ХАРА ТАЛАЙ ХАЗЫНАҢ - СЫЙЫХТЫР
18.01.2019
Хабарлар
Алёна ТИМОФЕЕВА «Час ханат» ӧменің иң кічіг группа араласчыларынаң хада
Культура. «Час ханат» олған эстрада студиязы «Сочидегі Кӧлееде сағыннары» тиксі Россиядағы азых фестиваль-марығдаң чиңіснең айланған.
Хара талай хазындағы Сочи городта 7 - 11 январьда ирткен фестиаль-марығда пістің саблығ ӧменің 7-8 частығ хызыҷахтары устарынаң сынасханнар. Анда тиксі 1500 араласчы полған. Балетмейстер Алёна Сергеевна Тимофеева Россия синінде иртірілчеткен марыға 18 хызыҷахты апарған. Олғаннарның кӧбізі андағ пӧзік синде иртчеткен марығда пастағызын на араласхан.
Балетмейстернің таниинаң, фестивальда кӧрігҷілер хазнабыстың аймах пулуңнарынаң килген полған на ӧмені сценада чылығ удурлааннар. «Час ханат» олған эстрада студиязы жюринің паза пасха регионнардаң килген ӧмелернің хайиин матап тартхан. Алёна Сергеевнаның чооғынаң, прайзы ыраххы Хакасия Сочизер кічіг частығ хызыҷахтарны марыға ағыл килгеніне хайхаан. Че пістің «чылтызахтарыбыс» чолда сыдамах тудынғаннар, пір дее майыхпааннар тіп таныхтаан ол.
«Час ханат» ӧменің кічіг группазы позын пӧзік синде кӧзіткен. Оларға кӧрігҷілер дее, жюридегілер дее матап айа сапханнар. Ідӧк пістіңнер азых фестивальның араласчыларын хакас чонның кип-азаанаң хайхатханнар. Олар, «Мода театры» номинацияда аралазып, кӧрігҷілерге хакас чонның национальнай кип-азаан, стилизованнай костюмнарны паза хысхы кип-азахты кӧзіткеннер.
Балетмейстернің таниинаң, Хакасияның саблығ ӧмезіне Россия синінде иртірілчеткен марығны азарға ӱлӱс тӱскен. Прайзынаң пурун сценаа сығары ол сидік паза нандырығлығ кирек тіп таныхтаан Алёна Тимофеева. Аннаңар сценаа сығар алнында ол, хызыҷахтарны хуҷахтап, оларға чылығ сӧстер чоохтаан. Балетмейстер позы даа ӱгренҷілерінің ӱчӱн матап чӱрексеен. Че аның улуғ ӧрінізіне, палаҷахтар сценада чахсы паза пос тудынғаннар. Олғаннарның чооғынаң, прай зал оларға матап айа сапхан паза «Браво!» хысхырған. Пістіңнер Хара талай хазындағы Сочи городтаң ікі кубок ағыл килгеннер. Хызыҷахтарыбыс «Мода театры» номинацияда I степеньніг лауреат полыбысханнар, «Хореография» номинацияда - II степеньніг лауреат.
Алина Ивандаева тӧрт частығдаң сығара «Час ханат» ӧменің араласчызы полча. Ол Сочиде пастағызын на полғаннаңар, ағаа анда прай ниме хынығ полған. Аның чооғынаң, олар прайзы пальмаларны пос хараанаң кӧріп чапсааннар. Ідӧк ол ӧӧрелерінең хада Хара талай хазында ракушкалар теерген, аквапаркта суға сомған.
Милена Канзычакова ідӧк «Час ханат» студиязар пастағы ла чыл чӧрбинче. Анын сӧстерінең, оларны чылығ удурлааннаңар, ағаа марығда сценазар сығарға пір дее чочыныстығ полбаан.
- Марығ алнында чахсы тынанып алғабыс. Хара талайны кӧрерге чӧргебіс. Ідӧк Сочидегі аквапарк минің кӧңніме кірген. Анда чылӌаң пӧзік тағыӌахтар пар. Аннаң чылған кізілер прай кӧдірімнерінең суғзар тӱсселер, суғ прай саринзар матап чачырапча. Олғаннарға, тізең, чылӌаң тағыӌахтар пӧзік нимес иділген. Че андағ даа полза, мағаа уғаа хынығ полған. Улуғ ӧрінізіме, мин анда суға сомарға ӱгреніп алғам, - теен Милена.
Алёна Сергеевна марыға чӧрген палаҷахтар, Сочизер хатабох парып, андартын Гран-приліг айланарға пӧгінчелер тіп чоохтаан.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы