ИҢ АРТЫХТАРНЫҢ АРТЫХТАРЫ
27.03.2019
Хабарлар
«Чыл журнализі-2018» марығның чиңісчізі Анатолий СУЛТРЕКОВ
Хабарӌылар пайрамы. Пӱӱл «Хакасия, алнынзар!» республика марии тоғызынҷы хати иртті. Аның чиңісчілерін пайрамнығ чыылығда алғыстааннар.
Хакасиядағы СМИ-ларда тоғынчатхан улус ол ӱлӱкӱнні «Бал прессы» тіп адапча. Тӧстеен аны Россияның Журналисттер пірігізінің Хакасиядағы пӧлии. Амғы туста аннаң Ольга Ширковец устапча. Пӱӱл хабарҷылар іди тоғызынҷы хати чыылыстылар. Оларны иң пастап Хакасия пазы Валентин Коновалов алғыстаан:
- Мин хабарҷыларға алғыс читірерге сағынчам. Сірер, республика чуртағҷыларынаң хада тоғынып, піске, оларның сидіксінiстерiн чарыдып, анаң хабас пирер оңдай пирчезер. Тиктең нимес нооза сірерні тӧртінӌі ӱлгӱ тіп адапчалар. Республикада кӱстіг хабарҷылар кӧп. Мин полған на газетаны хығырчам, полған на телевидениені кӧрчем, радионы исчем. Аннаңар пероларың уламох чітіг ползын. Чайаачы чолыңар хаӌан даа азых ползын.
Мындағ чылығ сӧстер соонаң Валентин Коновалов СМИ тоғызының иң артыхтарына сыйыхтар читірген. Іди «Хакасия» газетаның сомҷы-хабарчызы Александр Колбасовтың кӧксіне «Трудовая доблесть Хакасии» медаль хазалған. «Хабар» газетаның хабарҷызы Александра Карамчаковаа, тізең, Хакасия пазының Алғыстазы читірілген.
Валентин Олегович ідӧк чахсы тоғыстары ӱчӱн алынҷа хабарҷыларны Хакасия правительствозының алғыстас пічіктерінең таныхтаан.
Паза пу иирде республиканың журналисттер пірігізі иртірчеткен «Хакасия, алнынзар!» марығның чиңісчілерін адааннар, сыйыхтааннар.
Чоохтирға кирек, ирткен чыллардағы марығда номинациялар кӧп полҷаң. Пӱӱл, тізең, тӧрт ле номинация чарлалған: «Профи года», «СМИ года», «Журналист года» паза «Гран-при». «Жюридегілерге иң артыхтарын таллирға оой ла полбаан. Аннаңар хай піреезіне алынҷа сыйых читірерге чарадығ алылған», - теен Ольга Ширковец.
Ана андағ сыйыхтарның пірсіне пістің газетабыстың «Чиит тус» сығарызы турысхан. Аның редакторы Екатерина Индыгашева полча. «Хакасия» ГТРК-ның хакас радиозының хабарҷызы Надежда Тиникова-Кулевцоваа олғаннарға чарыдылған передачазы ӱчӱн ідӧк ӧнетін сыйых паза диплом читірілген.
Пуох компанияның хакас телевидениезінің хабарҷызы Алексей Боргояков «Поиск» номинацияда сыйыхтығ орын алған. Хайди ол чарыт пирген, пылтыр ол Афганистандағы чаалазығда араласханнардаңар істезігліг материаллар тимнеп сығарған.
«Журналист года-2018» номинацияда ікі кізіні таныхтирға чарадығ алылған: телевидение паза газета хабарҷыларын. Пастағы сыйыхты «Хакасия» ГТРК-ның хабарҷызы Константин Кравцов алған полза, ікінҷізіне кем турысхан тіп сағынчазар, аарлығ хығырығҷылар? - Орта, «Хабар» газетаның хабарҷызы Анатолий Султреков! Ол пу тоғыста 40 азыра чыл. Культура паза спорт темаларын чарытча. Ағаа хоза, чайаачы кізі пістің чонның кибір-чозахтарынаңар кӧп пасча. Ана андағох статьялары аны мындағ чиңіске ағылғаннар. Піс хада тоғынчатхан паза чииттерге чахсы кӧзідім полчатхан арғызыбысты мындағ чидігнең алғыстапчабыс.
Тиксі алза, пу иирде 20 артиинаң кізі аймах сыйыхтар алған. «СМИ года» номинацияның чиңісчізі Шира аймааның газетазы полыбысхан. Гран-прині «Хакасия» ГТРК холға кирген. Аның тоғынҷылары пылтыр чуртасха кирген проект иң артых пол парған. Ол «Ты - в эфире» адалча. Хайди чарыт пирген компания устағҷызының орынҷызы Лариса Курченко, ол олаңай ла чайаачы проект полбаан. Аның салтарлары хоостыра 2018 чылда компаниязар ікі чиит хабарҷы тоғысха алылған.
Автор :
Александра СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы