ХАКАС ТАБАННАРНЫҢ ХАҢАЛӋОСТАРЫ
03.10.2018
Хабарлар
Артисттер амғы кізілернің хылиин чахсы кӧзіт пиргеннер.
Хормачы иир. Ағбаңда чиит артисттернің хормачы концерті ирткен.
Пу кӱннерде Хакас филармониязында «TABAN SHOW» хынығ ойын полды. Аны чиит артисттернің ӧмезі тимнеен. Пӱӱнгі кӱнде ӧмезер Виктор Сагалаков, Алексей Торбастаев, Андрей Тюкпиеков, Алексей Сагатаев паза Каскар Чаптыков кірчелер. Оларға чалахай иирні иртірерге «Кӱн сузы» ансамбльның паза «EMOJI» теелбек студиязының араласчылары полысханнар.
Концерт толдыразынаң хакас тілінең апарылған. Ойын пазында чайаачы устар пістің чонның оңдайын, амғы чуртастың танығларын чахсы кӧзіт пиргеннер. Чыылған чонны хакас гаишник Турғузаков (Каскар Чаптыков) чапсытхан. Ол сайбағҷыларны нандырыға тартарға, туюххан ахча албасха кӱстенче. Че туған-чағыннары кӧп полза, хакас гаишникке дее тоғызын толдырарға сидік полтыр. Концерт тузында кӧрігҷілер полған на кізінің «тӱктіг» айназы парын піліп алғаннар. Чоохтирға кирек, мындағ айнаҷах (Алексей Сагатаев) сынап таа кирек полтыр. Ол полбаан полза, Виктор Сагалаковтың матыры, хыстар кофе ізерге хығырчатса, анзы, ниме полчатханын оңарбин, ӱр пас чӧрерҷік, неке. Хормачы концертке килген чонны хайхатхан хакас тілінең матлама чоохтанчатхан Терминатор (Андрей Тюкпиеков). Оолларның таниинаң, мында «Хабар» газетаның тоғынҷызы, блогер паза кибелісчі Сибдей Томның улуғ хозымы. Ол, компьютер программаларын пазып, прай роботтарны пістің тілнең чоохтанарға ӱгрет салтыр.
Ойын тооза кізілер ээреп хатхырғаннар. Пістің чонның сурыға кӧні нандырар орнына чоохты пасха саринзар апарыбысчатхан оңдайына хайди хатхырбас. Ідӧк махтанҷығыбысты хайдар идербіс. Анзы ікі фермернің чооғы пастыра кӧзіділген. Сизінгенде, артисттер хакас тілін істесчелер, аннаң улуғ тоғыс апарчалар. Кӧзідімге, табаннарның таниинаң, Хакас чирі тіріг ниме полтыр, ол пӱдізінең кізее тӧӧй. Аның пазы пар - Индіркі Паза аал. Харахтарын Таштып аймаандағы Харағай паары таныхтапча, хулағы Ис аал полча паза аннаң даа пасхазы.
«TABAN SHOW» ойын ӧӧнінде чиит артисттернің постарының чайаачы тоғыстарынаң пӱткен, че концерт программазынзар ідӧк саблығ чир-суғҷыбыс Юрий Топоевтің «Пастағы хыныс» чооғы.
Анзы орта, кӧрігҷілерні Юрий Гавриловичтің чайаачы ис-пайынаң таныстырарға кирек. Мыннаң мындар ӧменің репертуарын пасха писательлернің чоохтары пайыдар, неке.
Улуғ нимес ойыннардаң пасха программада сарыннар паза теелбектер полғаннар. Хакас ооллар Германиядағы «Чингисхан» ӧменің паза рэпер Псайның ырларына килістіре сӧстер сағын тааптырлар. Пастағы сарынны хакас ас-тамааның гимні тиирге чарир. Авторларның таниинаң, сын алыптар талғаннаң, потхыдаң, айраннаң кӱс алынчалар. Мында Виктор Сагалаковты махтирҷыхпын. Хызыл хара суғ аалдаң сыххан чайаачы ус морсымнығ сарнапча.
«TABAN SHOW» хормачы концертте сынап таа саңай ла ооллар араласханнар. Че абахайлар чох ойынны турғыс полбассың, аннаңар хыстарның омаларын Алексей Торбастаевнең Алексей Сагатаевке чайирға киліскен. Ипчі чонның хылиин артисттер чахсы кӧзіт пиргеннер. Залдағы абахайларның піреезі позын танып таа салған полар.
Чиит артисттернің ойыны уғаа чахсы ирткен. Аны хоостыра кӧрігҷілер сағыстарынаң олох кӱн иирде социальнай сетьтерде ӱлескеннер. Кізілер ӧӧнінде «піди хатхырарға киліспеен, кӧңнібісті кӧдіргезер, хакас тілінің тадиина тосхабыс» тіп таныхтааннар. «Хабар» газетазар ӱндезіглер ідӧк кірерлер тіп ізенчебіс. Концертке кил полбаан улус артисттерзер «TABAN SHOW» ойынны хатап кӧзіт пирерге сурыныснаң айланған. Чиит артисттернің таниинаң, кӱскӱзін олар концертнең хайди даа аймахтарзар парарлар.
Ағбандағыларға аны декабрь тузында хатап кӧріп аларға оңдай полар. 27 октябрьда, тізең, артисттер хакас чииттернің аразында КВН-ны иртірерлер. Ол ідӧк хакас тілінен толдыразынаң апарылар. Табаннар прай кӧрігҷілерні чалахай иирге хығырчалар. Мин санапчам, хормачы концерттерні пос хараанаң кӧрзе, пос хулаанаң истіп алза, морсымнығ ла полар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы