ЧИИТТЕРНІҢ УЗЫ ТИЛІПЧЕ
02.04.2019
Хабарлар
Альбина КУРБИЖЕКОВА Мария ЧАНКОВАА диплом читiрче.
Марығ. «Таланттар тигір хуры» республика марииңың чиңісчілері адалғаннар. Ирткен неделяда национальнай библиотекада «Таланттар тигір хуры» марығ араласчыларын паза чиңісчілерін пайрамни чеестееннер.
Чоохтирға кирек, Хакасиядағы писательлер пірігізі, Литераторлар туразы пу марығны чыл сай иртірчелер. Чииттер ӱс номинацияҷа чайаачы устарынаң сынасханнар: поэзия, проза, драматургия. Частары хоостыра араласчылар ікі алынҷа марығласханнар: 12 - 17 паза 18 - 35 частығлар.
Пӱӱл марығда Пии, Алтай, Асхыс, Шира аймахтарының паза Харатас, Ағбан городтарның чиит писательлері араласханнар. Оларның тоғыстарын республикабыстың саблығ писательлері паалааннар. Жюринің хачызы Хакасия культуразының саблығ тоғынчызы, Россияның писательлер пірігізінің кізізі Юрий Черчинский полған. Аның таниинаң, чылдаң чылға чиит писательлернің узы тиліпче. Пӱӱл чиит чайаачылар жюринің паалиина чахсы, чӱрек тибіретчеткен тоғыстар сығарғаннар. Аннаңар, чиңісчілерні таллап алар ӱчӱн, кӧп чоохтазарға, талазарға киліскен.
Тахпахчы, прозаик, поэт Альбина Курбижекова, чиит чайаачыларзар айланып, оларға кӧп чылығ сӧс читірген паза олардаң пазарын тастабасха сурынған.
- Сірер пісті алыстырар тӧл полчазар. Килер тус, хаҷан сірер тореен чир-суубысты сабландырарзар. Хакасиядағы писательлер пірігізі араласчыларының кӧбізі тынаға сых парған Аннаңар пасчатхан чииттерге чарыдылғаң марығда асхынах нимес кізі араласчатханы пісті ӧріндiрче. Піреезі марығда пастағызын на араласпинча. Андағларның чайаачызы тиліпчеткені чахсы кӧрінче, - таныхтаан Альбина Васильевна.
12 - 17 частығ араласчылар аразында орыс тілінең пазылған кибелістер номинацияда чиңісчілер полыбысханнар: I степеньніг лауреат - Елена Сагалакова (Ағбан, 11 № школа), II степеньніг лауреат - Стефания Владимирова (Бондарев), III степеньніг лауреат - Карина Михайлова (национальнай гимназия).
12 - 17 частығ араласчылар аразында, хакас тілінең кибелістер пазып, утып алғаннар: I степеньніг лауреат - Мария Чанкова (Ус чул), II степеньніг лауреат - Даяна Саражакова (национальнай гимназия), III степеньніг лауреат - Татьяна Миндибекова (национальнай гимназия).
18 - 35 частығ араласчылар аразында поэзия номинацияда чиңіс тутханнар: I сте-пеньніг лауреат - Илья Новиков (Ағбан), II степеньніг лауреат - Светлана Акатова (Харатас), III степеньніг лауреат - Галина Фефелова (Ағбан) паза Юлия Ермилина (Ағбан).
18 - 35 частығ араласчылар аразында проза номинацияда артыхтарның иң артыхтары полыбысханнар: I степеньніг лауреат - Дарья Павлова (Харатас), II степеньніг лауреат - Анатолий Бимаев (Ағбан), III степеньніг лауреат - Айхыс-Александра Тюньдешева (Ағбан).
Драматургия номинацияда пӱӱл, улуғ хомзынысха, ікі ле кізі араласхан. Анастасия Палевич паза Глеб Пахомов. Глебтің тоғызын жюридегілер пӧзік паалааннар. Аннаңар ол дипломнаң сыйыхтатхан. Кізі асхынах араласханнаңар, пу номинацияда лауреаттар чоғыл.
Таныхтирға кирек, 18 - 35 частығларның аразында чиңіс тутхан чиит писательлер дипломнарнаң паза чиит авторларның III регионнар аразындағы литература лагерьі араласчызы сертификадынаң сыйыхтатханнар. Хакасияда чайғызын тоғынчатхан литература лагерьі чиит чайаачыларға тузалығ полча. Анда олар Хакасияның саблығ писательлерінең танысчалар, чоохтасчалар паза кӧп тузалығ чӧп алчалар. Аннаңар андағ ӱлӱс тӱскеніне чиңісчілер тың ӧрінгеннер.
Чиңісчілернің аттары адалған соонда, чалахай кӧңніліг Маша Чанковазар пастырғам. Ол Ӱс чулдағы М.Е.Кильчичаковтың адынаң ортымах школаның 6-ды класс ӱгренҷізі полча. Мындағ пӧзік синде иртчеткен марығда ол пастағызын на араласхан. Жюри хызыҷахтың пис кибелізін паалаан: «Чалғыс чуртас», «Ӧӧрелер», «Адайах», «Кӱскеҷек» паза «Хоосхаҷах».
Маша кибелістерні чалғызан полза пазарға хынча. Аны кибелістер пазарға ӱгретчізі Виктория Николаевна Томочакова кӧніктірче. Машаҷах, дипломын холда тудып, аннаң андар кибелістер хайди даа пазарбын теен. Альбина Курбижекова, диплом читірчеткенде, хызыҷахтаң кӧп наа чайаачы тоғыс пас саларға сурынған.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде