ИЛБЕК ӰЛӰКӰННІ ТУРЫСТЫРА ИРТІРЕРГЕ
15.02.2019
Хабарлар
Чыылығда Ветераннар чӧбінің кнезі Галина ТРОШКИНА чоох тутча
Чиңіс кӱніне тимненіс. Хакасияның правительствозында Илбек Ада чаадағы Чиңістің 74-ӌі чылына тимненер комитеттің чыылии ирткен. Аның тоғызын Хакасияның пазы Валентин Коновалов апарған.
Чыылығның тоғызын азып, Хакасияның пазы Валентин Коновалов таныхтаан:
- Пӱӱн піс Илбек Ада чаадағы Чиңістің 74-чі чылына турыстыра тимненер сурығларны ӱзӱрербіс. Ӱлӱкӱнні пӧзік синде иртірерге кирек. Алынҷа улуғ хайығ саларға кирек Илбек Ада чаа ветераннарына, тыл істенҷілеріне паза чаа палаларына. Чаа палаларының правоҷа статузы пістің регионда ам даа читіре тимнелбеен, андағ тоғыс пу туста узарадылча. Республика чуртағҷылары пу ӱлӱкӱн хайдағ илбек полчатханын, Чир-суубысты арачылап, нинҷе кӧп кізі чуртазын пир салғанын чахсы пілзіннер. Хысха чооғын тоозып, Хакасияның пазы ӱлӱкӱнге тимненер алынҷа мероприятиелер ӱчӱн нандырығлығ устағҷыларға сӧс пирген. Хайди искірген республиканың юстиция паза региондағы безопасность киректерінҷе министрінің тоғызын толдырчатхан Сергей Ромашов, пайрамнығ маршха тимненіс амох пасталча. Пу мероприятиее тимненчетсе, мының алнындағы чылларның опыдынаң тузаланарлар, ідӧк ағаа наа оңдайлар кирілер. Тимненіс тоғыстарында культура, ӱгредіг, юстиция министерстволары, Ағбандағы гарнизонның устаа, город администрациязы паза пасха даа органнар аралазарлар. Маршта 15 колонна иртер, анда чаачылар, МВД, УФСИН тоғынҷылары паза пасха даа структуралар, ідӧк чаадағы фронттарның 10 штандарты, Пирятин дивизиязы полктарының знамялары, чаа тузындағы 12 техника аралазар. Центральнай чаа округынзар хоза 10 техника паза ікі артиллерия орудиезін пирердеңер сурыныс ызылған. Ӱлӱкӱн алнында пис репетиция иртірілер. Чоллардағы чӧрісті МВД сыныхтағда тудар.
Илбек Ада чаа ветераннарынаң, чаа палаларынаң, тыл істенҷілерінең хайдағ тоғыс апарылчатханнаңар чоохтаан Хакасияның социальнай арачыланыс министрінің тоғызын толдырчатхан Наталья Дьяченко. Аның чооғынаң, Хакасияда Илбек Ада чааның 115 кинегі паза араласчызы чуртапча. Наталья Михайловна чаа ветераннарына, палаларына, тыл істенҷілеріне ӱлӱкӱн алнында нинҷе ахча пирердеңер, чурттарын сыныхтап, оларны тыхтир тоғыстарға ахчалығ хабазығ позыдылардаңар искірген. Ідӧк А.И.Лебедьтің адынаң ветераннарның реабилитация кінінде пӱӱл нинче ветеран тынанардаңар чоохтаан. «Чиңіс чааҷылары» книганың пизінҷі томы тимнел партыр, аны типографияда сығарарға тимделер.
Хакасияның чааҷылар комиссары Виктор Максимчук Россияның арачыланыс министерствозы иртірчеткен «Сирийский перелом» чаа-патриот акциязынаңар искірген. Хайди ол чоохтаан, тимір чолҷа 10 азых вагоннығ эшелон Москвадаң Владивостокка теере, анаң нандыра парар. Вагоннарда Сириядағы чаалазығларда террористтер тузаланған аймах тиріглер полар. Поезд Москвадаң 21 февральда тибірир, ол 60 азыра городта тохтир. Полған на городта ӱс час азыра турар, аның хыринда пайрамнығ митингтер иртірілер. Ағбанда ідӧк тимір чол вокзалы алнындағы ачыхта митинг иртер, ағаа тимненҷең тоғысчы ӧме тӧстирге кирек. Андар халых пірігістерінің кізілерін, чииттерні, ветераннарны кирерге чарир. Пу эшелонда Сириядағы чаалазығлар араласчылары экскурсовод полып парарлар. Ағбанда поезд 17 мартта тохтиры кӧрілче.
ДОСААФ-тың республикадағы пӧлиинің кнезі Михаил Куимов пайрамнығ маршта чаа тузындағы техника аралазардаңар чоохтаан. Иргі автомобильлерні Харатастағы, Минсуғдағы музейлердең ағылардаңар чоохтазығлар апарылча. Прай 12 автомашинадаңар чоох парча, оларны тимнирге ДОСААф-тың ахчазы чидіспес, аннаңар республика ӱлгӱлерінең полызығ киректелер. Автомобильлерде чаа тузындағы кип-азахтығ чааҷылар полар, театрализованнай кӧзідіг пирілер.
Хакасияның Ветераннар чӧбінің кнезі Галина Трошкина прайзының хайиин амғы ӱлӱкӱнні хайди даа Илбек Ада чаадағы Чиңістің 75-чі чылын иртірерінең палғалыстырарына тартхан. Аны пӧзік синде иртірібізерге киректелче теен ол. Хайди Галина Алексеевна таныхтаан, Москвада полған на фронтовикке алынҷа карта азылых. Анда аннаңар прай искіріглер пирілче, прай кирексіністері санға алылча. Андағ опытты республикада кирерге чарир. Ідӧк чиит тӧлні патриотизмге ӱгредерге, олар пістің матыр чир-суғҷыларыбысты чахсы пілзіннер. Музейде Чаа паза істеніс залын тимнеп саларға, анда Хакасия чаадағы Чиңіске хайдағ хозым иткені кӧзіділзін. Пістің чир-суғҷыларыбыстың, Совет Союзының 35 Матырының паза Слава орденнің 17 толдыра кавалерінің портреттерін тимнеп саларға кирек. Полғанына ла бюст турғызарға кӧп ахча киректелер. Пирятин дивизиязы полктарының чаадағы знамялары музейде сӱлейке алтында хайраллалзыннар, мындағ мероприятиелерге оларның хобырғаннарын идіп аларға кирек. Амды «Чиңіс чааҷылары» книганың 6-ҷы томы тимнелче.
Чыылығда ідӧк пасха даа устағҷылар чоох тутханнар.
Валентин Коновалов чыылығны чапсых искірігнең тоосхан. Хакасия пазы Россия президенті Владимир Путиннің Аарластығ пічиин Россияның Журналисттер пірігізінің республикадағы пӧлиинің кнезі, «Хакасия» газетаның ӧӧн редакторының орынҷызы Ольга Ширковецке читірген. Ідӧк СМИ-ларны тилідеріне салымнығ хозым итчеткен, ам даа тӱзімніг тоғыс апарчатхан ӱчӱн, Россия президентінің алғыстас пічіктерінең сыйыхтатханнар пістің «Хабар» газетабыстың хабарҷызы Илья Топоев, «Хакасия» ГТРК-ның хабарҷылары Алексей Боргояковнаң Виктор Лушников, ідӧк «Хакасия» газетаның хабарҷызы Татьяна Михеева. Прайзыбыс ол алғыстастарға хозылчабыс.
Автор :
Николай СУЛТРЕКОВ Сом Дмитрий СУНЧУГАШЕВТИ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы