ХГУ-наң ГИТИС ПІРГЕ ТОҒЫНАРЛАР
27.02.2019
Хабарлар
Кирек чӧптезіг. Хакас хазна университедінде Россияның театр искусствозы институдының - ГИТИС-тың ректоры Григорий Заславскийнең тоғазығ ирткен.
Тоғазығда вузтар устағҷылары наука паза ӱгредіг саринаң пірге тоғынардаңар чӧптезігде хол салғаннар. Аны хоостыра аймах оңдайлығ теелістер кӧріл парған. Іди ГИТИС-тың иң чахсы ӱгретчілері ХГУ-ның искусство институдындағы ӱгретчілерге паза студенттерге аймах мастер-класстар, лекциялар, тоғазығлар, квалификация кӧдірҷең курстар иртір турарлар. Ідӧк театр вузын тоосчатханнар, Хакасияда стажировка иртіп, мында ойыннар турғызарлар.
- Пу чӧптезіг піске улуғ нандырығлығ, - таныхтаан ХГУ ректоры Татьяна Краснова.
- Піс амғы тустағы кӧстеглер хоостыра студенттерні тимнирге кирекпіс. Ол пістің ӧӧн пӧгінібіс. Пӱӱл Хакас хазна университеді 25 чылын таныхтапча, аннаңар пу чӧптезіг вузха наа хаалағ полар тіп сағынчам.
- Вузтарнаң пірге тоғынарында пістің опыт пар, че Сибирьдегі университеттер аразында пу пастағы чӧптезіг, - таныхтаан ГИТИС ректоры Григорий Заславский. - Ыраххы регионнардағы чииттер, хазнабыстың ӧӧн городынзар киліп, нандыра айланарға хынминчалар. Ол ағырсымнығ сурығ. Аннаңар мындағ пірге тоғыснаң піс, чииттерні ӱгредіп, оларны Хакасияда тут халарға полыс пирербіс.
Пу улуғ проект чуртасха киріліп пастабысхан. Пастағы лекцияны искусство институдының паза музыка колледжінің студенттеріне ГИТИС-тың театроведение факультедінің устағҷызы, Россияның наука академиязының искусствознание институдының наука тоғынҷызы, театр критигі Александр Вислов хығырған.
Автор :
Хакасияның ӱгредіг паза наука министерствозы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде