улус Сибирьзер айланарға сағынмаза, атархас чох полар тіп искірген. Хайди таныхтаан регион устағҷызы, таланттарнаң ӱлезерге кирек. Че олох туста Виктор Зимин чииттерні тӧреен республиканы ундубасха хығырған - концерттернең, мастер-класстарнаң паза семинарларнаң кил турарға.
Республика пазы хакас студенттернің ӱгретчілеріне алғызын читірген. Алынҷа Виктор Зимин Владимир Васильевич Норенконы таныхтаан, ол нинҷе-де тӧл Хакасия артисттерін ӱгрет салған. Таныхтирға кирек, студенттернің кӧбізі кӧстегліг орын хоостыра ӱгренче. Анзы Хакасия правительствозы паза Санкт-Петербургтағы театр искусствозының хазна академиязы аразында иділген чӧптезіг хоостыра иділче.
- Таныхтирға кирек пасха даа преподавательлерні, хайзылары пістің республиканың таңдағызына ӱгредіг пирчелер. Прайзына, кем сірерні ӱгретче паза чуртасха тимнепче, алғыс пу улуғ кирек ӱчӱн. Постың чӱрек чылиинаң паза кӱзінең ӱлесчеткеніңер ӱчӱн, - теен Виктор Зимин.
Чиит оол-хыстар республика устағҷызына алғыс сӧстерін читіргеннер хайығ салчатханы, хабасчатханы паза мындағ чапсых тоғазығ иртіргені ӱчӱн.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде