ЧИИТТЕР ЧАЙААЧЫ УСТАРЫН КӦЗӀТЧЕЛЕР
27.02.2019
Хабарлар
Чемпионат араласчылары
Пу чемпионат 25 февральда азылған. Ол 1 мартха теере иртер. Анда 151 ӱгренҷі паза студент 16 кӧрімҷе марығлазарлар. Олар аймах-пасха специальностьтарҷа устарын кӧзідерлер. Прай тилекейде иртчеткен «WorldSkills» марығ тоғысчы специальностьтарын кӧдірер пӧгіннең тӧстелген.
Хакасиязар араласчылар Омсктаң, Томсктаң, Тува Республикадаң, Москвадаң, Хызылчардаң паза Ямало-Ненецкай автоном округынаң килгеннер. Мероприятие чииттер парадынаң азылған. Марығласчатханнарны алғыстирға Хакасия пазы орынҷызының тоғызын толдырчатхан Татьяна Курбатова сценаа сыххан.
- Хакасия правительствозының адынаң прайзын алғыстапчам. Марығларда сірерге оң ползын, чахсы сағыстар тӧрізін. Тоғызыңар чӧпсіндірзін, кӧңніңерге кірчеткен специальность тарны таллап алғаннарыңа ізенізіңер чітпезін.
Эксперттерге марығлар араласчыларының тоғыстарына чӧпсінерге алғапчам. Сын чарғыҷылар полыңар, - таныхтаан Татьяна Курбатова.
Чемпионат иртірілчеткен тус аразына аның кибірлері тӧстел парған. Оларның пірсі марығ араласчылары сирт пирчелер.
Чииттер сын марығлазарға, удур-тӧдір улуғлазарға сӧс пиргеннер. Оларның тоғыстарын аймах регионнардаң килген эксперттер паалирлар.
Чемпионат араласчыларына алындағы чыллардағы марығ чиңісчілері Ағбандағы пӱдіріг техникумының студенті Никита Родионов паза Хакасияның профессиональнай технология, экономика паза сервис колледжінің студенті София Плеева чӧптер пиргеннер.
Коммунальнай хоных паза сервис техникумның ікінҷі курзының студенті Пётр Артонов столяр специальностьха ӱгренче. Аның чооғынаң, пастағы кӱнде марығласчатханнар кемге хайдағ тоғыс орны киліс парарына ӱлӱс тастааннар.
- Піске кӧзенек идерге кирек. Ол тоғысха 12 час пирілер. Тоғызымны чахсы толдырыбызып, чиңіс тударына ізенчем. Техникум соонаң мебель итчеткен предприятиеде тоғынарға пӧгінчем, - тіпче Пётр Артонов.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде