КӦГӀЛБЕЙ ЭКРАНДА - ТИКСІ ТИЛЕКЕЙ
27.03.2019
Хабарлар
Хакас телевидениезіне - 60 чыл. Пу тус аразына телевидение ӧңніг ниместең ӧңніг паза цифровой пол парған.
Хакас телевидениезі 60 чыл мының алнында тоғынып пастаан. Андада кӧзідіглер ӧңніг полбааннар. Пастағы кӧзідіглерні Ағбан чуртағчылары паза город хыриндағы аалларда ла кӧрҷеңнер.
Соонаң телевидение азахха пик турып пастаан. Ол туста кӧзідіглер, азынада пазылбин, кӧні эфирде парҷаңнар. Хакас телевидениезінде кемнер ле тоғынмааннар! Ол санда чоныбыста саблан парған кізілер: поэт-писательлер Михаил Кильчичаков, Иван Костяков, Моисей Баинов, Галина Казачинова...
Советтер тузында «Пір аалның кізілері», «Пӱӱн Хакасияда», «Чоннар аразындағы хабарлар» кӧзідіглерні чон хынып кӧрчең. Іди «Пір аалның кізілері» передачаларның кӧбізі хакас ааллардаңар тимнелгеннер.
Пии аймаандағы Улуғ Нонып аалдағылардаңар суурылған кӧзідігні амға теере ундутпинчам. Ол хысхыда эфирге сыххан. Пу аал, тізең, Ағбаннаң илееде оортах орныхча. Программа хоостыра кӧзідіг пасталар тус чидіп одырған, че аалҷыларыбыс ам даа чоғыл. Мына чылығ тонанҷыхтығ кізілер иркін алтапчалар, сууласчатханнары пу ла истіл тур. Аалдағыларны сала маңзыри одыртхлап алып, кӧзідігні ипти апарғабыс. Улуғ алғызымны аалдағы ферма устағчызы полған Александр Гаврилович Челтыгмашевке читірерҷікпін. Соонаң ол пістің кӧзідіглерде пір ле хати араласпаан.
Хакас телевидениезінең ол чылларда В.И.Сайбараков (Калининнің адынаң совхоз), Е.И.Окунев («Бондарев» совхоз), Н.М.Тюкпиеков («Таштып» совхоз ), П.В.Чебокчинов («Хапчал» совхоз), А.И.Побызаков ( «Тӧӧ» совхоз) сыбыра палғалыс тутчаңнар.
Пістің телевидениеде социализм марииның оды чарых чалбыраан. Чиңіс тутханнарға Аарластығ пічіктердең пасха хонҷых область-республикаларзар пар килерге, оларның студияларының тоғызын кӧріп аларға чарир полған. Мағаа мындағ оңдайнаң Тувада, Тағлығ Алтайда паза Монголияда поларға киліскен. 1982 чылда Москвазар ӱгренерге чӧргем. Андада чир-суубыстың кінінзер СССР-ның прай даа пулуңнарынаң редакторлар паза режиссерлар чыылысчаңнар.
Мині Ағбандағы ӱгретчілер институдын тоосхан соонаң Хакас телевидениезінің ӧӧн редакторы полған Гаврил Гаврилович Котожеков тоғысха режиссерға алған. Соонаң хабарҷы тоғызын апарғам.
Пӱӱл Хакас телевидениезі тӧстелгеннең 60 чыл толча. Мин хада тоғынған арғыстарымны пайрамнаң алғыстапчам. Олар - Евдокия Михайловна Кильчичакова, Галина Семёновна Конгарова, Галина Николаевна Литвиненко паза даа пасхазы. Кӧп чыл хазых чӧріңер!
Автор :
Михаил ТОРБОСТАЕВ, Россияның Журналисттер пірігізінің кізізі
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы