ӦӦН СУРЫҒЛАРНЫ ПӦГЕРІНЕ - УЛУҒ ХАЙЫҒ
09.10.2018
Хабарлар
Тоғыс чорығы. Хакасия пазының тоғызын ӱр нимеске толдырчатхан Михаил Развожаев ирткен неделяда Ағбан пилтірі посёлокта, Харатас городта паза Бородино аалда тоғыс чорығынаң пол килген.
Россия президенті Владимир Путин Михаил Развожаевтің алнында турғысхан пӧгіннернің пірсі - чылығ пирерін сыныхтағда тудары, аннаңар тоғынып пастаан пастағыох неделяда устағӌы Хакасияӌа чорыхха сыххан. 5 октябрьдағы искіріглернең танызып, Михаил Развожаев Ағбан пилтірінде, Харатаста паза Бородинода чылығ пирерінең палғалыстығ сидіксіністерні кӧріп аларға чаратхан.
Ағбан пилтірінде чылығ пирері сидік пасталған тіп искірген аймах пазының пастағы орынӌызы Геннадий Петров. Чылығ пирӌең сетьтерде алты хати саай полған, ӧӧнінде Гидролизнай микрорайонға чылығ пирӌең кіннең палғалыстығ сетьтерде.
- Пӱӱн иртен трубаларда пазох давление тӱс парған, - чарытча Геннадий Петров. - Чылығ пирерін тохтадыбысхабыс, саай полған орынны тілеп пастаабыс. Пілдістіг, ол иң чуға орында полған. Чылығны таратчатхан трубалар 1971 чылдох тартылғаннар, оларны хаӌанох алыстырарға кирек. Пӱӱн саай полған орында тиксі тыхтағ тоғыстарына садығ марии пу наада ирт парған. Чӧптезіг иділ парған. Подрядчик материаллар ал салған. Пу чағында нааӌылағ тоғыстарын пастир.
Ағбан пилтіріне чылығны «Хакасский ТЭК» ООО ӱс кін пастыра пирче. 5 октябрьда Гидролизнай микрорайонға чылығ пирӌең сеть талал парған, 12.00 часха саай полған орын, табылып, тыхталған. Тоғынӌылар тураларзар чылығ 18.00 часха читірілер тіп молӌааннар.
Хакасия пазының тоғызын ӱр нимеске толдырчатхан Михаил Развожаев чылығны таратчаң кінні кӧріп алған, анаң сетьтер сайбалған орынны кӧрерге парған. Ол Перспективнай орамадағы 3 туранаң хости полтыр. Трубалар чир ӱстӱнӌе тартылчалар, ағаа хоза чылығлаан вата прай азырыл партыр. Хыринда олғаннарға ойнаӌаң орын орныхча. Пір дее сиден чоғыл. Палаларға пойли чӧрерге чарир. Чылығ пир сыхханда, трубалар ізіг полчатпастар ба. Хорғыстығ.
Михаил Владимирович пастап тиксі тыхтағ тоғыстары хаӌан толдырыларынаңар сан пирісті истіп алған. Ағбан пилтірі аймаа пазы Елена Егорованың искіриинең, узуны 70 метр участокта сетьтер нааӌылалар. Тыхтағ тоғыстарына 2,4 миллион салковай республика бюджедінең пирілген. Подрядчик тоғыстарны 70 кӱнге толдырыбызарға кирек. Чылығ пирӌең наа сетьтер чир алтынӌа салылар паза чылығлалар. Михаил Развожаев наа сетьтерні піріктірерін иң хысха тусха толдырарға чахаан, чонға ол пілдіртпин толдырыларға кирек.
Пілдістіг, амғы трубалар чир ӱстӱнӌе салылғаны паза пір дее сиденнелбеені устағӌыны тың сағыссыратхан. Олғаннарны чылығ пирӌең сетьтердең арачылир ӱчӱн, ол сетьтерні сиденнирге чахаан. Сетьтерні кӧрген соонаң Михаил Владимирович кӧп квартиралығ пис хадыллығ турада пірее квартирада батареяны позы сыныхтабызарға чаратхан. Пастағы хадылдағы пір квартира ээзі квартира ізиин ас пирген. Тасхар сыхханда, устағӌаа устапчатхан компания пуох тураның чуртағӌызы подъездтердегі чылығ счётчиктерін санға аларға хынминчатханын искірген. Михаил Развожаев орындағы пастыхтарға сидік сурығны пӧгерге полыс пирерге чахаан.
Харатаста аалӌылар читіре тыхталбаан чолларны кӧргеннер.
Советскай орамада чолның иргі хадылы хыйа алыл партыр, наазы тӧзелбиндір. Устағ-пастағ искіриинең, подрядчик халған тоғыстарны пір неделяа толдырыбызарға кирек, че хайдағ-да сылтағнаң, чахсы кӱннернең тузаланмин, ол тоғызын апарбинча. Михаил Развожаев аннаң тоғазып аларға сағынған. Анзы килбеен. Город устағ-пастаа пу подряд организациязынаң тӧреміл тоғынчаттыр, аннаңар тоғыстарны тузында толдырарына ізенче.
Михаил Развожаев чылығ пирчеткен организацияларға хара тастың неделяа чидер чыындызын тӧстирге чахаан. Харатастағы котельнайларда хара тас чыындызы чоғылдаңар искіріг алғанда, ол городтағы котельнайларзар парған. 2 N° котельнайның устағчызы Александр Шаманов хайдағ хара таснаң одынчатханнаңар чоохтап пирген паза «СУЭК-Хакасия» ООО-наң хара тас аларына пір миллион салковай пирілердеңер чӧптезіг иділгеннеңер искірген. Пос киреенең айғасчатханнар хара тасты ӧдіске сатпинчалар. Пу котельнайдаң пасха, городха чылығны «Хакасский ТЭК» ООО пирче. Михаил Развожаев анда полғанох. Чылығ пирері пу неделяда правительствода ӱзӱрілер. Чыылыға чылығ пирчеткеннер паза орындағы пастыхтар хығыртылғаннар.
Хай-хай хатығ оңдайларда чылығ пирчең тус Боград аймаандағы Бородино аалда иртче. Аал пик чуртапча. Анзын иптелген тура тастылары киречілепче. Че орындағы котельнай тоғынчатхан пӱдіріге пір дее тӧӧй нимес. Тасты, кӧзенек орыннары, оодылых стене аны уламох хорғыстығ итче. Істіндегі кӧрімі тастындағызынаң пір дее халбинча. Ирткен чылда котельнайда саай полған. Кізілер кӱлні постары тӧккеннер. Пӱӱн котельнайны, чылығ пирчең сетьтерні тыхтирына ахча пирілген. Тоғыстар ам даа парча.
Тоғынчылар пу неделяда чылығ пиріп пастирлар. Че сағам тоғысха нинҷе-де ле кізі сыххан, пасхазы, чал ахчазы тӧлелбинчеткеннеңер, сығарға хынминча. Пу сурығнаң Михаил Владимирович таныс паза аннаң айғасча. Пу кӱннерде тоғынҷыларға ирткен хысхы айларның ӱчӱн чал ахчазынҷа ӧдістің чардығы айландырылар - 386 муң салковай. Халған ӧдіс чардыхти пу чағында чабыл парар. Тоғынҷылар алнында ӧдіс 2 миллион салковайға чағын.
Бородинода чылығ сағам ікі орамаа пирілер: Щетинкин орамазына, анда школа орныхча, паза Советскай орамаа, анда - олған сады. Михаил Развожаев пис часха чит тее париған полза, школазар пар килерге чаратхан. Аны удурлааннар Хакасияның ӱгредіг паза наука министрі Лариса Гимазутина паза школа директоры Оксана Комоликова. Оларның искіриинең, школада чылығ, прокуратура паза пасха сыныхтағ органнары сыныхтааннар. Пастыхтар школадағы кабинеттерзер кіргеннер. Школада 184 пала ӱгренче. Ӱгредіг учреждениезінде кӧзенектер чардыхти алыстырылған. Школа директоры килчеткен чылда халған кӧзенектер алыстырыларына ізенче. Михаил Развожаев школаа чӧпсінген паза, Оксана Петровнаны Ӱгретчілер кӱнінең алғыстап, порчолар сыйлаан.
Михаил Владимирович, хабарҷыларның хай пірее сурығларына нандырып, таныхтаан: «Пастап кӱн суриинда турчатхан сурығларны пӧгібізерге, чорыхтарға сығарға кирек, анаң кабинеттегі тоғыснаң айғазарға чарир: ахча суриинаң, национальнай проекттерде аралазарынаң паза пазағы чылға бюджетті тимнирінең».
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы