СОПРАНО ӰННІГ ЫРҶЫНЫҢ АЛТЫН ПАЙРАМЫ
14.11.2018
Хабарлар
Концерт. Пу наада Хакас филармониязында Россияның саблығ артизі Зинаида Аршанованың пайрамнығ концерті ирткен.
Пӱӱл ырӌы Зинаида Семёновна Аршанованың танығлығ чыл. Сопрано ӱнніг чир-суғӌыбыс профессиональнай сценаа сыхханнаң пеер 40 чыл ирт парды. Ол син тус аразына ағаа хайдағ ла партиялар, сарыннар толдырарға киліспеен. Пайрамнығ концертке чайаачы ус тилекейге саблығ опералар, мюзикллер ӱзіктерін паза хакас сарыннарын таллап алтыр. Чалахай иирні Татьяна Чаптыкова апарған.
Концертті симфоническай оркестр асхан. Музыканттар дирижер Вячеслав Инкижековтың устаанынаң «Ромео паза Джульетта» операның увертюразын толдырғаннар. Аның авторы Шарль Гуно полча. Чоохтирға кирек, драматург У.Шекспирнің пу трагедиязы хоостыра 40 артиинаң опера пазылған, композитор Ш.Гуноның чайаачы тоғызы артыхтарның санына кірче.
Хайхастығ музыка залдағы чонның кӧңнін кӧдірген, че кізілер Зинаида Аршанованың сығарын чидікпин сағыпчатханнар. Хынчатхан ырӌыны кӧрігӌілер ізіг айа сабызынаң удурлааннар. Саблығ ус, Джульеттаның, Амелияның, Марицаның, Сильваның арияларын сарнап, кӧрігӌілернің чӱрее-паарын хайылдырған. Зинаида Аршанованың партияларны толдырғаны алынӌа ойынға тӧӧй. Ам на ла улуғ залда чиит Джульетта пастағы хыныстаңар сарнады. Че тӱрчедең сценада Дж.Вердинің «Бал-маскарад» операзының Амелия матыры хомзынызынаң ӱлес сыхты. Полтазы хоостыра абахай ипчі граф Ричардха хыныбысхан. Графтын оңдайы иптіг, аны прайзы улуғлапча, че ол Амелияның хада хонғанының арғызы полча.
«Марица» паза «Сильва» оперетталарны Имре Кальман пасхан. Венгриядағы композиторның чайаачы тоғыстарын пістің ырӌылар сарнирға хынадырлар. Кӧгліг ариялар кізілернің чӱреен кӧӧреткеннер. Зинаида Аршанова хоза пірее ӱзікті толдырған полза, залдағы чон, сыдаспин, теелбектенерге сығарӌых, неке.
Концерт тузында кӧрігӌілернің Эйтор Вила-Лобостың «Бразильская бахиана» чыындызын истіп алар оңдай полған. Произведениенің адалғаны хоостыра сизінерге чарир, ол И.С.Бахтың музыказына тӧстеніп чайалған. Чыынды тоғыс чардыхтаң пӱткен. Оларның иң саблығ пизінӌі чардығы полча. Аны Э.Вила-Лобос сопрано ӱнніг ырӌаа паза виолончельлер ансамбльына пасхан. Сіліг кӧг кізілерні ол-пу нимее хомзынмасха, таңдағызынзар ізеніснең кӧрерге ӱгретче паза чир ӱстӱнде часка парынаңар искірче.
Ойынның пастағы чардығының халғанӌызынзар Зинаида Аршанова хызы Алина Майнашеванаң хада сарнаан. Хакас абахайлар Ф.Сарторинің «Con te partiro» ырны паза Э.Л.Уэббернің «Призрак оперы» мюзиклнің ӱзігін толдырғаннар. Театр искусствозына хынчатхан улус Алина Майнашеваның чайаачызынаң чахсы таныс. Чиит артист «Читіген» театрда істенче, аймах ойыннарда ӧткін араласча. Халғанӌы тоғыстарынаң Абахай Пахтаны («Абахай Пахта» спектакль) паза Ленаны («Соох чир» ойын) таныхтирға кирек. Сценада ікі артист морсымнығ кӧрінген. Кізілер таланттығ ырӌыларны тынмин даа исчеткеннер.
Чалахай иирнің ікінӌі чардығы «Тӧреен чирімнің кӧглері» адалған. Аны Зинаида Аршанова хада хонғаны Валерий Майнашевтің кибелістеріне пазылған ырларнаң пастаан. Пӱӱл хакас чонның саблығ оолғына 70 час толарӌых. Валерий Гавриловичтің чарых омазын Зинаида Семёновнанаң Алина чӱреенде хаӌан даа ал чӧрчелер.
Пӱӱнгі кӱнде поэттің кибелістеріне кӧп нимес сарын пазылған, че олар прайзы кізіні сағысха тӱзірчелер, олох туста ӧрініс сыйлапчалар. Мында чиит композитор Оксана Алахтаеваны махтирға кирек. «Алғастар» циклні паза «Мӧге чуртастаңар» сарынны чайап, ол кӧрігчілерге поэттің тирең сағыстарын читіре оңарып аларға оңдай пирче. Валерий Майнашевтің «Нанҷымнаңар сарын» кибеліске кӧгні композитор Олег Токояков пас салған. Ол ырны Алина Майнашева толдырған. Ідӧк программада Г.Челбораковтың «Чирім хустары», «Ах хазың», «Іҷенің часказы» сарыннары полғаннар.
Зинаида Аршанованың пайрамнығ концерті уғаа чахсы ирткен. Кӧрігҷілер полған на сарын соонда ырҷаа чахайахтар читіргеннер, «Браво!» хысхырғаннар. Чыылған чон Алина Майнашеваның узын пӧзік паалаан. Кізілер чиит артистке алынча программаны хайди даа тимнирге кирек тіп таныхтааннар. Пайрамнығ иир соонда кӧрігҷілер чалахай кӧңніліг ибзер нанчатханнар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы