КЕМГЕ ПОЛНОМОЧИЕЛЕР?
05.04.2019
Хабарлар
Ӧӧркі Чӧп. Хакасияның Ӧӧркі Чӧп президиумы чыылиинда ӧӧн сурығларның пірсі аалларның полномочиелерінің чардығын, ЖКХ-наң палғалыстығларны, муниципальнай аймахтарға айландырардаңар закон проекті полған.
Хакасияның Ӧӧркі Чӧп кнезі Владимир Штыгашев 3 апрельде президиум чыылиин иртірген. Президиумдағылар пастап «Хакас Республикадағы кӧп квартиралығ тураларда тиксі тыхтағ тоғыстарын иртірердеңер» республика законынзар алызығлар кирчеткен закон проектін ӱзӱргеннер. Хакасия правительствозы кирчеткен закон проектінең республиканың пӱдіріг паза ЖКХ министрінің пастағы орынҷызы Анатолий Безлепкин таныстырған. Аның искіриинең, закон проектінің ӧӧн кӧстее - тиксі тыхтағ сферазындағы хазна политиказын сын оңдайлығ идері.
Чоох парча лифт чох кӧп квартиралығ туралардаңар (ӧӧнінде пис хадыллығ туралар), хайзылары наари пӱдірілген лифттіг тураларнаң (читі паза аннаң даа кӧп хадыллығ туралар) пір адрестіг пол парғаннар. Іди ол туралар пічіктер хоостыра лифттіглерге саналчаттыр, аннаңар андағы чуртағҷыларға сынында чох полчатхан лифттің тиксі тыхтаа ӱчӱн тӧлирге килісче. Безлепкиннің чооғынаң, республикада андағ 35 кӧп квартиралығ тура: Ағбанда - 19, Саяногорскта - 15, Харатаста - 1. Пу туралардағы чуртағҷыларға тӧлегні сын оңдайлығ идер ӱчӱн республика законынзар алызығлар кирілчеттір.
Штыгашев закон проектінің ӱзӱрии тузында паза пір сурыға хайығ айландырған.
- Амғы туста кӧп квартиралығ тураларның кӧбізінде пастағы хадылларда садығ туралары, аймах-пасха идінҷектер орныхчалар, - таныхтаан Ӧӧркі Чӧп кнезі. - Тура хыриндағы чирнең олар пос хынғанни тузаланчалар, тиксі тыхтағ ӱчӱн улуғ нимес ахча тӧлепчелер. Тиксі тыхтағ ӱчӱн прай аар чӱк олаңай чурғағӌыларға арғылча. Аннаңар сағын кӧрерге кирек - хайди ол аар чӱкті тиңни ӱлестірібізерге? Че ол алынча сурығ.
Пу закон проектін, тізең, кирілгенге санап, чағынғы сессияларның пірсінде ӱзӱрерге чаратханнар.
Ікінҷі закон проектіне, хайзын Хакасия правительствозыох кирген, Ӧӧркі Чӧп президиумы саринаң хайығ улуғ полған. «Хакас Республикада орындағы алынҷа сурығларны аалларның холына пирердеңер» республика законының 2 статьязының 1 пункты кӱзін чідірген тіп санирдаңар закон проектін Анатолий Безлепкинӧк чарытхан.
- Закон проекті аалларның хайзы полномочиелерін муниципальнай аймахтар холына пирер пӧгіннең тимнелген, - искірген ол.
- Чарытхы, чылығ, газ паза суғ пирерінең палғалыстығ полномочиелерні пӱӱнгі кӱнде тӱзімніг арах пӧгер ӱчӱн.
Пӱдіріг паза ЖКХ министрінің пастағы орынҷызы чооғынаң, Сибирьдегі федеральнай округтың регионнарының кӧбізі 2014 чылдох мындағ оңдайға кірібіскен.
- Сибирьдегі федеральнай округта пу полномочиелер аалларның холында халғаннар Хызылчар крайында, Томск облазында, Хакасия паза Тува реепубликаларда ла, - танығ иткен Безлепкин.
Владимир Штыгашев хайдағ полномочиелердеңер чоох парчатханын чарыт пирген.
- Пілдістіг нимес ниме чох полар ӱчӱн. Пу сурығ олаңай, - искірген парламент устағҷызы. - Чурт-коммунальнай хоныхнаң палғалыстығ сидіксіністерні пазох аймахтар синінзер айландырары кӧрілче.
Олох туста Ӧӧркі Чӧп кнезі пу оой нимес сурығ пастағызын на кӧдірілбинчеткенін таныхтаан.
- ЖКХ сурығларынҷа полномочиелерні нандыра, аймахтарзар, айландырардаңар сурығны піс 2017 чылдох ӱзӱргебіс, - чоохтаан Владимир Штыгашев. - Андада ол туста республика пазы полчатхан Виктор Зимин закон проектін нандыра хығыртыбыехан.
Владимир Николаевичтің искіриинең, пу полномочиелерні нандыра айландырары пӱӱнгі кӱнде оой нимес сурығ полча.
- Піс, хаҷан пу полномочиелерні ааллар синінзер пиргебіс, оларны орында пӧгерге оой арах полар тіп чоох апарғабыс, - чарытхан сидіксіністі Ӧӧркі Чӧп устағҷызы.
- Амды піс оларны нандыра аймахтарзар пирібізерге итчебіс. Че пу тус аразына аймахтарның ЖКХ-наң палғалыстығ тыхтағ службалары чох пол парғаннар нооза.
Аннаңар Владимир Штыгашев пу сурығҷа маңзырабасха чӧп пирген, пазох тоғазып, закон проектінің чахсы паза читпес сариларын ӱзӱрерге. Кирек полза, азых ӱзӱріглер иртірерге. Іди закон проектін Ӧӧркі Чӧпсер кирілгенге санирға, че аны хоостыра хоза тоғынарға чарат салғаннар.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы