ПОС ТІЛІН ХАЙРАЛЛАП - ТИЛІДІП
01.06.2018
Хабарлар
Хығырығӌының сӧзі. Пу наада «Хабар» газетаның редакциязынзар Шира чуртағӌызы Татьяна Субраковадаң пічік кірген.
Пу пічиимні «Хабар» газетаны сығарчатхан чир-суғҷыларыбысха чарыдарым килче. Полған на неделяда почта харчағында газетабыстың наа номерлері полча, че, піске читкенҷе, хайдағ улуғ чол иртче газетабыс.
Минің сағызымнаң, «Хабар» газетаны сығарчатхан улус пістің чонға, республикабысха уғаа улуғ тоғыс итче, хакас тілін тилідеріне паза хайраллирына прай кӱзін салча.
Піди кӧрзе, хакас газетазының сығарызы амғы тустағы технологиялардаң пір дее соона халбинча. «Хабарның» позының сайты пар. Газетаа Интернет пастыра даа пазынарға чарир, іди ол улам ниикке турча. Ол саринаң Сергей Майнагашев (поэт Сибдей Том) улуғ тоғыс апарча. Сергей Александрович тіл сурығларын ӧтіре пілче паза оларға сибер хайча, аннаңар тӧреен тілібіснең тузаланар оңдайларны Интернет пастыра алғыдарға кӱстенче, ол санда газетаа электроннай оңдайнаң пазындырып.
Газетада аймах статьялар республиканың чуртазын прай саринаң кӧзітчелер: ӱлӱкӱннердеңер, аалдағы чуртастаңар, аймах танығлығ кӱннерге удур кӧп статья пазылча. Чоныбыстың саблығ, турыстыра кізілерінеңер, чуртас чолларынаңар, чииттернің чидіглерінеңер газетабыстың хабарҷылары тӧреміл пасчалар. Аның страницаларынаң піс, хығырығҷылар, чайаачы устарыбыснаң чағын танысчабыс.
Ідӧк пазарым килче Надежда Лазаревна Фрузорова-Соломачевадаңар. Ол Шира аймаанда культураны тилітче. Уғаа ӧткін ипчі. Неделя сай тоғыс соонаң алай тынағ кӱннерінде Шира аймаандағы аалларҷа позының машиназынаң газета таратча. Ол Ширада, Хара кӧлде,Чоохчылда, Сеектігде, Тоғыр чулда чуртапчатхан чонға «Хабар» газетабысты читірче.
Улуғ алғызым читірчем «Хабар» республика газетазының ӧӧн редакторы Радион Сунчугашевке паза редакцияның прай ӧмезіне газетабысты пӧзік синде сығарчатхан ӱчӱн. Полған на хакас сӧбірезін газетабысха пазынарға хығырчам.
Автор :
Улуғ аарласнаң Татьяна УЛТУРГ АШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы