ХОРМАЧЫЛАР ИИРІ
03.04.2019
Хабарлар
Тоғазығ. Хосхар айының пастағы кӱнін Хатхы-кӱлкі кӱні тидірлер. Отіг тілліглер аймах-пасха хынығ нимелер чоохтидырлар. Ол кӱнні таныхтап, Асхыста М.Е.Кильчичаковтың адынаң аймахтың ӧӧн библиотеказында тоғазығ ирткен.
Халғанҷы чылларда 1 апрельде «Тӧреен тілім хуҷаанда» адалчатхан тоғазығ библиотеканың хығырығҷылар залында иртче. Андар кӧбізін хығырығҷылар киледір, олар хакас чайаачыларның тоғыстарын хығырчалар.
Тоғазығ пасталыбысты. Калининдегі Культура туразының тоғынҷызы Вениамин Боргояков, микрофон холға киріп, кем хаҷан чоох тударын алай ойын ойнирын чарлабысты. Олох арада хай пірее хаңалңостарны позы чоох аразына суғыбысча. Ойынҷы кізі. Чон, тізең, сах андох хатхырызып пастады, пайаағызынаң сағаан нооза, ноо-да ниме полар тіп. Істібісте чыыл парған хатхы тастына сых тур.
Ӱс чулдаң Инна Побызакова арғаас хоосхадаңар кибеліс чоохтап пирген. Хап-орта, іргек хоосха диван на типсидір.
Анаң «Хуртуйах тас» музей тоғынҷылары ойын кӧзіткеннер. Артур Мамышев араға ізібізерге кӱс табанны кӧзіт тур. Хысхаҷахти чоохтаза, пу ізеечі табан, хатына малхадып, ӧлеечік полыбысча. Аннаң андар постарың пілчезер ноо ниме полчатханын. Пу ойында Леонид паза Оксана Горбатовтар, Галина Тюкпиекова араласханнар, ідӧк хандыра ойын кӧзіт пиргеннер.
Аннаң андар Зинаида Торокова Табылдук Исатай ханның ипчізін ойнапча. Я, пайорхапчатхан ипчілер абахай полыбысчалар. Чоғархы Тӧӧдегі М.Е.Кильчичаковтың адынаң музейнің устағҷызы Надежда Боргоякова аалдағы «мирген» оолларның оңдайларын кӧзіт пирген.
Ідӧк Герман Тинников Сафрон аалынаңар хынығ чоох чоохтаан. Леонид Горбатов, алында орыс тілін «чахсы» пілчеткен иней-апсахтарның чоохтарын чоохтап, пісті ээреткен. Анна Когозеева, пастағызын на пу тоғазығда аралазып, хынығ чооғынаң пісті хатхыртхан. Библиотека даа тоғынҷылары тастыхти турбааннар, кӱлкістіг ойыннар кӧзіткеннер.
Тоғазығ тоозыл парған. Пайаадаң чуртас сурығларын пӧгіп, узы-пазына сых полбинчатхан постарыбыстың сырайларыбыс саңай чарып чӧрібіскен.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы