32 ЧЫЛ САХТААН ЧИҢІС
22.06.2018
Хабарлар
Спорт пайрамы. Чииттер Москваның ӧӧн орамаларында илееде харааға теере дискотекалар иртіргеннер - олар іди Россияның командазы Египеттің футболисттерін 3:1 саннаң утханын кӧгліг таныхтадылар.
Артём ДЗЮБА амох гол кирібізер.
Ойынның пастағы чардығы тоозыл парды... «Гол кир полбинчалар», - харасхыда истілче пархамның ӱні. Мынҷа орай хараада узубинчатханы тың на чапсытпаан.
Аны кічігдең сығара футбол марығларын хада кӧрерге кӧніктір салғам. Амды ол туңмаҷағынаң хада одыр тастабысча. 4 частығ оолағас кемнің ӱчӱн «ағырарға» кирек полчатханын пиҷезінең сурып алча, анаң кип-азахтары пастыра сизінче. Че амды 2 час хараа, олған садынзар парҷаң пала узупча. Пиҷезі чалғысхан на харасхыда телефон пастыра тилекей мариин кӧр парча. Амды мин ағаа хозылыбыстым. Че мин телевизор алнында одырчам. Ол телефон пастыра кӧрче.
Ойынның ікінҷі чардығы пасталыбысханда, Египеттің командазының футболизі Ахмед Фатхинің азағына тееп, мяч оларның хаалхазына кір парғанда, пархаҷағым хахап таа партыр, ол ноға пістіңнерге полысча тіп сурча.
- Марығ тузында андағ ниме пол парча, автогол адалча. Пу чемпионат тузында 5 хати автогол кирілген, - чарыда чоохтап пиргем пархаҷағыма.
Россия Египетнең Санкт-Петербургтағы стадионда тоғасхан. 64468 кӧрігҷі чыылыстыр. Ноға-да удаа ипчілерні кӧзітчеткеннер. Хайди матап ӧрінісчелер, оңнығ сіліг теелбектенминчелер, прай хонҷыхтарын паарсах хуҷахтирға тимделер.
Хайди ӧрінмессің, Денис Черышев, анаң Артём Дзюба пірер гол кирібіскенде. Пістіңнер 3:0 саннаң алнында парчалар. Мындағ нимені піреезі дее ухаанҷылады ни? Хайди-да ибірініп-кӧйтіктеніп, подгруппада Саудовскай Аравияның паза Египеттің командалары тың на кӱстіг ниместер, талаан тартса, Россия, арса, ікінҷі орынға сығып таа алар тіп чоохтанңаңнар. Амды кирек саңай пасха, чахсы паза ӧріністіг оңдайнаң пар сыхханда, пайаағы кізілер кӧксілерін сапхланчалар, пістіңнер ізестіг чиңістер тударын азынада пілгем тіп махтанысхлапчалар. Андағ оңдайлығларны хайди идерзің.
Египеттің футболисттері аразында Мохаммед Салах прайзынаң артых сабланчатханын пілчелер. Че аннаң хада алай аннаң тоғыр ойнирға маңнанған чир-суғҷыларыбыс Россияның футболисттерін часхарчалар, Мохаммед олаңай кізі, аны даа алаахтырып ал турарға чарир, иң ӧӧні - хорыхпасха кирек. Ол даа сылтағнаң М.Салах пу тоғазығ тузында артых тимненізін кӧзіт полбин салған. Аннаңар кӧйтік сӱменең тузалан халған - 11 метрдең пістіңнернің хаалхазынзар тебер оңдай «тоғынып» алған.
- Че, чарир, пір гол киріп алзыннар, - чаратча пархам. Сынап таа Игорь Акинфеев, пістің хаалха хадағҷыбыс, Мохаммед тепкен мячты тут полбин халған. Итсе, мяч хайдар учуғарын орта сизінген полтыр. Іди тоғазығ тоозылар алнында 3:1 сан пол парған. Пістіңнер алнында.
Мында Россияның піріктірілген командазының улуғ тренеріне турғызылған Станислав Черчесовтаңар хайди чылығ сӧстер чоохтанмас. Итсе, тилекей чемпионады алнында аймах-пасха тылаастар, хазалҷых сӧстер дее истілчеткеннер. Амды хомай сағынчатханнар саңай тымылдылар.
32 чыл сағаан ӧріністіг чиңістің киречізі полчабыс - Россияның командазы позының подгруппазынаң сығып алды, тилекей чемпионадының 1/8 чардығында аралазарға тимненче тиирге чарир. Амды кӧмес пасха сурығ турыбысча - пістіңнер постарының подгруппазында пастағы алай ікінҷі орында пол парарлар? Пу сурығ тиктең не сығыс килбеді. Аннаң сылтағлығ полар Россия тилекей чемпионадының 1/8 чардығында хайдағ команданаң ойниры.
Россияның командазын теестегі чиңіснең алғыстааннар санында полған хазнабыстың премьері Дмитрий Медведев. Ойын тузында Дмитрий Анатольевич Минскте полтыр, тоғазығны Белоруссияның правительство кнезі Андрей Кобяковнаң хада кӧртірлер. Дмитрий Медведев Минсксер Россияның паза Белоруссияның аразындағы чӧптезігде хол саларға парған полтыр.
Амды пістіңнер Уругвайнаң 25 июньда Самара городтағы «Самара Арена» стадионда тоғасчалар.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы