КІЗІЛЕР СООХХА ТОҢМАЗЫН
16.01.2019
Хабарлар
Ӱлгӱ. Киҷее Хакасияның пазы Валентин Коновалов республика правительствозының чыылиин иртірген. Чыылығның тоғызы республикада чылығ пирҷең тус хайди иртчеткеніне паза президенттің «майдағы» указтары хайди толдырылчатханына чарыдылған.
Че пастап регион устағҷызы хазнада пол парған теестегі саайға хайығ айландырған - Ростов облазындағы Шахты городта кӧп хадыллығ турада газ чара чачыраанына. Пу саай хоостыра Валентин Коновалов республиканың пӱдіріг паза чурт-коммунальнай хоных министерствозына, ГО, ЧС паза ӧрттең хорғыс чох идерінҷе устаана Хакасиядағы газ киреен сыныхтабызарға чахығ пирген: кӧп хадыллығ тураларда газ оборудованиезі хайдағ оңдайда полчатханын, газнаң палғалыстығ хайдағ хорғыстар парын, газ оборудованиезін сыныхтирынңа пландағы сыныхтағлар хайди иртірілчеткенін паза профилактика тоғызы хайди апарылчатханын.
- Пу тоғысты сӧӧ тартпасха сурынчам, - чахаан республика пазы Валентин Коновалов. - 18 январьға теере сан пиріс тимде ползын.
Мының соонаң Хакасияның пазы Наа чыл ӱлӱкӱннері республикада улуғ саайлар чох ирткенін таныхтаан. Чылығ паза чарытхы пирерінҷе хайзы орыннарда сидіксіністер сығысхлаан, че оларны чапчаң пӧк турғаннар.
- Че хомзыныстығ киректер пар полғанох, - чоохтаан республика пазы.
Чыл пасталғаннаң сығара Хакасияда 73 ӧрт сых партыр, оларда 7 кізі чуртазын чідірген, 6 кізі палығлатхан. Валентин Коновалов, оңдайнаң тузаланып, республика чуртағҷыларынзар пу соох кӱннерде песнең, чарытхынаң тоғынчатхан чылығ пирҷең оборудованиенең сизіктіг тузаланарға паза палаларны хайығ чох артыспасха айланған.
Республикада чылығ пирҷең тус хайди иртчеткенінең пӱдіріг паза ЖКХ министрінің тоғызын толдырчатхан Анатолий Безлепкин таныстырған. Хайди ол искірген, 1 январьдаң 15 январьға теере ЖКХ объекттерінде 9 саай пол парған. Оларны чапчаң чох идерінҷе прай кирек тоғыстар апарылтыр, пӱӱнгі кӱнде тоғыстар ам даа Асхыс паза Орджоникидзе аймахтарында апарылча осхас. Ол саайларны пу чағында чох идібізерге пӧгінчелер.
Аннаң пасха прай даа котельнайларда хара тас читкіңе тимнелгені таныхталған. Хакасия правительствозы муниципальнай пӱдістерге пу чылға ол пӧгінге кӧрілчеткен субсидияларны амох пир салтыр. Анатолий Безлепкин олох туста хайдағ сидіксіністерге урунғаннарынаңар искірген. Аның чооғынаң, орындағы пос устаныс органнары сығыс килчеткен саайларны пос кӱзінең чапчаң чох идерге сыданминчалар. Ӧӧн сылтағлар - техника паза кізілер чидіспинчеткені. Пу сурығны пӧкчең оңдайлар табарға чӧп пирілген.
Хакасияның пазы Валентин Коновалов кӧп хоптар кірчеткенін таныхтаан. Кізілер ӧӧнінде чурттарында соох полғанына хоптанчаттырлар. Аны хоостыра ол пӱдіріг паза ЖКХ министерствозына мындағ айланыстарға чапчаң хай турарға чахаан.
- Орынзар парыңар, квартирада ноға соох полчатханының сылтағларын ілезіне сығарыңар, - пӧгін турғыс-хан ол. - Кізілер соохха тоңмасха киректер.
Чыылығның паза пір сурии Россия президентінің «майдағы» указтары, ол санда бюджетниктернің чал ахчазын кӧдірерінҷе, республикада хайди толдырылчатханынаңар полған. Пу сурығңа сан пиріснең чоох тутхан Хакасияның істеніс паза чонға тоғыс тапчаң министрінің тоғызын толдырчатхан Ирина Ахметова. Аның таниинаң, президенттің указында кӧзіділген прай 11 категория бюджет сферазы тоғынҷыларының (имҷілернің, ӱгретчілернің, культура тоғынҷыларының паза аннаң даа пасхазы) чал ахчазын кӧдірерінҷе тоғыс республикада тӱзімніг апарылған паза оларның чал ахчазы кирек синге читіре кӧдірілген. Ол тоғыс ам даа апарылча, пу чылға ол категорияларзар кірчеткен бюджет тоғынҷыларының чал ахчазын ӧскіреріне 200 миллион артиинаң салковай кӧріл партыр. ирина Ахметованың искіриинең, ол син ахча читкіҷе полар.
Президенттің указтарынзар кірбин халған бюджетниктердеңер чоохтаза, 1 октябрьдаң оларның чал ахчазын инфляция синінҷе ӧскір пирері кӧрілчеттір. Ирина Ахметованың чооғынаң, пӱӱнгі кӱнге аның сині 4,3 % полча. Амды республикада андағ тоғынҷыларның саны нинҷе полчатханын паза нинҷе ахча киректелерін ілезіне сығарарынҷа тоғыс апарыл сыххан. Аның соонаң, пу пӧгінні толдырар ӱчӱн, федеральнай кінзер ахчалығ полызығ сурап айланарлар.
Мыннаң республика правительствозы чыылииның азых чардығы тоозыл парған, пасха чардығы чабых оңдайнаң ирткен.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы