ӦСЧЕТКЕН ТӦЛ МАТЫРЛАРНЫ УНДУТПАЗЫН
14.08.2018
Хабарлар
Тоғыс чорығы. Хакасияның пазы Виктор Зимин ирткен субботада, 11 августта, тоғыс чорығынаң Таштып аймаанзар чӧрген. Ол, анда чоннаң тоғазып, ідӧк Таштып аалның пайрамында араласхан паза Харағайның Хумартхылас аллеязында ағас хорбызын одыртхан.
ТАШТЫПТА ХАКАСИЯНЫҢ ПАЗЫ ИРТЕННЕҢ СЫҒАРА, ПІРГЕ ТОҒАЗЫҒ КӰНІНДЕ АРАЛАЗЫП, АЙЛАНҒАН ЧУРТАҒҶЫЛАРНАҢ ТОҒАСХАН. АНАҢ ТАШТЫП ААЛҒА 250 ЧЫЛ ТОЛЧАТХАНЫНА ЧАРЫДЫЛҒАН ПАЙРАМДА АРАЛАСХАН ПАЗА КІЧІГ ААЛЛАР САНЫНА КІРЧЕТКЕН ХАРАҒАЙЗАР ХУМАРТХЫЛАС АЛЛЕЯЗЫНДА АҒАС ХОРБЫЛАРЫН ОДЫРТАРҒА ЧӦРГЕН.
Таштып аалның 250 чылына чарыдылған ӱлӱкӱн стадионда ирткен. Виктор Зимин, чуртағҷыларны мындағ танығлығ кӱннең чылығ алғыстап, Таштып аймаа республикада иң турыстығ орыннарның пірсі полчатханын таныхтаан.
- Аарлығ чир-суғӌылар! Хакасия правительствозы адынаң паза позымның адымнаң прайзын пу чапсых ӱлӱкӱннең Таштыпха 250 чыл толчатханынаң алғыстапчам, - алғыстас сӧстерінең айланған чыылған чонзар республика пазы.
- 250 чыл ол ас нимес, че мин ізенчем, Таштып аалны паза аның чуртағӌыларын алнында ӧріністіг паза чахсы киректер ле сағыпча. Таштып аймаан, ікінҷілебин, республиканың жемчужиназы тіп адирға чарир. Прайзыңарға часка, часхы паза амыр чуртас, ӧңненіс алғапчам!
Республика устағҷызынаң хада Таштыптағыларны ідӧк Хакасияның Ӧӧркі Чӧп кнезі Владимир Штыгашев, Таштып аймааның пазы Алексей Дьяченко паза Таштып аал чӧбінің пазы Рустам Салимов алғыстааннар.
Хакасияның пазы Виктор Зимин ӱлӱкӱн тоозылғалахха Харағай аалзар чол тутхан. Хакас аал чуртағҷылары республика устағҷызын аалның Культура-тынағ кіні хыринда удурлааннар. Чуртағҷылар Виктор Зиминге алғыстарын читіргеннер. Анзы тиктең нимес
- Харағай аалларның пірсі полча, хайзылары «Хакас Республиканың кічіг, ыраххы аалларын хайраллиры паза тилідері» республика программазынзар иң не пурнада киріл парғаннар. Программаны чуртасха кирері Виктор Михайловичтің пастаа полған нооза. Андада Харағай аалзар регион устағҷызы пу сурығҷа ӧнетін кил парған. Салтарында хаҷан-да чідер пазында полған кічіг хакас аалыҷахтың кӧрімі пӱӱн кӧріндіре алыс парған: аал орамаларындағы чоллар асфальтнаң чабылған, наа Культура-тынағ кіні пар, прай даа сиденнер, тураларның хырлары нааҷылалых. Чуртағҷылар даа ачых-чарых кӧңніліглер.
Виктор Зимин орындағы чуртағҷыларнаң иргі таныстарынаң чіли чоох алызып алған.
- Мин оңнапчам, хайди сірер, нинҷе-де чыл мының алнында чыылысчатханда, чолдағы палғасха піден парбас ӱчӱн, тағ тӧзінӌе кил турғазар, - кӱлімзіреп, сағысха кирген Хакасияның пазы. - Амды, тізең, сірернің орамаларыңда асфальт...
Пыдырах аал чӧбінің пазы Семён БОРГОЯКОВНАҢ (Харағай пу аал чӧбінзер кірче)
Хакасияның чон артизі, саблығ ырҷызы Нина ИДИМЕШЕВА
(Харағай аның тӧреен аалы полча) хорбы одыртчалар.
Хайди чуртап парчатханнарынаңар паза пар сидіксіністерінеңер истіп алған, полыс полар нимелернең полыс пирерге молңаан. Сидіксіністер, тізең, ам даа пар. Оларның пірсінеңер Хакасияның пазына пірге тоғазығ кӱнінде Таштыптох искірілген - Харағайдаң аймах кінінзер парчатхан чол хомай полғанынаңар. Виктор Зимин пастағы орынҷызы Андрей Новосёловха пу сурығҷа тоғыныбызарға чахығ пирген: чолны, кӧместең дее полза, нааҷылап пастирға.
Чоох алызып алған соонаң, Виктор Зимин чуртағҷыларнаң хада харағай хорбыларын одыртарға парған. Хорбыҷахтар Хумартхылас аллеязы полар орында одыртылғаннар. Аллея Харағай аалның Илбек Ада чаада чат халған чуртағҷыларына турғызылған хумартхы тас хыринда орнығар.
- Мындағ пастағ уғаа кирек ниме, - таныхтаан Хакасияның пазы. - Ӧӧнінде ӧсчеткен тӧлге ол уғаа тузалығ полар. Піс совет чонының матыр киреен ундутпинчабыс, чиит улусты ирткен чылларда полған нимелерні аарлирға паза таңдағызы ӱчӱн нандырығлығ поларға ӱгретчебіс. Ол хорғыстығ чаадағы осхас чобағлығ киректер паза полбас ӱчӱн.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде