ПАЛА ПАСХА ПОЛБИНЧА
06.06.2018
Хабарлар
Олғаннарнаң тоғыс. Ольга Михайловна Майнагашева Кызластағы реабилитация кінінде воспитатель полча.
Харатастағы «Республикадағы чазы читкелек олғаннарның социально-реабилитация кінінің» пӧлии Асхыс аймаандағы Кызлас аалда орныхча. Ольга Майнагашева анда он чыл тоғын парир. Пӱӱнгі кӱнде аның ортымах педагогика ӱгредии пар, че ол, пілістерін алғыдып, пӧзік ӱгредіг алча.
Ольга Михайловна школаа чӧргелек палаларнаң тоғынча. Аның группазында 12 олған, олар 3- 6 частығлар. Че группаа кірчеткен палалар саны сыбыра алысча тіпче воспитатель. Удаа кӧп олғаннаң тоғынарға килісче.
Реабилитация кінінзер уйан паза чуға чурттығ сӧбірелердең палалар кір парчалар. Оларны ӱгретчілер, воспитательлер, имҷілер, психологтар кӧрчелер. Чарым чылҷа анда чуртап, хазыхтарын пиктеп алып, олған-узах іче-пабаларынзар айланча.
- Олғаннар піссер Асхыс, Таштып, Пии аймахтарынаң паза Абаза городтаң кірчелер, - чоохтаан О.М.Майнагашева. - Халғанӌы туста Абазадаң кӧп пала кил сыхты. Таныхтирга кирек, піссер орыс тілін пілбинчеткен олғаннар даа кірчелер. Мындағ оолах-хызычахтарнаң алынча тоғынарға килісче. Ӧӧнінде кічіг ааллардаң хакас тілліг палаҷахтар килчелер.
Пірсінде Пилтірдең килген орыс тілін пілбинчеткен пала хайхаттыр. Мындағ улуғ ааллардаң ӧӧнінде орыс тілліг палалар килчелер нооза. Хакас тілліг олғаннаң пос тілін пілчеткен специалисттерге тоғынарға кирек. Че Кызластағы кінде хакас-орыс тілін чахсы пілчеткен ӱгретчі-воспитательлер тоғынчалар. Реабилитация кінінде воспитательлер палаларға ибіркее кӧнігерге тіл пастыра чахсы полысчалар.
Реабилитация кінінзер хоостирға пілбинчеткен, телевизор пір дее кӧрбеен, самнахты холда тут полбинчатхан палалар даа кірчеттір. Воспитательлер оларны иб аразындағы олаңай кирексіністерге ӱгретчелер.
Полған на хаалағны ипти иртірерге пик тыстаныс киректелче. Че мында паланың пырозы чоғыл, анзы улуғлары хайығ салбаанынаң палғалыстығ.
Ӱгретчілер іче-пабаларнаң кӧп тоғыс апарчалар. Олар даа палаларына телефоннаң сығдыратчалар алай тоғазарға кил парчалар.
Мындағ палаларнаң ӧнетін программа хоостыра тоғынчалар. Ӱгредіг иртірілче, ойыннар апарылча. Хайдағ ла ойначахтар анда чоғыл! Хай пірее олған чуртазында ойначах таа холында тутпаан полар. Мында, тізең, оларға хайдағ хынза, андағ ойначахнаң ойнирға чарир.
Интернатта тоғынчатхан улустың тоғызы 7.00 частаң 22.00 часха теере парча. Ольга Михайловна Кызластаң ырах ниместе орныхчатхан Хойза пилтірі аалдаң тоғысха чӧрче. Аның апсаа паза ікі оолағазы ічезін ибде кӧрбиндеечелер тиирге чарир. Иртен иртӧк тоғысха киліп, орай иирде ле ол ибінзер парча. Чон палазын, азырап, узирға чатыр салза ла, сӧбірелерінзер айланчалар. Іди кӱннең кӱнге оларның тоғызы парып одырча.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы