АРАЧЫЛАҒӋЫ ПОЛАРҒА ТИМНЕНЧЕЛЕР
26.09.2018
Хабарлар
Асхыс аймаа командазының араласчызы.
Марығ. Ирткен неделяда Ағбанда ӱгренӌілер аразында «Школа безопасности» республика марии ирткен. Анда прай Хакасиядаң 13 команда араласхан. Полған на командада алты оол паза ікі хыс полған.
Марығ тӧстегӌілері полчалар: Россия МЧС-ының Хакасияӌа ӧӧн устаа, республиканың ГО, ЧС паза ПБ управлениезі, Хакасияның ӱгредіг паза наука, хазых хайраллаӌаң министерстволары, республиканың хоза ӱгредіг кіні, Н.Ф.Катановтың адынаң Хакас хазна университеді, тиксі Россияның пос кӧңнінең ӧрт ӱзірӌеңнернің халых пірігізінің республикадағы пӧлии паза сағыбаан саайлар тузында имнег полызиин пирчеткен орындағы кін.
Хайди таныхтаан республиканын хоза ӱгредіг кінінің директор тоғызын толдырчатхан Галина Жукова, пу марығ 13-ӌі хати иртірілче. Аның ӧӧн пӧгіні - олғаннарны саай тузында посты орта тудынарға ӱгредері. Араласчылар ӧрт ӱзірерінде, кізілерні суғдаң арачылирында паза чуртастарын ал халарында физическай тимненісче марығлазарлар. Килген командалар муниципальнай марығларнын чиңісчілері полчалар. Таныхтирға кирек, пӱӱл Таштып аймаа командазы тиксі Россия марығларында 13-ӌі орынға турысхан.
Марығ пайрамни азылчатханда, араласчыларзар Хакасияның ӱгредіг паза наука министрінің орынӌызы Юрий Сагалаков айланған.
- Пу марығлар кӧп чыл иртірілче, пістің иң чахсы командаларыбыс тиксі Россия марығларында турыстыра араласчалар. Сірер саайлар тузында хайди тудынарға кирек полчатханын пілчеткені ӧріндірче. Прайзыңарға марығ тузында устарыңны чахсы кӧзіт пирерге алғапчам, - чооғында таныхтаан Юрий Гаврилович.
Ідӧк олғаннарны МЧС-тын Хакасияӌа ГУ-зының пастых орынӌызы Алексей Максименко алғыстаан. Аның чооғынаң, марығларда республиканың иң кӱстіг командазы (Боград аймаа - Авт.) араласпинчатханда, чиңісчіні халғанӌызына теере ілезіне сығарарға сидік полар.
2020 чылда Хакасияда Сибирьдегі федеральнай округтың регионнар аразындағы марии иртер. Анда аралазар ӱчӱн, республикадағы командалар пазағы чылда марығлазарлар.
Марығлар азыл парғанда, командалар алынӌа маршруттарӌа тарас парыбысханнар. Асхыс аймааның «Огнеборцы» командазы «визитка» марығ иртчеткен площадказар чол тутхан. Анда команда араласчылары чайаачы устарын кӧзіткеннер.
Визитка соонаң «Огнеборцы» команда кӱснең толдырӌаң аймах упражнениелер площадказынзар парған. Анда хыстарға паза оолларға алынӌа пӧгіннер турғызылған. Хыстарға, пиллеріне чадып, пресстерін тыыдарға киректелген, оолларға - хол узынаң чирдең ідінерге.
Пазағы площадка «Пожарно-тактическая полоса» адалған. Анда командалар эстафета оңдайынаң марығласханнар. Пастағы араласчы сиден азыра сегірген, ікінӌізіне, пасхысча «тура» хырынзар сығып, чӱгӱрібізерге киректелген. Ӱзінӌі араласчы, ӧрт ӱзірӌеңнер кип-азаан кизіп, ӧрт ӱзірӌең шлангтарны хаптырӌан муфтаны пасхазына читірген. Паза ӱс араласчаа, ӧрт ӱзірӌең шлангтарны автомобильге хаптырып, ӧнетін хараӌахты суғнаң толдырыбызарға киректелген.
Марығның пастағы чардығы тоозылғанда, командалар Культура паза тынағ паркынзар чол тутханнар. Анда оларға суғдағы арачылағ тоғыстарын толдырарға киректелген. Пастап команданың ікі араласчызы, кимее одырып, буйларға теере чӱскеннер. Анаң пасха орында турғызылған буйзар арачылағ кругын тастааннар.
«Маршрут выживания» площадкада марығ иң хынығ ирткен. Анда командалар, сидіксіністерні тобырып, кӧрілген чолӌа ирт парыбызарға кирек полғаннар. Пастап араласчылар, арачылағ обмундированиезін кизіп, пірсі пірсінің соонӌа ағастарға тартылған канаттарӌа ирткеннер. Пастағы пӧгінні толдырыбызып, командалар палатка турғысханнар. Анаң састығ тылоларӌа ирт парыбызарға киректелген.
Пасха орында командалар географияӌа пілістерін кӧзіткеннер. Анда оларға компас чох азимут таап аларға, топография танығларын орта хығырарға киректелген. Халғанӌызынзар командалар «палығлатхан» араласчыны носилкалығ пас меетке читіргеннер.
Марығ салтарларынӌа Ағбан пилтірі аймаа командазы чиңіс тутхан. Ідӧк сыйыхтығ орыннарға Орджоникидзе паза Пии аймахтарының командалары сыхханнар. Пу ӱс команда Сибирьдегі федеральнай округ синіндегі марығда республика ӱчӱн турызар.
Автор :
Антон Чертыков
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы