ВИКТОР ЗИМИН ТАБЫҒЛАРДА АРАЛАЗАР
26.06.2018
Хабарлар
Табығлар-2018. Республика пазы Виктор Зимин киҷее, 25 июньда, Хакас Республика пазы должностьха кандидат пічіктерін регионның Табығ комиссиязына пирген.
Табығ законнары хоостыра республиканың толдырығлығ ӱлгӱ органының иң пӧзік должнозына кандидаттарынаң пічік алҷаң тус пӱӱн 18.00 часта тоозылча. Киҷее, тізең, 14.00 часха Виктор Зимин Хакас Республика пазы должностьха кандидат пічіктерін пирген пизінҷі кізі полыбысхан. Таныхтирға кирек, аны «Единая Россия» партия пу табығларға сығарған. Виктор Зимин республиканаң 2009 чылдаң сығара устапча.
Пічіктерні Хакасияның Табығ комиссиязының ікі специализі алған. Олар пічіктернің орта тимнелгенін паза толдыразынаң чыылғанын сыныхтааннар, кирек орында кандидатты хол салдырғаннар. Халғанҷы пічікте хол салып, Виктор Зимин Хакасияның Табығ комиссиязы аның пічіктерін алғанын киречілеен. Хайдағ сағыстарнаң Виктор Зимин пу табығларға парча?
- Тус алысча, кӧп наа алызығ чуртасха кирілче, республика ідӧк наа алызығларны паза кӱстерні киректепче. Піс, экономиканы тилідіп, культурабысты хайығда тудып, чоныбыстаңар ундутпасха кирекпіс. Ниме чонға кирек? - ол ӧӧн сурығ, хайзын тӧреміл хайығда тударға киректелче! - теен Виктор Зимин.
Чоохтирға кирек, Хакасия пазы должностьха кандидатха ідӧк сығарылғаннар: Александр Мяхар («Партия роста»), Андрей Филягин («Справедливая Россия»), Сергей Ербягин («Зелёные»), Валентин Коновалов (КПРФ). Табығларда араласчатхан кандидаттар хабазыға орындағы депутаттарның паза муниципальнай пӱдістер пастарының хол салғанын чыырлар. Хакасия пазы должностьха кандидатха санға алылар ӱчӱн, пу паза пасха пічіктер Табығ комиссиязына табығлар иртер кӱнге 55 - 45 кӱн читкелекке пирілчелер. Муниципальнай пӱдістернің депутаттарына паза пастарына пір ле кандидатха «хабазарға» чарадылча.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде