ЧАЙААЧЫЛАРЫН ЧОНҒА ЧАРЫТЧАЛАР
13.02.2019
Хабарлар
Хакас филармониязына - 30 чыл. 9 февральда драма театрында улуғ пайрам ирткен. В.Г.Чаптыковтың адынаң Хакас филармониязы 30 чылын таныхтаан.
Пайрам тузында «Кӱн сузы» ансамбльның артисттері иң сіліг теелбектерні толдырғаннар.
КІЗІЛЕР КОНЦЕРТКЕ АЗЫНАДА ЧЫЫЛЫСХАННАР. ПРАЙЗЫ ЧАЛАХАЙ КӦҢНІЛІГ: ХЫНЧАТХАН АРТИСТТЕРІНЕҢ ТОҒАЗАРЛАР НООЗА. КӦРІГҶІЛЕРНІҢ ПІРЕЕЗІ ХАКАС ФИЛАРМОНИЯЗЫНЫҢ ПАСТАҒЫ КОНЦЕРТІНДЕ ПОЛҒАН, НЕКЕ. ОЛ 9 ФЕВРАЛЬДА 1989 ЧЫЛДА ИРТКЕН. АНДАДА ХАКАС АВТОНОМ ОБЛАЗЫНЫҢ ЧУРТАҒҶЫЛАРЫН ФИЛАРМОНИЯ АЗЫЛҒАНЫНАҢ СССР-ның ЧОН АРТИЗІ ИОСИФ КОБЗОН АЛҒЫСТИРҒА ӦНЕТІН КИЛГЕН. ОЛ ТУСТАҢ ПЕЕР 30 ЧЫЛ ИРТ ПАРДЫ.
ПӰӰНГІ КӰНДЕ ХАКАС ФИЛАРМОНИЯЗЫ СИБИРЬНІҢ ИҢ САБЛЫҒ ӦМЕЛЕРІНІҢ САНЫНА КІРЧЕ. ПІСТІҢ АРТИСТТЕРНІҢ ЧАЙААЧЫЗЫНА ВЕЛИКОБРИТАНИЯНЫҢ, ИТАЛИЯНЫҢ, ФРАНЦИЯНЫҢ, ГЕРМАНИЯНЫҢ, РОССИЯНЫҢ АЙМАХ РЕГИОННАРЫНЫҢ КӦРІГҶІЛЕРІ АПТАТТЫРҒАННАР. РЕСПУБЛИКА ЧУРТАҒҶЫЛАРЫ, ТІЗЕҢ, ХАКАС ФИЛАРМОНИЯЗЫНЫҢ ОЙЫННАРЫН ХАҶАН ДАА ЧИДІКПИН САҒЫПЧАЛАР.
Пайрамнығ иир театр прологынаң азылған. Артисттер ӧменең улуғ нимес ойын кӧзіткеннер. Саблығ хайҷы Евгений Улугбашев, чатхан саап, алыптығ нымахты ысханда, залдағы чонның чӱрее-паары хайылған. «Кӱн сузы» ансамбльның артисттерінің теелбектері кізілернің кӧңнін уламох кӧдірген. Олох туста экранда Хакасияның чапсых орыннары кӧзіділген. Тӧреен чирібіс хайдағ хайхастығ! Оңно тағлары, Пойар пічіктері, Ивановскай кӧллер... Оларны кӧріп, кізінің чӱреенде поғдархас паза ӧрініс тӧріпче. Пу прологты тимнеп, ӧмедегілер пістің филармония хаҷан даа Хакасиянаң, аның чонынаң пик палғалыс парғанын кӧзіткеннер.
«Ӱлгер» ансамбльның сарыннары кӧрігҷілернің кӧңнін кӧдірген
Улуғ нимес ойын соонда сӧс Хакасия пазы Валентин Коноваловха пирілген. Валентин Олегович, саблығ культура учреждениезінің артисттерін, тоғынҷыларын, ветераннарын алғыстап, оларға наа чидіглерге чидерге, кӧрігҷілерні мыннаң мындар ӧріндірерге алғаан.
Кӧп чылығ сӧс чайаачы устарға Ӧӧркі Чӧп кнезі Владимир Штыгашев читірген. Чооғында Владимир Николаевич Хакас автоном облазының устағ-пастаана, филармонияны азып, нинҷе сидіксініс тобырарға киліскенін сағысха кирген. Хызылчар крайының устағҷылары ол сағыстаң кизе-тоғыр полтырлар.
В.Н.Штыгашевтің сӧстерін, сценаа сығып, Хакасияның чаа, істеніс, Тирігліг кӱстер паза право хайраллаҷаң органнар ветераннары чӧбінің кнезі Галина Трошкина киречілеен. Галина Алексеевнаның чооғынаң, Хакас филармониязын КПСС ЦК-зының ӧӧн хачызы Михаил Горбачёвтың кӧні чарадиинаң на азып алғаннар. «1988 чылда сентябрьда СССР-ның устағӌызы Михаил Горбачёв тоғыс чорығынаң Хызылчар крайынзар килген. Мин ол туста Хакас автоном облазының толдырығлығ комитедінің кнезі полғам. Михаил Сергеевичнең тоғасханда, филармонияны азар сурығны кӧдіргем. М.С.Горбачёв пістің областьха удур парған, тӧрт ай пазынаң наа культура учреждениезі тоғынып пастаан. Мында хайди даа пастағы директор Людмила Бранчукованың, хоос устағӌы Герман Саражаковтың, Хакасияның чон артисттері Владимир Чаптыковтың, Клара Сунчугашеваның, Владимир Терешковтың тӱзімніг тоғызын таныхтирға кирек. Оларның кӱстенізінең филармония, азахтанып, кӧрігӌілерге ӧрініс сыйлапча», - таныхтаан Галина Трошкина.
Хакасияның культура министрі Леонид Ерёмин саблығ ӧменің пӱӱнгі чуртазынаңар чоохтаан. Ол Хакас филармониязына Россия синіндегі проекттерде мыннаң мындар ӧткін аралазарға, республиканы ырахха сабландырарға, кӧрігҷілерні хынығ ойыннарнаң хайхадарға алғаан.
Чоохтирға кирек, пайрамнығ иир тузында кӧп артист паза тоғынҷы Аарластығ паза алғыстас пічіктеріне турысхан. Оларның санында Хакас филармонияның устағҷызы Вячеслав Инкижеков, теелбекчілер Ирина Доможакова, Анжелика Топоева, Аима Амзаракова, музыканттар Анна Худоярова, Аржан Туденев, Вячеслав Асочаков, звукорежиссер Юрий Перминов, кип-азах хоосчызы Марина Шахманова, экономист Надежда Котюшева полғаннар.
Чалахай иир хайхастығ концертнен узарадылған. Аның пастағы чардығында кӧрігҷілернің хакас сарын-тахпахтарын истіп алар оңдай полған. Полған на артистті залдағы чон ізіг айа сабызынаң удурлаан. Евгений Улугбашев, Нина Идимешева, Людмила Арыштаева, Вячеслав Кученов, Артур Марлужоков хайди сарнадылар! Изебі чох таланттығ чир-суғҷыларыбысты кізілер таң чариина теере истерге тимде полғаннар. «Улгер» паза «Кӱн сузы» ансамбльларның араласчыларының устарына хайди морсынмас!
Олар турғысхан «Алтын Кӧӧк» хай-балетті Венецияда паза Канныда кізілер харах албин кӧргеннер. Владимир Кирбижековты алынҷа таныхтирға кирек. 2000 чылдаң сығара бас ӱнніг ырҷы Хызылчардағы опера паза балет театрында істенче, че Хакас филармониязынаң пик палғалыс тутча. Кӧзідімге, ирткен кӱскӱзін ол 30-ҷы чайаачы сезонны азарында араласхан. Танығлығ концертте Владимир Кирбижеков «Кӱмӱс тӱстер» сарынны толдырған.
Ӧӧркі Чӧп кнезі Владимир ШТЫГАШЕВ Хакас филармониязының устағӌызы
Вячеслав ИНКИЖЕКОВХА Аарластығ пічік читірче
Пайрамнығ мероприятиенің ікінҷі чардығы классика произведениелерінең, «Князь Игорь», «Норма» операларның ӱзіктерінең, эстрада ырларынаң пӱткен. Симфоническай оркестр дирижер Вячеслав Инкижековтың устаанынаң Г.Доницеттинің «Полктың хызы» операзының увертюразын толдырған. Чалахай музыка кізілерге соох хысхы тоозылар, хар хайылар, ағын хустар Хакас чирінзер айланарлар тіп ізеніс пирген. Зинаида Аршанова «Каданс» хорнаң хада «Норма» операның ӱзігін чалтырама толдырыбысхан. Мария Янгулова ідӧк морсымнығ кӧрінген. Чайаачы ус концертке «Фиалка Монмартра» опереттадаң алылған Нинонның сарынын таллап алтыр. Чалахай иирнің халғанҷызынзар Артур Марлужоков, Даниил Тарасов, Зинаида Аршанова, Мария Янгулова, «Каданс» хор паза олған филармониязының кічіг артисттері Л.Бетховеннің «К радости» одазын толдырғаннар. Хайдағ сіліг кӧг! Пістің ырҷыларның ӱннері чи хайдағдыр! Оларның устарына аптаттырып, кізілер матап айа сапханнар.
Хакас филармониязының 30 чылына чарыдылған концерт пӧзік синде ирткен. Музыканттар, ырҷылар, теелбекчілер кізілерге нинҷе ӧрініс сыйладылар. Ізенчебіс, андағ сидіксіністерде тӧстелген филармонияның чуртазы узах полар, кӧрігҷілернің саны чылдаң чылға хозылар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде