НОО ДАА ТУСТА ПОЛЫЗАРҒА КИЛЧЕЛЕР
19.06.2018
Хабарлар
Ӱлӱкӱн. Имнег тоғынӌызы кӱніне чарыдып, ирткен неделяда Ағбанда драма театрында кізілернің хазиин хайраллапчатхан улусты алғыстааннар.
Сыйыхха турысхан имӌілер Татьяна ДОМОЖАКОВА паза Валерий ЧОЧУМАКОВ
Имҷілерні, имнег тоғынчыларын профессиональнай ӱлӱкӱннең алғыстап, пайрамны Хакасия пазы Виктор Зимин асхан.
- Хакасия правительствозы паза республиканың прай чуртағҷылары адынаң сірерні профессиональнай ӱлӱкӱннең алғыстапчам! Чонға туза ағылчатхан профессияны таллап алған ӱчӱн сірерге прайзыңарға алғыс ползын. Иң не нандырығлығ тоғыс толдырчатхан ӱчӱн сірернің алныңарда пазыбысты тӧбін тутчабыс, - теен Виктор Михайлович.
Хайди ол таныхтаан, республикада халғанчы чылларда кӧп имнег учреждениезі пӱдірілген, имнег тураларының материально-техническай базазын тыыдарға кӱстенгеннер. Іди имнег киреенде илееде тоғыс иділген сылтаанда, ӱрепчеткен кічіг палаларның саны 40 %-ке хызырылған. Алында республикада чӱрек-тамырлар кіні тоғынар тіп киртінерге сидік полған. Ам наа кінде наа имнег технологиялары полызиинаң кӧп кізі чуртазын ал халчалар. Ідӧк регионда ӧкпе ағыриинаң ирееленчеткеннернің саны хызырылча. Че имҷілер, имнег тоғынҷылары чох наа алай тиксі тыхталған имнег туралары, наа оборудованиелер хуруғ тур халарчыхтар теен ол. Прай имнег тоғынҷыларын ӱлӱкӱннен алғыстап, чылығ сӧстер читіріп, Виктор Михайлович чооғының халғанҷызынзар таныхтаан:
- Россия президенті паза правительствозы хазнаның алты субъектінде онкология кінін пӱдіреріне 2019 чылда федеральнай бюджеттең ахча пирердеңер чарадығ алған. Хакас Республика ол санға кирілген. Анзынаң сірерні алғыстапчам!
Посха айабин тоғынып, имнег тоғынҷылары муңар кізі чуртазын ал халчалар. Анзы оларның махачызы полча тиирге чарир. Олар ағырчатхан кізее ноо даа туста полызарға килчелер. Чуртағҷылар хазиин хайраллап, мындағ тоғысты кӱннің сай толдырчалар. Іди, тіспен істеніп, улуғ хозым итчеткен улус пайрамнығ мероприятиеде сыйыхтарға турысхан. Виктор Зимин «Трудовая доблесть Хакасии» медальны Г.Я.Ремишевскаяның адынаң республиканың имнег туразында істенчеткен имчі-хирург Николай Кузнецовха паза Ағбандағы имнег туразының клиническай лаборатория диагностиказының имҷізі Клавдия Романоваа читірген.
«Хакас Республиканың саблығ имҷізі» аарластығ атха алты имҷі турысхан, ол санда Ағбандағы имнег туразының ӧӧн имҷізінің имнег киреенҷе орынҷызы, имчі-хирург Валерий Чочумаков полған. «Хакас Республиканың хазых хайраллирының саблығ тоғынҷызы» аарластығ атха республиканың имнег туразының анестезист-медсестразы Екатерина Афонина турысхан. Хакасияның Аарластығ пічиинең 11 кізі таныхтатхан. Ол санда - республиканың хайди даа имнег страхованиезінің территориальнай фондының директоры Любовь Бурнакова, Ағбандағы имнег туразының имчі-олған хирургы Геннадий Канзычаков, республиканың олған имнег туразындағы имҷі-анестезиолог-реаниматолог Павел Коков, Асхыстағы ӧӧн имнег туразындағы анестезист-медсестра Людмила Кыстоякова.
Валерий Чочумаков Ағбандағы имнег туразының ӧӧн имҷізінің хирургия тоғызынҷа орынҷызы полып 2006 чылдаң тоғынча. Алында андох хирург полҷаң. Ол Хызылчардағы имҷілер институдын 1989 чылда тоосхан. Анаң Ағбандағы имнег туразында интернатура ирткен. Чиит хирургты Орджоникидзе аймаандағы ӧӧн имнег туразынзар, Копьев аалзар, тоғынарға ысханнар. Анда 1,5 чыл тоғынып, хатап Ағбанзар істенерге килген, андада ол имчі-ревматолог пол сыххан.
Анаң чиит имчі пілізін, узын кӧдірер пӧгіннең Новокузнецксер ординатуразар ӱгренерге кірген. Ӱс чыл пазынаң Ағбанзар айланып, городтың имнег туразында 1996 чылдаң имчі-хирург полып тоғынған. Валерий Петровичті 10 чыл пазынаң пу имнег туразының ӧӧн имчізінің орынчызына турғысханнар.
Хирургтың тоғызы оой нимес. Валерий Чочумаков, имчі полып, тиксі 29 чыл тоғын парир. Ӧӧн имчінің орынчызы полып, ол пу имнег туразында ідӧк хирург чіли дежурство апарчаттыр. Айда 8 - 10 хати дежурствозы полча. Улуғ опыттығ, тирең пілістіг хирургты ідӧк сидік операцияларда аралазарға ӧнетін хығырчалар. Андағ операцияларда, имчілер ӱчӱн турызып, тың ағырчатханнарны ал халарға полысча.
Аның тӧреен чирі Таштып аймаан-дағы Индіркі Мадыр полча. Аның іче-пабазы Северзер кӧзібіскенде, ол
соох чирлерде ӧскен. Улуғлары Ағбанзар киліп чурт салынғанда, Валерий Чочумаков городта 3-чі класста ӱгрен сыххан. Ағбандағы 30 N° школаны 1983 чылда тоосхан. Іди аның чуртазы пу городнаң пик палғалыс парған.
Имнег киреенең айғасчатханнарны ідӧк Хакасияның Ӧӧркі Чӧбінің кнезі Владимир Штыгашев алғыстаан. Пістің хазнада хазых хайраллирында 6-7 чыл мының алнында 14 муң участковай имнег туразы чабылған, че республикада оларны чаппасха кӱстенгеннер, мында ам даа кӧп тоғыс апарарға кирек теен ол. Пӱӱнгі туста имнег кіннерінде наа амғы аппаратуралар турғызылчатханда, анда инженерлерге паза техниктерге тоғыс орыннары тӧстелче. Андағ специалисттерні тимнирі ӧӧн пӧгіннернің пірсі полча. Имчілер чидіспинчеткені - ідӧк ағырсымнығ сурығ. Республикаа чыл сай 100 - 120 имчі, орты-мах ӱгредігліг 300-че имнег тоғынчызы киректелчеттір. Че сидіктер пар полза даа, пу кӱнде имнег тоғынчылары, чонның хазиин хайраллап, улуғ тоғыс толдырчалар тіп таныхтаан Владимир Штыгашев. Оларның полызиинаң республикада улуғ частығлар ортымахти 70 час азыра чуртапчатханы таныхталча. Пола-пола кӧзідіглерні ортымахти 82 часха читірерге кирек, ол сурығны пӧгіп аларға чарир теен. Сірерге, имнег тоғынҷыларына, чон паарсапча, поғдархапча тіп, Владимир Штыгашев оларға тоғыстарында улам улуғ чидіглер алғаан.
Ол республиканың Ӧӧркі Чӧбінің алғыстас пічіктерін нинҷе-де кізее читірген. Ол санда - республиканың имнег туразының имчі-терапевті Елена Болгановаа.
Пайрамнығ мероприятиеде чоох тутхан Хакасияның хазых хайраллачаң министрі Владимир Костюш. Хакасияда пу кӱнде имнег учреждениелерінде тиксі 12 муң азыра кізі істенчеттір. Министр оларның полғанын на, пасхазының чуртазын ал халар ӱчӱн кӱс салчатханда, сыйыхха турыстығ кізі полча тіп санапча. Ол, имнег киреендегі чидіглердеңер хысхачахти искіріп, чооғында Ағбандағы имнег туразы пу наада 105 чылын таныхтаан теен. «Пу имнег туразы имнег полызиин пирчеткен учреждение чіли тоғынча. Хакасияда иділчеткен операцияларның 25 процентін пу имнег туразы толдырча. Оларның 35 процентін, тізең, эндоскопия технологияларынаң тузаланып итчелер», - таныхтаан ол. Чонның хазиин хайраллапчатхан паза тӱзімніг тоғыстары ӱчӱн имнег тоғынчыларын алғыстап, оларға пик хазыхха пай поларға алғаан. Кізі хазиинаң пу чир ӱстӱнде аарлығ ниме чоғыл теен министр.
Анаң ол сценазар хығыртылған тӧрт кізее «Хазых хайраллирының отличнигі»танығны читірген. Сыйыхтаттырғаннарның санында - республиканың имнег туразындағы функциональнай диагностика пӧлиинің устағҷызы Татьяна Доможакова.
Татьяна Доможакова имнег туразынзар 1997 чылда істенерге килген. Ол анда кардиолог полған. 2001 чылдаң функциональнай диагностиканын имҷізі пол сыххан. Функциональнай диагностика пӧлиинің устағҷызы полып 11 чыл тоғын салтыр.
Аның тӧреен чирі Пии аймаандағы Куйбышев аал полча. Татьяна Ильинична, Хызылчардағы имчілер институдын 1993 чылда тоозып, істеніс чолын Ағбандағы имнег туразында пастаптыр. Ол устапчатхан пӧлікте чӱрек-тамыр ағырығларының диагностиказын иртіріп, ағырчатханнарға полызығ пирілче. Хан пӧзік полза, инфаркт, ишемия паза пасха даа чӱрек ағырығларын ілезіне сығарарға полысчалар, анаң ағырчатханнарны хайығда тутчалар. Пӧлікте прай 27 кізі істенче, ол санда функциональнай диагностиканын
11 имчізі. Татьяна Ильинична тӱзімніг тоғызы ӱчӱн республиканың имнег туразының устағчызының Аарластығ пічиинең, Хакасияның паза Россияның хазых хайраллачаң министерстволарының сыйыхтарынаң таныхтатхан.
Пу пайрамда республиканың чыл сай иртірілчеткен «Чылның иң чахсы имчізі» паза «Ортымах ӱгредігліг иң чахсы имнег тоғынчызы» марығның салтарлары иділче. Иң чахсы имчее республиканың имнег туразының рентгенэндоваскулярнай диагностикача паза имнирінче имчі Александр Ковалев саналған. Марығда ӱзінчі орынға Кызластағы участковай имнег туразы-ның ӧӧн имчізі Анжелика Сапронова турысхан.
Сценазар ідӧк хығырғаннар Хакасия пазының алғыстас пічиинең сыйыхтатхан кізілерні. Ол санда - республиканың имнег туразындағы медсестра Римма Кученова, Асхыстағы ӧӧн имнег туразының олған поликлиниказының устағҷызы Людмила Тюкпеева. Чыылған чонны ӱлӱкӱнде, сценазар сығып, ыр-сарыннарнаң, теелбектернең Хакас филармонияның артисттері аптааннар.
Автор :
Инора БОРГОЯКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы