ХАЙХАСТЫ САҒЫП
28.09.2018
Хабарлар
Ус холлар. Наталья Пушкарёва тӧрт чыл мының алнында сувенир кӧклӧлерні тимнеп пастаан. Амды ол 29-30 сентябрьда Казаньда иртер «Ипчі холынаң» Россиядағы устар фестивальында аралазар.
Наталья Геннадьевна Пушкарёва чурт істін чазаҷаң кӧклӧлернін узы полча. Ол С.П.Кадышевтің адынаң культура кінінің декоративно-прикладной искусство пӧлии чарлапчатхан кӧзідіг-марығларда, республика ярмаркаларында сыбыра аралазадыр. Аны пӧзік синде толдырылған тоғыстары ӱчӱн махтағлығ пічіктернең таныхтапчалар.
Че ол кӧклӧлер тимнир кирекнең ӱр нимес айғасча тиирге чарир. Аның пастағы кӧклӧзі 2014 чылда «тӧреен». Сыйыхтар тимнеҷең журналда сомнар аразында аның кӧңніне гномға тӧӧй оолағас тың кірген. Анаң Наталья позының андағох кӧклӧ поларға кирек тіп сағын салған. Соонаң Минсуғдағы культура паза искусство колледжінің ӱгретчізі Наталья Сафронова апарчатхан «Пос холынаң кӧклӧ» кружокка чӧр сыхтыр. Іди сувенирлер тимнирге ӱгреніп алған.
Пастағы кӧклӧзін пір чыл артиинаң иткен. Хайдағ-да оманы сағыс хоостыра тимге сығарып аларға оой нимес осхас. Тиксі нинҷе ойнаҷах тимнеп салғазар сурыға анзын чоохтап полбаспын теен. Пірее кӧклӧні тимнепчетсе, хайдағ-да чардых читпинчетсе, тоғыс тохтап парадыр. Ус кізее чайаачы сағысты орта читір пирерге кирек полча. Тиксі кӧрімін, синін, чазанҷыхтарын, ӧңнерін орта таллап аларға кирек. Мындағ оңдайнаң кӧклӧ пӧзік синде толдырылча.
Наталья Пушкарёва ойнаҷахтарнын омаларын паза азах-холларын ладоллдаң паза пластиктең тимнепчеттір. Ладолл адалчатхан материал, позы хуруп, тыыпчатхан полза, пластикті, ізідіп, хурутчаттырлар. Устың сувенирлері аң-хус, маллар омалары хоостыра иділчелер. Чыындызында харға, ежик, сосха, петук, кӱске матырлар пар полтыр. Пӱӱл ол «Сырлығ кӱске» тоғысты тимнеен. Халғанҷы тоғыстарының санында «Кабаниха-повариха» паза «Егерь кабан» ирепчі полча. Ідӧк Наталья Наа чылға удур кӧзідіглерге хакас кип-азахтығ кӧклӧлер тимнепче. Кӧклӧ устары матырларынаң удаа чоохтазадырлар, сағыстарынаң ӱлезедірлер. Пос холынаң чайалған тоғыс тіріл парчатхан осхас.
- Кӧзідіглерде аралазып, мастер-класстарны кӧрчезің, - чоохтапча Наталья Геннадьевна. - Андада пасха устар хайди тоғынчатханы пілдістіг пол парча. Пір кӧклӧні сах ідӧк хати тимнеп алар оңдай чоғыл. Иирде иртен кӧклӧнің харахтарын мындағ-да оңдайнаң хоостирбын тіп сағын салчазың. Че иртен пасха тоғысха чапсынчазың. Кізінің істі-чаны ниме кирексіпче, олох нименең айғазарға кирек.
29-30 сентябрьда Казаньда иртчеткен «Ипчі холынаң» декоративно-прикладной искусствоҷа Россия синіндегі фестивальда Хакасиядаң Наталья Пушкарёва араласча. Анда аймах регионнардаң таллағ иртібіскен 85 ус позының тоғыстарын кӧзідіге сығарар. Мындағ фестиваль президенттің грантына халых чонның чуртазын тилідер ӱчӱн иртірілче.
Фестивальда тостаң сувенирлер тимнирінҷе, чібекнең хоостирынңа, хохлома хоостирынҷа паза пасха аймах тикке мастер-класстар иртірілер.
Араласчатханнарның 15 узы финалға сығар. Чиңісчілерге Франциядағы Страсбург городта иртірілчеткен мындағох фестивальда аралазар оңдай пирілче. Наталья Геннадьевна чиңісчілер санында поларына ізеністі чідірбинче. Хайхастарға киртінерге кирек тіпче ол.
Автор :
Елена САГАТАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде