АҒБАН ПРАЙЗЫНАҢ ХАДА ӦРІНГЕН
04.07.2018
Хабарлар
Спорт пайрамы. Мындағ нимені кем кӧрді ни - пістіңнер футболӌа тилекей чемпионадының 1/4 чардығына сығып алдылар. Пу чидіг прайзын тың чапсытхан. Россияда, тізең, Испанияны утып алғаны илбек ӱлӱкӱн чіли таныхталған.
Испанияның командазы тилекейдегі иң кӱстіглер, чахсы тимненістіглер санына кірче. Улуғ хомзынысха, пістіңнер пу тусха читіре андағ чидіглернең, чалтырама чиңістернең махтан полбинчатханнар. Тилекей чемпионадының 1/8 чардығына сығып алғаны даа улуғ ӧрініс ағылған.
Москвадағы «Лужники» стадионзар чыылысхан 78 муң кӧрігҷінің аразында Испанияның корольын кӧзідерлер ни тіп тӧлкеленгем. Улуғ пастыхтарның алынҷа трибуназында Испанияның корольы, Россияның правительство кнезі, аның ипчізі одырчатханнар. Таныхтирға кирек, Дмитрий Медведев тее, Испанияның корольы даа постарын амыр тудынғаннар.
Стадионда, тізең, тоғазығ хазыр парча. Испания тудығ чох алнынзар сыынча, пістіңнерні хаалха хыринда саңай хыс салғаннар. Мына меспек пістің хаалхазар учухча - Игорь Акинфеев позының пӧзік узын кӧзітче, аны холнаң тудып алча.
Тоғазығның ӧӧн чардығы 1:1 саннаң тоозылча. Хоза тус пирілче - пір таймда 15 минута. Пазох саннар алыспинча. Пенальти. Испанияның хаалха хадағҷызы Давид де Хеа пӧзік сыннығ полтыр. Пістің Игорь Акинфеев аның хыринда чабызах пілдірче. Че прайзы даа таныхтапча - Испанияның хаалха хадағҷызының опыды асхынах арах.
Стадионда чон тынминчатханға тӧӧй. Пастағызын Иньеста теепче - гол. Пістің Смолов ідӧк гол кирібіскен. Пике ідӧк орта теепче. Игнашевич тее пӧзік узын кӧзітче. Коке тепкен меспекті Акинфеев хаалхазы алнында тохтадыбысча - ниме пасталыбысхан стадионда! Стадионда ла нимес, тиксі Москвада, тилекейде. Украинада даа чоо аахтастырлар, хысхырыстырлар. Анда 42 муң кізі футбол кӧргені таныхталча. Амды ӱлгӱдегілер оларнаң халых-чарыдығлығ тоғыс апарчатхан осхастар.
Хаалха хадағҷызы Игорь АКИНФЕЕВ узын кӧзітче
Хаҷан Аспас тепкен меспекті пістіҷ хаалха хадағҷызы азахнаң хыйа учухтырыбысханда, пілдістіг пол парған - Россия чиңіс тутты! Ура-а! Футболисттернің піреелері стадиондох аңдарыл пар турғаннар: майыхханнарына ба, хомзынысха ба, ӧрініске бе - пілбес.
Мындағ туста стадионда Станислав Черчесов ла амыр тудынған, неке. Ниме-де сананып-пӧгініп, аар-пеер пас чӧрчеткен. Дмитрий Медведевтің дее ӧрінізін кӧрерге чарир. Ол, пістің футболисттерні мындағ оой нимес чиңіснең алғыстап, прайзына хол тутхан, махтаан.
Чӱреем амырадып алар сағыснаң тасхар сыхтым. Орай хараа. Сах андох Ағбанның Пастағы май площадьында, анда улуғ экран турғызылған, чон сууласчатханы, ӧрчіліг хысхырысчатханы истіле тӱскен. Анаң ол ӧрініс салғахти прай даа городча тарап сыхханға тӧӧй полған. Анда-мында ла кӧгліг хысхырыстар, машиналар суулазы истілчеткен.
Хонҷыхтарым, пис хадыллығ тураның чуртағҷылары, мының алнында ӧріністерін тың на кӧзітпеҷеңнер. Амды кӧбізі балконнарында турғлапча, ойын хайди ирткенін ӱзӱрче. Піди сизініп одырчатсам, ибдегілеріне узирға харығ полбас ӱчӱн, телевизорларын балконнарзар сығарып алтырлар. Нинҷе-де хонҷых, пірігіп пе, таныстарын хығырып алып па, хада кӧрген осхастар. Оларның хайзы-да ӧрчіліг хысхырарға харасханох, че, турада палалар узупча тіп, аны тысханнар.
Сах ол арада пістің орамаҷа, улуғ суум-саам кӧдіріп, пастағы, анаң ікінҷі машина ойлада халды. Анда чииттер толдыра осхас, ӧтіг ӱннері чалбах тарапчатхан. Анаң олар хайда-да чіде халғаннар. Че Ағбанның ортызында кӧгліг суум-саам ӱр истілген.
Амды Россия тилекей чемпионадының 1/4 чардығында Хорватиянаң тоғасча. Олар 7 июльда Сочиде ойнапчалар. Оң ползын пістіңнерге.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде