АЛТЫН ЧАЧАХТАР, КӰМӰС МАРХАЛАР
17.04.2019
Хабарлар
Марығ. Хакас хазна университедінде 100 азыра ӱгренӌі паза колледж студенттері дизайнҷа устарынаң сынасханнар.
Олаңай нимеде сілігні кӧр таап, аннаң улам на хайхастығ ниме чайиры полғанына ла пирілбинче. Мында ӧӧні - кічігдӧк нимее чайалғанын ілезіне сығарып, аны тилідері. Соонаң андағ ус чонны тоғыстарынаң хаан даа ӧріндірер.
Хакас хазна университедінде ӱгренчеткен чииттернің «Чиит дизайнерлер» регион марии ирткен. Анда школаларда, хоза ӱгредіг учреждениелерінде паза колледжтерде ӱгренчеткен оол-хыстар араласханнар. Марығ ікі пӧлікке чарылған: «Кип-азах паза тура істіндегі ниме-нооның дизайны» паза «Архитектура дизайны». Марығ тузында чииттер устарын чонға кӧзіткеннер. Архитекторлар аал-городтарын чахсыландырарынҷа проекттерін паза кічіг архитектура макеттерін кӧзідіге сығарған ползалар, дизайнерлер постарының кип-азах чыындыларын кӧзіткеннер.
Мағаа кип-азах чайаҷаң устарның мариинда поларға оң полған. Пу иирде Хакас хазна университедінің концерт залы мода кӧзідер подиумға айлан парған.
Хайди дизайнерлер тіпчелер, кип-азах кізі хылиин кӧзітче, че аның хынығ чардыхтары пасхазына тӧӧй полбинчатханын кӧзідерге полысча. Пу марығ тузында мин ол сӧстернің сынын чахсы сизінгем. Араласчылар 20 азыра кип-азах чыындызын кӧзіткеннер. Кӧбізі «Дебют» номинацияда араласхан. Олар ам на кип-азах чайап пастапчатхан устар, 5 - 8 класстар ӱгренҷілері. Арға-мӧрійге школаа кис чӧрҷең, узуҷаң кип-азахтар ағылғаннар. Ідӧк авангард паза этническай оңдайнаң тігілген киптер кӧп полған. Полғанының на тоғызы ӧңнернең, фактуранаң паза чайаачы сағыстарынаң пасхалалған.
Кӧзідімге, Асхыстағы лицей-интернаттың ӱгренҷізі Алина Саражакова аалҷыларны уғаа ӧкерек сигедеенең хайхатхан, ол кізіні хайдағ даа пайрамда чазир паза харахха тасталар. Аның тоғызы пу номинацияда ӱзінҷі орынға турысхан. Евгения Артонова, тізең, тоғысха кис чӧрҷең сигедеен чонға сығарған. Хап-хара ӧңніг паза улам на ӧтіг хызыл полоскалығ сигедек тоғысха кисчең хайдағ даа кип-азахты чазир. Ідӧк Асхыстаң Татьяна Токоякова килген. Ол хакас кӧгенектіг кӧклӧзінең «Дизайн объект» номинацияда чиңісчі полыбысхан. Таныхтирға кирек, пу хызыҷахтарны Асхыстағы лицей-интернаттың технология ӱгретчізі Елена Юктешева тимнеп ағылған.
Ідӧк чарғыҷыларның хайиин тартхан Хакас национальнай гимназия-интернаттың «Айра» мода театры. Ол «Дебют» номинацияда ікінҷі орынны холға кирген.
- Пу марыға піс «Хам тынызы» чыындыны сығардыбыс. Ол олғаннарның пастағы тоғызы. Чыындының ӧӧн сағызы - хамның тиң нимес тынызы, аннаңар пістің костюмнарда кӧп ассиметрия, кинетін линиялар кӧріл парған. Сағыс полған ах сағыстығ хамны кӧзіт пирерге, аннаңар кип-азах ах кашемирдең тігілген, - таныхтапча мода театрының устағҷызы Артём Топоев. Ол национальнай гимназияда пастағы чыл тоғынча, алында Ис пилтірі аалда ідӧк мода театрынаң устаан.
Че иң не кӧп чыынды ағылған Ағбандағы чайаачы олғаннар кінінің «Стиль» мода студиязы. Аның чыындылары «Дебют» номинацияда сыйыхтығ орыннарнаң таныхтатхан. Пу мода студиязының араласчызы, Ағбандағы 22 № школа ӱгренҷізі Аяна Боргоякова кӧгенектер чайирға ӱр ниместең пастаан, че нинҷінең тӧртінҷі чылы хоостапча. Тиктең нимес аның кӧгенее нинҷінең иптіг хоостал парған. Хайди хызыҷах таныхтапча, аның ууҷазы паза іҷезі хакас кӧгенектерін уғаа чахсы тікчелер, аннаңар Аяна олардаң халбасха сағынча.
Че иң не хатығ харбазығ полған «Авторская модель одежды» номинацияда. Анда ӧӧнінде колледж студенттері тоғыстарынаң махтанысханнар. Араласчыларның пӧзік узы іле кӧрінген. Че андағ даа полза, чиңіс тутхан Хакасияның профессиональнай технология, экономика паза сервис колледжінің студенті Дмитрий Осиповтың «Вернисаж» чыындызы. Минің кӧрізімнең, аның тоғыстары саблығ дизайнерлернің тоғыстарынаң пір дее халбинча. Хынығ, сіліг паза чапсых, че олох туста сизінчезің: «Прай наа ниме - ол чахсы ундудыл парған иргі ниме». Че хайди аны наа оңдайнаң пирерге полғаны ла сағын полбас.
Таныхтирға кирек, чиңісчілерге, сыйыхтығ орынға турысханнарға паза сертификат алғаннарға, ХГУ-зар ӱгренерге кірчетсе, хоза балл пирілер.
130-п №
У
Хакас национальнай гимназия-интернаттың «Айра» мода театрының араласчылары
V.
Автор :
Екатерина ИНДЫГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы