ЧУРТАҒӋЫЛАРНЫҢ ХАЛЫХ ПАСТААНА ХАБАЗАРЫ
23.04.2019
Хабарлар
Хакасия пазы Валентин КОНОВАЛОВ аал-город муниципалитеттері тоғынҷыларынаң хада
Пайрам. Хакасия пазы Валентин Коновалов 18 апрельде правительство туразында муниципальнай пӱдістер устағҷыларынаң тоғасхан.
Хакасия пазы муниципальнай пӱдістернің тоғынҷыларын тиксі Россияда таныхталчатхан Орындағы пос устаныс кӱнінең алғыстаан. Анаң Валентин Коновалов энергетиктер алнындағы ӧдістернең палғалыстығ кирекче хысхаҷахти чоох тутхан. Орынҷызы Юрий Курлаевке муниципальнай пӱдістернің устағҷыларынаң хада килер чылығ пирҷең тусха тимненчетсе, тиксі коммунальнай хоныхтарны сыныхтирға чахаан. Ол салтарлар коммунальнай системада хайдағ читпестер, тыхтағ киректелчеткенін ілезіне сығарып, оларны тузында тӱзедіп, артых хорадығларны паза коммунальнай саайларны чох идерге кирек тіп таныхтаан.
- Хада-пірге тоғынзабыс, піс ӧдістер чыылбас системаны тӧстеп поларбыс. Аймахтар пастары, предприятиелерні хатабох сыныхтап, техническай базаны нааҷылир орыннарны ілезіне сығарарға киректер. Республика полызарға тимде. Чурт-коммунальнай киреен чахсыландырып, саайларға чочыныстарны тӧбін тӱзірербіс паза кізілернің чуртазына хорғыс чох идербіс, - таныхтаан Хакасия пазы.
Аннаң андар Валентин Коновалов тоғазығның танығлығ чардығына кірген. Муниципалитеттернің пастарына паза тоғынҷыларына чахсы тоғыстары ӱчӱн алғызын читірген. Республиканың город-аймахтарының пос устанызында тӱзімніг тоғыс апарчатхан 20 кізі таныхтатхан. Оларның аразында Алтай аймаанаң Хубачар аал чӧбінің пазы Александр Мин Те Хо Аарластығ пічік алған. Пии аймааның администрация тоғынҷызы Анатолий Байкаловха алғыстас читірілген. Боград аймаа пазының пастағы орынҷызы Ольга Черкунова алғыстас пічиинең таныхтатхан. Таштып аймааның Ибіг аал чӧбінің тоғынҷызы Александра Здвижковаа алғыстас читірілген. Хакасия пазы кӧп чыл тоғын салған паза орындағы пос устаныс тилізіне хозым итчеткен пасха даа муниципалитеттернің тоғынҷыларын алғыстас пічіктерінең паза Аарластығ пічіктернең таныхтаан.
- Пістің ӧӧн пӧгінібіс - орындағы пос устанысты тилідері паза тыыдары. Кізілернің халых пастаана хабазары, республиканың танығлығ проекттерін чуртасха кирерінде чуртағӌыларны аралазарға тартары, ол оңдайнаң чонға чағын поларға кирек. Пістің прай пӧгіннерібіс Хакасияның аал-городтарының чуртағӌылары чахсы чуртазыннар тіп кӧстегліг, - чарытхан Хакасия пазы.
Орындағы пос устанысча, халых пірігістерінҷе паза чоннар аразындағы хайызығларҷа комитеттің кнезі Роман Челтыгмашев Хакасияның Ӧӧркі Чӧбі адынаң араласчыларны алғыстаан. Аның таниинаң, орындағы пос устаныс пастары паза тоғынҷылары кӱннің чоннаң тоғыс апарчалар, сидіксіністерін пӧкчелер. Муниципалитеттер ӱлгӱнің ол структуразы, хайзы чонға иң чағын.
Хакасияның национальнай паза территориальнай политика министрі Михаил Побызаков республикадағы пос устаныс органнарына хабазығлардаңар улуғ нимес чоох тутхан.
- Піске тоғыс хоостыра муниципалитеттерҷе удаа чӧрерге килісче. Аннаңар хайди сірер тӧреен чир-сууңарға хынчатханнарыңны сизінчебіс. Тоғысха прай кӧңніңернең хайчатханнарың іле кӧрінче. Сірернің тоғызыңар сидік, аннаңар хазииңар пик ползын паза тоғыста пӧзік чидіглерге чидерге алғапчам.
Таныхтирға кирек, тиксі хазнада чыл сай «Иң артых муниципальнай пӱдіс» марығ иртірілче. Пістің муниципальнай пӱдістернің пастары анда ӧткін араласчалар. Хакасия пасха регионнарнаң опыдынаң ӱлезерге тимде полчатхан регионнар санына кірчеткені таныхталған. Чыл сай республиканың прай городтары марығда араласча. Ідӧк иң ӧткін Алтай, Орджоникидзе, Пии, Таштып паза Ағбан пилтірі аймахтары араласчалар.
Пӱӱл ідӧк марығ иртірілер. Таныхтирға кирек, пос устаныстарның пастары ӧткін тудынып хайынза, аал-городтарда чуртас синін чахсыландырар оңдай табылар, - таныхтаан Михаил Побызаков.
Чыылығның танығлығ чардығы тоозылғанда, прай араласчылар сомға суурынғаннар.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде