«ЧАСХЫ ТАМҶЫХТАРЫ» - ШИРА ЧИРIНДЕ
26.03.2019
Хабарлар
Шира аймааның Азах Сӧӧт аалында саблығ драматург, кибелісчі М.Е.Кильчичаковтың 100 чазына чарыдылған «Часхы тамҷыхтары» фестиваль ирткен.
Фестиваль Шира аймаандағы культура, чииттер политиказы, спорт паза туризм управлениезінің усгағҷызы Василий Талановтың алғыс сӧстерінең пасталған. Анаң сӧс пирілген пістің саблығ тахпахчыбыс Вера Арыштаеваа. Ол чыылған чонны тахпахтап алғыстаан, анаң чоохтап пирген, хайди ағаа айтыстарда Михаил Кильчичаковнаң тоғазарға киліскен. Паза Азах Сӧӧт аалдағы библиотеканың тоғынҷызы Валентина Барженакова саблығ кибелісчідеңер чоох тутхан. Ідӧк Михаил Еремеевичтің чуртазынаңар паза чайаачызынаңар мультимедиа полызиинаң кӧзідіг полған.
Фестиваль ӱс номинацияҷа ирткен: «Хоос сӧс», «Вокал» паза «Теелбек». Анда араласханнар Целиннай, Тоғыр чул, Азах Сӧӧт, Тоғырхы, Чоохчыл ааллардағы школалар ӱгренділері.
«Часхы тамҷыхтары» фестивальны ікі ӱгретчі апарған: Чоохчылдағы школадаң Елена Амзаракова паза Тоғыр чулдағы школадаң Галина Тюдешева. Араласчыларның узын паалааннар Ширадағы школаның ӱгретчізі Татьяна Субракова, «Шира кӧл» палалар санаторийінде тоғынчатхан ӱгретчі Евгений Фрузоров паза Шира аймааның тахпахчызы Мария Зелеева.
«Теелбек» номинацияда пастағы орынны Чоохчылдағы Культура туразының «Алтынай» ӧмезі холға кирген. Ікінҷі паза ӱзінҷі орыннарны Шира аймаандағы Культура туразының теелбек ӧмелері алғаннар. «Вокал» номинацияда пастағы орынға Тоғыр чулдағы школаның ӱгренҷізі Екатерина Кокова турысхан. Ікінҷі орында Чоохчылдағы школаның ӱгренҷізі Настя Амзаракова пол парған. Ӱзінҷі орынны Тоғыр чулдағыох школаның ӱгренҷізі Мария Байдошева алған.
«Хоос сӧс» номинацияда араласчылар ікі группаа чарылғаннар: 7 - 11 частығлар паза 12 - 17 частығ олғаннар. Кічіглернің аразында пастағы орынны алған Азах Сӧӧт аалдағы школаның ӱгренҷізі Тимур Арыштаев, ікінҷі орынны - Чоохчылдағы школаның ӱгренҷізі Настя Барашева, ӱзінҷі орынға турысхан Тоғыр чулдағы школаның ӱгренҷізі Арина Кокова. Ікінҷі группадағы олғаннарның аразында пастағы орынны Карина Кокова (Чоохчыл) алған, ікінҷізін - Кристина Абдина (Тоғыр чул), ӱзінҷі орынға сыххан Ангелина Аланова (Азах Сӧӧт).
Пастағы ӱс орынға турысханнарға Шира аймаандағы культура, чииттер политиказы, спорт паза туризм управлениезінің грамоталары пирілген, пасхазы, араласхан ӱчӱн, пічіктер алған. Таныхтирға кирек, пӱӱл фестиваль уламох пӧзік синде ирткен. Анда 32 пала араласхан. Чылдаң чылға оларның саны ӧсче. Марыға хакас кип-азаа ӧнетін тігілче. Пос тіліне чиит тӧлібіс кӧӧлҷе айланча. Пу фестивальда сыйыхтығ орыннарны алған палалар республика синінде иртер М.Е.Кильчичаковха чарыдылған марығда аралазарлар.
Автор :
Надежда СОЛОМАЧЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы