ИДӀНҶЕКТЕР ТОҒЫЗЫН ТИЛӀДЕР ӰЧӰН
06.07.2018
Хабарлар
МФЦ тоғызы. Ағбанда кічіг паза ортын бизнестегілерге чӧптер пирӌең полызығ кін азылды.
Виталий ГОРЮЧКИН, Елена БОРИСОВА, Татьяна ПАУЛЬ
Ағбандағы Чоннар Ынархазы орамадағы 2 «А» турада бизнес-зона азылды. Анда чонға кӧп полызығ пирӌең кіннің (МФЦ) тоғынӌылары идінӌек поларға сағынчатханнарға, кічіг паза ортын бизнестегілерге хазна структураларынзар киректелчеткен пічіктерні орта тимнирдеңер чоохтирлар. Ідӧк аймах сурығларға нандырарлар. Андар айланған кізее ӧнетін тус кӧрілбинче, специалисттер прай сурығларға ипти нандыр турарлар.
Идінӌектерге полызығ пирӌең кін азылчатханда, «Хакасия МФЦ-зының» директоры Виталий Горючкин чыылған чонзар айланған:
- Аарлығ аалҷылар, мин бизнестегілерге полызығ пирҷең кін азылчатханнаңар чарлапчам! Мындағ кін пастағызын на азылча. Аны тоғындырар ӱчӱн улуғ тоғыс апарылған.
Аалӌылар аразында Хакасияның экономика тилізі министрі Татьяна Пауль полған. Министр прайзын мындағ кін азылчатханынаң алғыстаан:
- Пӱӱнгі кӱнде Ағбанда идінҷектерге полызығ пирҷең пастағы кін азылды. Саяногорскта, Харатаста мындағ кіннер азылар. Пу кирекке бюджеттең ахча позыдылар. Кін чонның кирексінізінде сыбыра полар тіп сағынчам. Хайдағ даа сурығнаң айланған кізее читкіҷе хайығ салылар паза чӧптер пирілер. Идінҷектер пик азахта турзалар, Хакасияның экономиказы тилир паза ӧңненер.
Пу кінде идінӌектерге чӧптер тикке пирілер. Право паза юридическай саринаң полызығ пирілчеткені кӧп идінӌекке пічіктерні орта тимнирге улуғ чӧлег полар нооза. Кӧп тоғыс апарчатхан кіннің специалисттері 150 азыра кирекче полызығ пирерлер.
Кінде «Бизнес старт» хазна программазы хоостыра олаңай кізі идінӌек чіли санға алылар. Пу программа пос киреен азарға сағынчатханнарға килістіре.
Автор :
Елена САГАТАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде