ЧОННЫ МУЗЫКА ПАЙРАМЫ САҒЫПЧА
25.01.2019
Хабарлар
Пресс-конференция. Хакас филармониязы кӧрігҷілерні хынығ ойыннарнаң чапсыдарға тимненче.
Пу неделяда Хакас филармониязында пресс-конференция ирткен. Хабарҷыларнаң культура учреждениезі директорының тоғызын толдырчатхан Вячеслав Инкижеков, хоос устағҷы Артур Марлужоков паза режиссер Юлия Белогурова тоғасханнар.
Пресс-конференция тузында килер айда иртер концерттердеңер чоох парған. Пастағы ойын 1 февральда 18.30 часта (6+) полар. Аны симфоническай оркестр тӧреен кӱнін таныхтап иртірер. Вячеслав Инкижековтың чооғынаң, пӱӱл саблығ ӧмее 19 чыл толча. Музыканттар концерттің пастағы пӧлиинде композитор Ф.Мендельсонның симфониязын толдырарлар.
Мероприятиенің ікінҷі чардығында, тізең, кӧрігҷілернің оркестр солисттері тимнеен улуғ нимес тоғыстарны истіп алар оңдай полар. Дирижерның таниинаң, кибір хоостыра программада аймах произведениелер полар, кӧзідімге, пӱӱл пастағызын на хакас композитор Оксана Алахтаеваның «Фантазии для флейты с оркестром» тоғызы толдырылар.
Чоохтирға кирек, пӱӱл - Хакас филармониязының танығлығ чыл. Культура учреждениезі тӧстелгеннең 30 чылын таныхтапча. Улуғ пайрамға чарыдылған концерт 9 февральда 16.00 часта (6+) нааҷылалған драма театрында иртер. Режиссер Юлия Белогурованың таниинаң, кӧрігҷілерні иң сіліг сарыннар, теелбектер, хайхастығ музыка сағыпча. Мероприятиенің пастағы чардығында чыылған чонны чайаачызынаң саблығ артисттер Евгений Улугбашев, Людмила Арыштаева, Мария Янгулова, Вячеслав Кученов, Нина Идимешева, Зинаида Аршанова ӧріндірерлер. Артисттернең хада сценаа «Ӱлгер», «Кӱн сузы» паза «Хан сын» ансамбльлар сығарлар. Чалахай иирнің ікінҷі пӧлиинде симфоническай оркестр, классика паза эстрада ӧмелері, «Каданс» хор паза «Иренек хан» рок-ӧме аралазарлар. Пайрамнар сыйыхтар чох иртпинче, аннаңар артисттерні дее, кӧрігҷілерні дее кӧп чапсых ниме сағыпча.
Мында пір ниме таныхтирчыхпын, филармонияның улуғ мероприятиелеріне чон чахсы чыылысча, аннаңар хынчатхан артисттерні истіп аларға сағынчатхан улусха билеттерні азынада садызып аларға кирек.
Пасха концерттердеңер хабарчыларға Артур Марлужоков искірген. Артур Викторовичтің таниинаң, ағаа ай сай артисттердең, чайаачы ӧмелердең кӧп сурыныс пічии кірче, че филармонияның устағ-пастаа иң артыхтарын на таллапча. Кӧзідімге, 17 февральда 16.00 часта (6+) кӧрігҷілерге баритон Владислав Косарев (Москва) ӧрініс сыйлир. Таланттығ кізі Хакасиянаң пик палғалыс тутча. Аның концерттері сыбыра пӧзік синде иртче. Ырҷының амғы программазында романстар, эстрада сарыннары полар. 18 февральда 19.00 часта (6+), тізең, пістің кізілерні саблығ «Байкал» сарыннар паза теелбектер театры (Бурятия) чайаачызынаң хайхадар. Пӱрӱт артисттері Хакасиязар «Азияның пызыңназы» программаны ағылчалар. Теелбектер пастыра олар кӧрігчілерні хыдат, корея, япон паза пасха даа азия чоннарының культуразынаң таныстырарлар.
20 февральда 18.30 часта (6+) Хакасияның чон артизі Людмила Арыштаеваның концерті иртер. Саблығ чир-суғҷыбыс хайдағ даа жанрда сарнирға кӱс. Наа ойынны Людмила Александровна «Мин сағаа чылтысты сыйлапчам...» адап салтыр. Андар ол аймах чылдағы программалардаң алылған сарыннарны кир салған.
Февраль айның халғанҷы кӱннерінде Хакас филармониязы хатап «Джинсалығ симфония: тилекейге саблығ рок-хиттер» концертті кӧзідер. Аның премьеразы 19 декабрьда 2018 чылда ирткен. Хысхаҷах тус аразына филармонияның пу проекті иң артыхтарның санына кір парған. Артисттер кӧрігҷілернің сурынызынаң аны январьда ікі хати кӧзідерге маңнанғаннар. Амды «Джинсалығ симфонияны» 25 паза 27 февральда 19.00 часта (6+) истіп аларға чарир. Пу проект хоостыра пазағы ойын пӱӱл декабрьда ла полар.
Чооғының халғанҷызынзар Артур Марлужоков тимнелген ойыннар кӧрігҷілернің кӧңніне кірер тіп ізенізінең ӱлескен.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде