ПОС КИРЕЕНЕ - УЛУҒ ХАЙЫҒ
22.06.2018
Хабарлар
Тоғазығ. Пу кӱннерде Хакасияның тиліс фондында республика пазы Виктор Зимин идінҷектернең тоғасхан.
Идінӌектернең тоғазығ тузында.
АНДА МИНИСТЕРСТВО, ВЕДОМСТВО КІЗІЛЕРІ ПАЗА ПОС КИРЕЕНЕҢ АЙҒАСЧАТХАННАР АРАЛАСХАННАР.
- ПІСТІҢ ТОҒАЗЫҒДА АРАЛАЗАРҒА ТУС ПАЗА ОҢДАЙ ТААП АЛҒАННАРЫҢ ӰЧӰН УЛУҒ АЛҒЫС. МАҒАА, РЕГИОН ПАЗЫНА ЧІЛИ, КІЧІГ ПАЗА ОРТЫН БИЗНЕСТІҢ АЙМАХ АҒЫРСЫМНЫҒ СУРЫҒЛАРЫНА КӦРІСТЕРІҢ ПІЛЕРГЕ КИРЕК. ХАКАСИЯНЫҢ ТАҢДАҒЫ ТИЛІЗІ ПІСНЕҢ ПАЛҒАЛЫСТЫҒ НООЗА, - ТЕЕН ВИКТОР ЗИМИН.
ТОҒАЗЫҒ АРАЛАСЧЫЛАРЫ ХАКАСИЯДА ПОС КИРЕЕН ТИЛІДЕРІНДЕ ИҢ АҒЫРСЫМНЫҒ СУРЫҒЛАРНЫ ӰЗӰРГЕННЕР. ОЛАРНЫҢ ПІРСІ - ОРГАНИЗАЦИЯЛАРҒА ИС-ПАЙНЫҢ НАЛОГ СИНІН ХЫЗЫРАРЫ. РОССИЯ ЗАКОНОДАТЕЛЬСТВОЗЫНДА АЛЫЗЫҒЛАР КИРІЛ ПАРҒАНДА, ПОС КИРЕЕНЕҢ АЙҒАСЧАТХАННАР ЧИР УЧАСТОКТАРЫНЫҢ ПАЗА ТИБІРЕДІЛБИНЧЕТКЕН ИС-ПАЙНЫҢ ӰЧӰН НАЛОГТАРНЫ КАДАСТР ПААЗЫНЫҢ 2 ПРОЦЕНТІН ТӦЛЕПЧЕЛЕР. АЛЫНДА ХАКАСИЯНЫҢ ПАЗЫ ТИБІРЕДІЛБИНЧЕТКЕН ИС-ПАЙҒА НАЛОГТАРНЫҢ СИНІН ХЫЗЫРАРДАҢАР СУРЫҒНЫ КӦДІРГЕНӦК . АМҒЫ ТУСТА РЕГИОН ПРАВИТЕЛЬСТВОЗЫНДА ПУ СУРЫҒӋА ЧАРАДЫҒ АЛЫЛҒАН, 4 ИЮЛЬДА ОЛ ӦӦРКІ ЧӦП СЕССИЯЗЫНДА ДЕПУТАТТАРНЫҢ ӰЗӰРИИНЕ СЫҒАРЫЛАР.
«Россияның пӱдірігҷілер пірігізі» коммерческай нимес партнерствоның кнезі Михаил Андреевич Борисов пӱдіріг тоғыстарының паазы тӱсчеткеннеңер сурығны кӧдірген. Амғы туста пӱдіріг организациялары наа импортнай техниканаң тузаланчалар. Анзы хоза хорадығларға ағылча. Ол техника аарлығ нооза. Че пӱдіріг тоғыстарының паазы, ӧзер орнына, тӱсче. Хонҷых регионнарда пӱдіріг тоғыстарының паазы ӧс парған полза, пістің регионзар ол алызығлар ам даа читкелектер.
Хакасияның пӱдіріг паза чурт-коммунальнай хоных министрінің пастағы орынҷызы Андрей Степановтың чооғынаң, пу сурығны пӧгібізеріне ӧнетін комиссия чыырға кирек. Комиссияны чыып, сурығны сентябрьға теере пӧгібізерге чарадығ алылған.
Идінӌектер сағыссыратчатхан сурығларынаңар чоохтааннар
«Слаткарница» ООО-ның ӧӧн директоры Елена Минчак, идінҷектер чарытхы тарифтері уғаа пӧзік тіп хомзынған. Амғы туста предприятие чарытхы ӱчӱн ай сай 300 муң салковай тӧлепчеттір.
- «Слаткарница» ООО-ны азарына кредит аларға киліскен. Анда улуғ опыттығ чахсы тоғынҷылар істенчелер. Предприятиеде кондитерскай фабрика тӧстеп аларға ізеніс полған. Че амғы туста хорадығлар кӧп (кредит, чал ахчазы, налогтар).
Оборудование, тізең, иргілен парған. Пу сурығны хайди пӧгібізерін пілчем, че оңдайым чоғыл, - таныхтаан Елена Минчак. Ол республиканың идінҷектерге хабасчаң кінінзер айланҷаң. Че кін 1,5 чыл мының алнында чабыл парған. Амды чӧптер пирҷең кізі чоғыл.
Хакасияның экономика тилізі министрі Татьяна Паульның чооғынаң, республиканың идінҷектерге хабасчаң кінінің полномочиелері Хакасияның тиліс фондына пирілген. Пу кӱннерде федеральнай бюджеттең тиліс фондына бизнеснең хада-пірге тоғынар ӱчӱн 5,5 млн салковай пирілген. Хакасияның пазы Елена Минчакка чарытхы ӱчӱн субсидия алар оңдайлар пар теен. Субсидия полызиинаң хорадығларның чардығын айландырып аларға чарир.
Тоғазығда пос киреенең айғасчатханнар школаларға, олған садтарына, имнег тураларына орындағы сығарылған ас-тамахты садарға кирек тіп сурығнаң айланғаннар. Хонҷых регионнар аймах ас-тамахты ниик паанаң сатчатхан сылтаанда садығлар мариин утып алчалар. «СПК Сибири» ООО-ның ӧӧн директоры Татьяна Дыринаның таниинаң, предприятие сығарчатхан 1 кг ах хайах 350 - 360 салковай турча, хай пірее региондағы предприятиелер аны 150 - 170 салковайға сатчаттырлар, аннаңар оларныңох хайағын алчалар. Хакасияның правительствозы сайтында «Малые закупки» чардығы полызиинаң идінҷектерге ас-тамахты хазна учреждениелеріне садып алар оңдай пар. Андар ниме, хайдағ паанаң сатчатханын пас турарға чарир. Заказчиктер, тізең, хайдағ ас-тамах аларға сағынчатханнарын пасчалар.
Мындағ оңдайнаң тоғазығда идінҷектернің хай пірее сурығларына нандырығлар пирілген. Виктор Зимин мындағ тоғазығлар сыбыра иртірерге пӧгін тутча тіп таныхтаан. Ағаа хоза, Хакасияның экономика тилізі министерствозы бизнес-форум иртіреріне тимненче, хайзында республиканың ӱлгӱлері, пос киреенең айғасчатханнарнаң тоғазып, бизнеске теелчеткен аймах сурығларны ӱзӱрерлер. Бизнес-форум августта иртер.
Автор :
Оксана ЧЕЛТЫГМАШЕБА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы