ЗАПОВЕДНИКТЕР СІЛИИ - СОМНАРДА ПАЗА КНИГАЛАРДА
15.01.2019
Хабарлар
Наталья ТАИРОВА, Виктория ШУРКИНА, Ольга ОГУРЦОВА, Надежда БОЛЫЧЕВА
Кӧзідіг. Н.Г.Доможаковтың адынаң национальнай библиотекада Заповедниктер паза национальнай парктар кӱніне чарыдылған «ЗаповеДано» кӧзідіг азылған.
Чыл сай 11 январьда пістің хазнада Заповедниктер паза национальнай парктар кӱні таныхталча. Н.Г.Доможаковтың адынаң национальнай библиотека пу ӱлӱкӱнге чапсых кӧзідіг тимнебіскен. Библиотека тоғынҷылары Россияның паза Хакасияның алынҷа хайраллалчатхан орыннарына чарыдылған сомнарны, монографияларны, альбомнарны, дневниктерні, наука тоғыстарын кӧзідіге сығарғаннар.
Таныхтирға кирек, Россияда пастағы заповедник 1916 чылда Забайкальскай крайда азылған, ол - Баргузинскай заповедник. Пістің региондағы «Хакасский» заповедник чиит заповедниктернің санында. Пӱӱл 4 сентябрьда ағаа 20 чыл толар.
«ЗаповеДано» кӧзідігнің пайрамнығ азылчатханында «Хакасский» заповедниктің директорының орынҷылары Наталья Таирова паза Виктория Шуркина, Л.Р.Кызласовтың адынаң чир-суғ ӱгренҷең национальнай музейнің директор орынҷызы Ольга Огурцова араласханнар.
Наталья Таированың чооғынаң, пӱӱл «Хакасский» заповедник пайрамнығ чылын таныхтапчатханда, заповедник тоғынҷылары чонға аймах-пасха мероприятиелер иртірерлер. Ирткен чылда олар пайрамға тимненгеннер.
2018 чылда заповедник Хакасиянын культура паза тархын ис-пайына чарыдылған наа буклеттер сығарыбысхан. Пылтырох «Оғлах тағдағы хоостар» сомнар альбомының презентациязы ирткен. Заповедник сығарған прай тоғыстар Н.Г.Доможаковтың адынаң национальнай библиотеканың прай пӧліктерінҷе тарадылча.
Кӧзідіг азылчатханында Виктория Шуркина «Сибирьдегі хоосхаларнын кӧрімнері» чазы атлазынаңар чарыда чоохтап пирген. Атлас хоостыра туристтерге аңнарның істері хайдағ хоосхаларни полчатханын піліп аларға чарир.
Н.Г.Доможаковтың адынаң национальнай библиотеканың тоғынҷызы Надежда Болычева «Хакасский» заповедниктің тоғынҷыларын профессиональнай ӱлӱкӱннең, кӧрігҷілерні кӧзідіг азылғанынаң алғыстаан.
- Амғы туста пістің хазнада 100 азыра заповедник паза национальнай парк саналча. Республикадағы «Хакасский» заповедник Россияның чир-чайаанын хайраллирға полысча. Ол пістің поғдархазыбыс полча. Чуртастарын республиканың чир-чайаанын хайраллирына чарыт салған кізілерге улуғ алғызыбыс читірчебіс, - таныхтаан Надежда Болычева.
Кӧзідігде ідӧк Россияның заповедниктерінің сомнары сығарылғаннар. Оларның санында Андрей Басковтың, Вячеслав Аникиннің, Александр Колбасовтың «Хакасский» заповедниктің сомнары, Сергей Понитевскийнің «Кирзинский» заповедниктің сомы, Олег Горошконың «Даурский» заповедниктің сомы сығарылғаннар. «Хакасский» заповедник чыл сай календарь сығарча, хайзында заповедниктің иң сіліг орыннарының сомнары полча.
Россияның заповедниктеріне, национальнай парктарына чарыдылған литератураа алынҷа орын пирілген. Оксана Скалинаның «Россияның иң сіліг заповедниктері» киндезі кӧрігҷілернің хайиин тартхан. Анда пістің хазнаның 40 иң сіліг заповеднигінеңер паза национальнай паркынаңар пазыл парған.
«ЗаповеДано» кӧзідіг Н.Г.Доможаковтың адынаң национальнай библиотекада 15 февральға теере тоғынар.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы