ТӦРЕЕН ЧИРІ ЧЫЛЫҒ УДУРЛААН
01.02.2019
Хабарлар
Культура. Ағбандағы чииттер ӧргезінде Руслан Ивакин чир-суғӌыларына пастағы концерт пирген.
Русланны пістің чир-суғҷыларыбыс чахсы пілчелер. Ол Интернет пастыра кӧрігҷілерні хайдағ концерттерде араласчатханынаң, наа пазылған сарыннарынаң тӧреміл таныстырча. Аның чайаачызы кӧп кізінің хайиин тартча. Аннаңар Хакасияның чуртағҷылары Русланның пастағы концертін чидікпин сахтааннар.
Таныхтирға кирек, Руслан Ивакин (Gurude - сценадағы ады. - Авт.) этника оңдайы хоостыра кӧглепче. Ол позының кӧглерін хакастарның фольклорына, кибірлеріне тӧстеніп пасча. Руслан, композитор, Хакасияның чон артизі, Хакасия искусствозының саблығ деятельі Татьяна Шалгинованың холында ӱгреніп, хакас сарыннарынаң паза кибірлерінең танысхан. Ол тоғазығ ағаа чайаачызында пос чолын таап аларға оңдай пирген.
Кізілер, Руслан Ивакин Ағбанда концерт пирердеңер хабарны ис салып, билеттерні азынадох алып пастааннар. Концерт алнында Ағбандағы чииттер ӧргезінің фойезінде чон тығырама полған. Гардеробсар узун теес турған. Ідӧк фойеде кӧрігҷілерге ырҷының «Шамбала» альбомын садызып алар оңдай полған. Аны Руслан ӱр ниместе ле чарыхха сығарған.
Концерт пасталғанда, кӧрігҷілер артистті чылығ удурлааннар, матап айа сапханнар. Кӧгҷі пастағы сарынны хакас тілінең толдырған. Сцена ортызында сарчын турған. Аны ағаа арғызы Антон Овдин ит пиртір. Руслан Ивакин сценадаң ағаа паза концертті тимнирге полысханнарға алғызын читірген.
Руслан тӧреен чир-суунда пастағы концертін тиктең нимес 25 январьда иртірген. Аның чайаачызына Татьяналар улуғ хозым иткеннер. Чиит кӧгҷіні музыкаа ӧӧнінде Татьяна аттығ педагогтар ӱгреттірлер. Аның іҷезінің ады ідӧк Татьяна полтыр. Концерт пасталғанда, чиит артист іҷезіне ах розалар читірген.
Чиит ырҷы кӧрігҷілерге тиксі 20 азыра сарын толдыр пирген, чарымы хакас тілінең полған. Оларның санында «Іҷенің часказы», «Сарығ тууп маймаам», «Туғаннар», «Алас» паза даа пасхазы. Руслан Ивакин хакас сарыннарны толдырар алнында орыс тілліг кӧрігҷілерге ырда нимедеңер чоохталчатханнаңар чарыт пир турған. Ідӧк ол казах тілінең «Косни Корлан» сарынны ырлаан. Хайзы Естайның паза Корланның хынызынаңар. Аны истіп, сағызымнаң чиит тузымзар парыбысхам. Хайда пастағы кӧӧленіс, пастағы ачырғас халған.
Ідӧк Руслан кӧрігҷілерні «Таңма» паза «Тӧреен чирім» наа сарыннарнаң ӧріндірген. Оларның премьеразы чахсы ирт парған. Кӧрігҷілер ағаа «Браво!», «Молодец!» тіп хысхырғаннар. Ідӧк олар ағаа чахайахтар читіргеннер. Кем-де, тізең, ағаа пос иткен торт сыйлап пирген. Андағ сыйыхты кӧрігҷі кӧгҷее читіргенін мағаа пастағызын на кӧрерге киліскен.
Ырҷы Москвадаң Ағбанзар музыканттарны ағыл килген. Олар армян, испан чоннарның кӧг тиріглерінең ойнааннар. Аннаңар Руслан Ивакин концертте аймах чоннарны піріктіріп ырлаан тиирге чарир.
Концерт тоозылғанда, чыылған чон, ӱр тараспин, матап айа саап, кӧгҷіні сценазар хатап хығырған. Ол, хатабох сценаа сығып, кӧрігҷілерге «Ибімзер чол» сарынны толдырған. Анаң на кӧрігҷілер чалахай кӧңніліг тарасхлааннар.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы