ЧОН КИРЕКСІНІСТЕРІН ТОЛДЫРЫП ТОҒЫНЧАЛАР
06.07.2018
Хабарлар
Сессия. 4 июльда Хакасияның Оӧркі Чӧбінің алтынӌы хығыртии, 49-ӌы сессияны иртіріп, тоғызын тоосты.
РЕСПУБЛИКА ПАРЛАМЕНТІНІҢ АЛТЫНҶЫ ХЫҒЫРТИИНЫҢ ДЕПУТАТТАРЫНА 49-ӌы СЕССИЯ ТАНЫҒЛЫҒ ПОЛДЫ, АННАҢАР ДАА ОЛАРНЫҢ ӦӦН ЧАРДЫҒЫ СЕССИЯ ТОҒЫЗЫНДА АРАЛАСХАН - ПИС ЧЫЛ МЫНЫҢ АЛНЫНДА ЧОН КИРТІНІЗІНЕ ТУРЫСХАН 45 ДЕПУТАТ. ӰС КІЗІ АЙМАХ СЫЛТАҒЛАРНАҢ СЕССИЯА КИЛ ПОЛБААН. ДЕПУТАТТАРДАҢ ПАСХА СЕССИЯДА АРАЛАСХАННАР ХАКАСИЯ ПАЗЫ ВИКТОР ЗИМИН, РЕСПУБЛИКА ПАРЛАМЕНТІНЕҢ ТАБЫЛҒАН СЕНАТОР ЕВГЕНИЙ СЕРЕБРЕННИКОВ, ПРАВИТЕЛЬСТВО, ПРОКУРАТУРА, ЧАРҒЫ КІЗІЛЕРІ.
РОССИЯНЫҢ ПАЗА ХАКАСИЯНЫҢ ФЛАГТАРЫНА ЧЕЕС ПИРГЕН СООНАҢ КӰН ӰЗӰРИИНЕ СЫҒАРЫЛҒАН СУРЫҒЛАР ЧАРАДЫЛҒАН. ДЕПУТАТТАРҒА 12 ЗАКОН ПРОЕКТІН ӰЗӰРЕРГЕ ПАЗА «ПРАВИТЕЛЬСТВО ЧАЗЫНДА» ХАКАСИЯДА ӦРТТЕР САНЫН ХЫЗЫРАРЫНҶА ХАЙДАҒ ТОҒЫС АПАРЫЛЧАТХАННАҢАР ИСКІРІГНЕҢ ТАНЫЗЫП АЛАРҒА КИРЕКТЕЛГЕН.
Республика парламентінің комиссия кнезі Николай Бозыков Хазна Думазының ӱзӱриине сығарылған пенсияа сығар часты ӧскірерінеңер закон проектінең республика чуртағҷылары тоғыр полчатханнаңар айланысты кӱн суриина сығарарға чӧп пирген. Чоохтирға кирек, олох кӱн иртен Хакасияның профсоюзтары пу закон проектінең тоғыр митинг иртіргеннер, хайзының резолюциязы ідӧк Хакасияның Ӧӧркі Чӧбіне читірілген. Чонның сағыссыразын чахсы піліп, республика парламентінің кнезі пу сурығҷа пуох неделяда президиум чыылии иртер тіп чарлаан. Чыылығда чуртағҷыларның прай айланыстары, сурыныстары паза чӧптері санға алылып, Россияның Хазна Думазының істенісче комитедінің адына ызылар. Андағ оңдайнаң, сессия ӱзӱриине паза сурығ кирілбеен.
Хакасия пазы Виктор Зимин депутаттар сурығлар ӱзӱриин пастир алнында позына сӧс пирерге сурынған:
- Аарлығ Владимир Николаевич, аарлығ арғыстар, Ӧӧркі Чӧптің депутаттары! Прай чӱреемнең алғызым читірчем, удур-тӧдір пілізіп, республиканы тилідіп, хада-пірге тоғынған ӱчӱн Пу чыллар ниик полбааннар: суғ тасхан, ӧрттер полған, кризис... Сидік сурығларны пӧгіп, піс сынында чӧптіг тоғынғабыс. Кӧп ниме иділ парған. Онар чыллар пӱдір полбинчатхан пӱдіріглер тимге сығарылған. Республика правительствозына хабасхан ӱчӱн, регион экономиказын ӧскірген ӱчӱн, чон чуртазын, ӱгредігні, культураны, спортты чахсыландырған ӱчӱн сірерге, партияларны, фракцияларны, кӧрістерні санға албин, алғызым читірчем. Прайзы республика чуртағӌылары ӱчӱн тоғынғабыс, - теен Виктор Зимин.
Алғыс сӧстері соонаң Хакасия пазы Виктор Зимин республика парламентінің депутады, «Саян-молоко» ОАО-ның ӧӧн директоры Валерий Левицкийге «Россиянын ас-тамах индустриязының саблығ тоғынҷызы» аарластығ атха турысхан ӱчӱн сыйых читірген. Ӧӧркі Чӧп кнезі Владимир Штыгашев, алғыстастарға хозылып, Валерий Левицкий республикада мындағ пӧзік атха турысхан пастағы кізі полчатханын таныхтаан.
Депутаттар ӱзӱрген закон проекттерінің ӧӧн чардығы толдыразынаң алылған. Хакасия правительствозы паза Ӧӧркі Чӧбі кічіг паза ортын бизнеске тибіреділбинчеткен ис-пайға налогты тӱзірерінеңер закон проектін пір чылҷа тимнееннер. Пу сессияда прай тӱзедіглер санға алылып, депутаттарның кӧбізі аны аларға чаратхан. Пӱӱнгі кӱнде организациялар тибіреділбинчеткен ис-пайға кадастр паазының 2 % тӧлепчелер. Кирілген алызығлар хоостыра 2018 чылда 1000 азыра квадрат метрдең пасти 2000 квадрат метрге теере улуғ ис-пайға (Хакасияда андағ 240 тибіреділбинчеткен ис-пай саналча) налог 1% тиңнелер, 2000 - 6000 квадрат метр (400 орын) - 1,5%, 6000 азыра квадрат метр (400 орын) полза, 2 % полар.
- Пу законны алып, піс сынында идінӌектерге ле нимес, ідӧк чуртағӌыларға хабасчабыс, - чарытхан парламент кнезінің орынҷызы, бюджетче паза налог политиказынҷа комитет кнезі Сергей Комаров. - Піс чахсы пілчебіс прай налог тӧлеглері ас-тамах, ниме-ноолар паза полызығлар паазына теелчеткенін.
Сергей Комаров ідӧк орындағы ӱлгӱлернің идінҷектерге тибіреділбинчеткен ис-пайға налогты тӱзірер оңдайлары парына хайығ айландырған. Чоохтирға кирек, оларның тибіреділбинчеткен ис-пайының улии 1000 квадрат метрні аспинча. Тиксі республикада андағ 3500 азыра ис-пай саналча.
«Хакасияның халыхтар палатазынаңар» республика законына алызығлар кирілген. Амды Халыхтар палатазына 36 нимес, 39 кізі кірер. Андағ оңдайнаң ӱн пирчетсе, палатадағыларның ӱннері тиң полбин турар. Ағаа хоза, Халыхтар палатазының кізізі халых тоғызы хоостыра чуртапчатхан орыннаң ырах парчатса, ағаа чорыхтың хорадығлары айландырыл турар. Ахчанаң палғалыстығ сурығлар Хакасия правительствозынаң паза финанстар министерствозынаң чарадыл парғаннар.
Ідӧк пір дее ікінҷілес чох депутаттар паза пір закон проектінең - чон дружинниктеріне льготалар пирерінең - чарасханнар. Амды дружинниктер пос устаныс мероприятиелерінде дее араласчатсалар, республика паза муниципалитет ӱлгӱлері оларға страховка ит турарлар. «Страховой кирек» полза, компенсация ағаа алай аның туғаннарына тӧлелер. Хакасияда 99 чон дружиназы саналча, хайдар 1106 кізі кірче.
Хакасияның Ӧӧркі Чӧбін, город-аймахтарын республикада удаа ӧрттер сыхчатханы сағыссыратча. Ниме иділче республикада ӧрттерні полдыртпас ӱчӱн, чуртағҷылар хазиина, чуртазына паза ис-пайына хорғыс чох полар ӱчӱн? «Правительство чазына» сығарылған сурығҷа чоох тутхан Хакасияның гражданскай арачыланызынҷа, сағыбаан саайларҷа паза ӧрттердең хорғыс чох оңдайларынҷа управление пастығы Николай Старков:
- Хакасияда пӱӱл 398 ӧрт сыххан (2017 чылда - 355), хайда 23 кізінің тыны ӱзілген (2017 чылда - 21). Иң кӧп ӧрт сыхча Ағбан, Саяногорск городтарда паза Орджоникидзе аймаанда. Сылтағлар - арығлалбаан, саба салылған пестер, чарытхы пирчеткен иргі проводтар, отнаң салбыр тудынғаны паза пасхазы. Ӧрт сых килгеннеңер сағбалапчатхан пос алынӌа тоғынчатхан искіріг системаларын турғызарынҷа тоғыс апарылча. Ӧрттерні ӱзірерге чахсы хабасчалар ӧрт ӱзірӌең дружиналар. Ӧрттерні табырах ӱзірерге полысча суғ тартчаң прицеп. Ол 300 муң салковай турча - аарлығ нимес, тузазы, тізең, пілдірте. 2009 - 2017 чылларда ӧрт ӱзірӌең 13 техника алылған, 64 миллион салковай хорадылған. Пӱӱл техника алыларох. Ағаа хоза муниципальнай пӱдістерге субсидиялар пирілче.
Искірігні санға алып, парламент чарадии алылған, хайда ідӧк Асхыс паза Шира аймахтарының айланыстарынҷа ӧрт ӱзірҷең деполар пӱдірерінеңер сурыныстарын киргеннер. Олар депо проекттерін наа технологияларҷа пӱдірерге сурынчалар, хайзы проект паазын пілдірте тӱзірер.
- Ӧӧн хайығны ӧрттең арачыланӌаң пастағы оңдайларны тӧстирге паза ӱгредіг учреждениелерінде профилактика тӧреміл иртір турарға кирек, - теен Владимир Штыгашев.
Хакасияның Ӧӧркі Чӧбінің алтынҷы хығыртииның 49-ҷы сессиязын тоозып, парламент кнезі Владимир Штыгашев, пастағы орынҷызы Юрий Шпигальских депутаттарға алғыстас пічіктерін читіргеннер.
- 2013 чылның сентябрь айынаң пасти Ӧӧркі Чӧп 586 закон алыбысхан, аның ӧӧн чардығы (301 закон) Хакасия пазының пастаа, 230 закон проектінең депутаттар сыхханнар. Законнарның кӧбізі чон чуртазына, хазых хайраллирына, экономикаа, ахча суриина теелче, - салтарлар иткен Владимир Штыгашев.
Пис чыл аразына парламент республика чуртағҷыларына уғаа кирек, тузалығ законнарны алған: 70 - 80 частығ чуртағҷыларға кӧп квартиралығ тураларның тиксі тыхтағ тӧлеглер чардығын айландырарынаңар, льготалығ чуртағҷыларға тикке чир пирердеңер, Хакасияда патриоттарны ӱгредерінеңер паза пасхазы.
- Прай депутаттарға паза закон тимнир пастағнаң сыхханнарға ӧткін паза чахсы тоғынған ӱчӱн алғызым читірчем, піс прайзыбыс республика чуртағӌыларының кирексіністерінең тоғынғабыс, - теен Владимир Штыгашев. Пазағы сессия кӱскӱзін, читінҷі хығыртығның депутаттары табыл парза, иртер.
Автор :
Наталья СУБРАКОВА, Сом Максим АХПАШЕВТИ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде