ОЛҒАННАР ЧАЙААН АНГЕЛЛЕР
01.02.2019
Хабарлар
Кӧзідіг. Ағбанда «Чиңіс» культура кінінде «Тилекей ангеллері» олғаннарның хоостар кӧзідии тоғынып пастады.
Пылтыр «Тилекей ангеллері» улуғларның хоостар кӧзідии Ағбанда тоғынғанох. Чонға аны «Чылтыс» хоостар галереязында кӧріп аларға чарир полған. Анда аймах хазналардаң «Тилекей ангеллері» чоннар аразындағы арт-проектке хозылған чайаачыларның 70 азыра тоғызы араласхан. Андадох олғаннарның мындағ кӧзідии тимнелче тіп искіргеннер. Амды Ағбанда «Чиңіс» культура кінінің фойезінде кічіг частығларның тиксі 150 хоозы кӧзідігде араласча.
Кӧзідіг азылған кӱн чиңісчі олғаннар iҷе-пабаларынаң андар килгеннер. Залзар ирткендӧк, ах кип-азахтығ абахай омалығ «ангел» хыс прайзының хайиин тартхан. Ол хыстың ады Юлия Тарасенко полтыр. Кічіг-улуғлар аннаң хада сомға суурынып аларға маңзырааннар.
Піди сизінгенде, олғаннарның ангеллер омазы паза харахтары улуғ арах хоостал партыр. Аннаңар даа оларның кӧрізі чарых паза ӧтіг пілдірче. Палалар сағынған сағыстарын кӧні читіредірлер. Полған на хоосты олар чарыт пиргеннер. Проектте 14 часха теере олғаннар араласханнар. Хоостар аразында иң кічіг араласчы ӱс частығ Дима Алыповтың тоғызын кӧр салғам. 10 частығ Алина Куюкова чайаан ангелінеңер піди пасча: «Мин позымның ангеліме тың хынчам. Ол мині узупчатсам даа хайраллапча, арачылапча». Юлия Прудникова чонзар мындағ сӧстернең айланча: «Кізілер! Мин сірерні чуртаста алҷаастар итпеске хығырчам. Чағын кізілеріңні хомзындырбаңар. Мин сірернің ӱчӱн сурынчам, пазырчам!»
Елена Дмитриевна Тохтобина Аня хызыҷаанаң кӧзідіг азылчатханында араласханнар. Аня Тохтобина 8 частығ, ол позының ангелінеңер піди пас салтыр: «Ангел чир ӱстӱнзер кізілернең чағын танызып алар, полыс пирер ӱчӱн тӱскен». Матвей Данилов, тізең, хоозын «Часка хузы паза чарых чӱрек» адап салтыр. Мындағ паза пасха даа чайаачы тоғыстар кӧзідігні чазапчалар.
«Тилекей ангеллері» олған арт-проекттің Ағбандағы кураторы - Ираида Бахарева. Ол, палаларның тоғыстары хоостыра сағыстарынаң ӱлезіп, улуғларның хайиин пала кирексіністеріне тартхан. Кічіглерге чылығ хайығ, хыныс паза арачылағ кирек. Олғаннар чир ӱстӱнде амыр чуртас ползын тіп сағынчалар. Хоос искусствоның тилекейде чыылған хомай нимелерні чох идер кӱзі парох тіп таныхталған анда.
Ағбанда читі пала чиңісчі санында полыбысхан. Тиксі араласхан читі муң тоғыс аразында анзы махтағлығ чидіг. Оларның тоғыстары «Чоннар аразындағы календарьда» Чехияда сығар.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы