KI3I ЧАСКАЗЫ - СӦБӀРЕДЕ
11.12.2018
Хабарлар
Фестиваль. Пу наада Ағбанда «Ивушка» олған садында «Cӧ6ipe оңнерi» фестиваль ирткен.
Пу мероприятие ӱс ӱлӱкӱнге чарыдылған: Сӧбіре, Іҷе паза Улуғлар кӱннеріне. Олған садының методизі Татьяна Викторовна Шуртинаның чооғынаң, «Ивушка» олған сады Улуғлар кӱнін чыл сай таныхтаҷаң, че пӱӱл іҷе-пабалардаң пу ӱлӱкӱнні фестиваль оңдайынаң иртірердеңер сурыныс кірген.
Фестивальда сигіс сӧбіре араласхан: Чугунековтар, Тодиковтар, Толмашов-Кобзиннер, Ахпашевтер, Филимоновтар, Сарлин-Аткниннер, Гагаркиннер, Артемьевтер. Оларға сӧбірелерінең хайдағ даа оңдайнаң таныстырарға чахығ пирілген.
Олған садының актовай залында кӧрігҷілер кӧп чыылыс парған. Полған на сӧбіре фестивальға чайаачы оңдайнаң тимнен салған. Руслан Николаевич Чугунеков оолғы Дамирнең ӧбекелерінеңер чоохтап пирген. Иван Фёдорович Артемьев сӧбірезінең хоостар пастыра таныстырған. Хоостарны хызы Доминика чайаан. Ахпашевтер сӧбірезінің пазы Андрей Юрьевич родынаңар паза хакас ойыннардаңар чоохтаан. Пу сӧбіредең олған садынзар Антон паза Артём ікістер чӧрчелер. Оолағастар хакас ойыннарынаң таныстырғаннар, анаң олғаннарнаң хада арғамҷы тартысханнар. Пу ойын палаларның кӧңніне тың кірген.
Нина Антоновна Толмашова Катя пархазынаң сӧбіре кибірлерінеңер чоохтап пиргеннер. Иркеҷектер табырах узи пирер ӱчӱн, ол палаларына узутчаң сарын ырлаҷаң, амды, тізең, пархаларына сарнапча. Пу сӧбіреде палаларға узир алнында нымахтар хығырчалар. Нина Антоновна Катянаң хада «Талған хоор-хоор» ойынны кӧзіт пиргеннер.
Сарлиннер паза Аткниннер ідӧк сӧбіре кибірлерінең таныстырғаннар. Маша паза Аня пиҷе-туңма іҷезі Рамина Владимировнанаң паза ууҷазы Лариса Александровнанаң фестивальда хада араласханнар. Ууҷалары «Іҷенің часказы» сарынны уғаа сіліг толдыр пирген.
Фестивальда «Непоседы» паза «Радуга» ӧмелер улуғ нимес концерт кӧзіткеннер. Олар «Минің Россиям»
паза «Наа чыл» сарыннарны толдырғаннар. Таныхтирға кирек, «Непоседы» - хакас тілін ӱгренчеткен ӧме. Андар орыс таа палалар чӧрчелер. Воспитатель Ангелина Анатольевна Сагалакова олғаннарны пос тілінең чоохтазарға ӱгретче. «Наа чыл» сарынны олғаннар, хакас тілін чахсы пілчеткен чіли, сӧстерні прай орта адап, толдыр пиргеннер.
Фестиваль тоозылчатханда, олған садының методизі Татьяна Викторовна Шуртина араласчыларға алғыстас пічіктерін читірген.
- Пӱӱн пістің олған садында пастағызын на «Сӧбіре ӧңнері» фестиваль иртті. Мында піс ӱс тӧлні чыып алғабыс. Фестивальға килген прай араласчыларға даа, кӧрігҷілерге дее олған садының устағ-пастаа адынаң улуғ алғыс! Пу син кӧп сӧбіре мероприятиеде аралазар тіп пір дее сағынмаабыс, - таныхтаан Татьяна Викторовна.
«Сӧбіре ӧңнері» фестивальда ідӧк Ағбанның ӱгредіг управлениезінің ӱгредігде национальнай паза региональнай компонентті сыныхтағда тутчатхан методист Татьяна Николаевна Тугарина полған. Аның таниинаң, пу фестиваль іҷе-пабалар город мероприятиезінде ӧткін араласчатханын кӧзіт пирген.
- Мындағ мероприятиелер уғаа киректер. Пала сӧбіреде нимені-де, кӧзідімге, хынысты, пілістерні, алчатса, анзы ағаа уғаа танығлығ полча. Іҷе-паба палаа нинҷе хыныс пирзе, соонаң ол, ӧс парза, олох син хыныс айландырар. Пӱӱнгі фестивальда «Ивушка» олған садының палалары ӧткін араласханы ӧріндірче, - таныхтаан Татьяна Николаевна.
Амғы туста хакас тілін паза культуразын тилітчеткен, хайраллапчатхан мероприятиелер республика паза Ағбан город синінде кӧп иртірілче: 2005 чылдаң сығара чыл сай «Чылтызахтар», ікі чылда пір хати «Сурнағастар» марығлар, «Тӧреен тіл - чонның худы» фестиваль паза пасха даа мероприятиелер.
«Ивушка» олған садының устағ-пастаа «Сӧбіре ӧңнері» фестивальны чыл сай иртірерге пӧгінче. Пӱӱл ол пастағызын даа иртірілген полза, анда илееде сӧбіре араласхан. Арса, килер чылда уламох кӧп араласчы полар.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы